ཕྱི་ལོ་ ༢༠༡༨ ཟླ་ ༡༡ ཚེས་ ༢༣ རེས་གཟའ་པ་སངས།
༄༅། །ལྷོ་ཨ་ཕི་རི་ཀའི་སྐུ་ཚབ་དོན་གཅོད་ཁང་ནས་ཆོས་ལུགས་འདྲ་མིན་གྱི་ལྷན་ཚོགས་སུ་མཉམ་ཞུགས་དང་། དེ་བཞིན་དོན་གཉེར་ཅན་རྣམས་ལ་བདེན་པ་བཞིའི་སྐོར་ངོ་སྤྲོད་གནང་འདུག
དེ་ཡང་ལྷོ་ཨ་ཕི་རི་ཀའི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་དང་། དོན་ཁང་གི་ལྟ་གྲུབ་དགེ་རྒན་དགེ་བཤེས་བློ་བཟང་དོན་གྲུབ་ལགས་རྣམ་གཉིས་གྲོང་ཁྱེར་ཇོ་ཧན་ནེསི་བྷག་ Johannesburg ནང་ཚོགས་གནང་བའི་ཆོས་ལུགས་འདྲ་མིན་གྱི་ལྷན་ཚོགས་ཤིག་ལ་ཚོགས་ཞུགས་གནང་ཡོད། ལྷན་ཚོགས་ཀྱི་གྲོས་གཞི་གཙོ་བོ་ལྔ་ཡོད་པ་དེ་དག་ནི། འཇིག་རྟེན་བཀོད་པ་པོ། འཇིག་རྟེན་ཆགས་ཚུལ། འཇིག་རྟེན་ཁམས་ཀྱི་གྲུབ་ཆ། འགྲོ་བ་མིའི་བཀོད་པ་དང་འཚོ་གནས་བྱེད་པའི་རྒྱུ་མཚན་བཅས་ཡིན་འདུག
ལྷན་ཚོགས་སུ་ནང་པ་དང་། ཡེ་ཤུ། ཨ་ཕི་རི་ཀའི་ Hebrew ཁ་ཆེ་སོགས་ཀྱི་སྐུ་ཚབ་འཐུས་མི་མཉམ་ཞུགས་གནང་ཡོད་པ་དང་། སྐབས་དེར་དགེ་བཤེས་བློ་བཟང་དོན་གྲུབ་ལགས་ཀྱིས་ཚོགས་འདུའི་བརྗོད་གཞི་དང་འབྲེལ་ནང་ཆོས་ཐོག་ནས་གཟིགས་ཚུལ་ཇི་འདྲ་ཡིན་པ་ཞིབ་ཕྲ་ངོ་སྤྲོད་གནང་ཡོད་པ་མ་ཟད། ཚོགས་ཞུགས་པ་ནང་ཁུལ་ཤེས་བྱ་བརྗེ་རེས་དང་ཆོས་ལུགས་འདྲ་མིན་གྱི་འདོད་ཚུལ་སྐོར་གོ་རྟོགས་གང་ལེགས་བྱུང་ཡོད་འདུག
གཞན་ཡང་ཕྱི་ཚེས་ ༢༠ ཉིན་རྒྱལ་ས་ Pretoria ནང་དགེ་བཤེས་བློ་བཟང་དོན་གྲུབ་ལགས་ཀྱིས་རྒྱལ་སའི་ཁུལ་དང་། གྲོང་ཁྱེར་ཇོ་ཧན་ནེསི་བྷག་ གཉིས་ནས་ཕེབས་པའི་སྦྱོང་བརྡར་བ་དང་སློབ་སྟོན་དགེ་རྒན་སོགས་ཁྱོན་མི་གྲྭངས་ ༧༠ ལྷག་ལ་བདེན་པ་བཞིའི་སྐོར་ལ་ངོ་སྤྲོད་གནང་འདུག
ལས་རིམ་འདི་བཞིན་ལྷོ་ཨ་ཕི་རི་ཀའི་ Coaching and Mentoring Association of South Africa ཞེས་པའི་ཚོགས་པས་གོ་སྒྲིག་གནང་བ་ཞིག་ཡིན་པ་དང་། ལས་རིམ་ནང་མཉམ་ཞུགས་གནང་མཁན་ཡོངས་ནས་ནང་ཆོས་ལས་བདེན་པ་བཞིའི་སྐོར་གྱི་འགྲེལ་པ་དེ་སྤྱི་སྒེར་གཉིས་ཀྱི་ལས་དོན་ཐོག་ཕན་ཐོགས་ཆེན་པོ་བྱུང་སྐོར་བརྗོད་ཡོད་འདུག་པ་བཅས། །
