ཕྱི་ལོ་ ༢༠༡༨ ཟླ་ ༡༡ ཚེས་ ༣༠ རེས་གཟའ་པ་སངས།
༄༅། །འདི་གར་དཔལ་འབྱོར་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༡༡ ཚེས་ ༢༢ དང་ ༢༣ བཅས་ཉིན་གྲངས་གཉིས་རིང་སྤོག་ར་བཀྲིས་གླིང་གཞིས་ཆགས་ཀྱི་ཚོགས་ཁང་ནང་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ནས་གོ་སྒྲིག་ཞུས་པའི་ཉིན་གྲངས་གཉིས་རིང་གི་བོད་རང་དབང་བདེན་པའི་ལས་འགུལ་གྱི་ས་གནས་ཚོགས་ཆུང་གི་ཚོགས་མི་གསར་འདེམས་བྱུང་བ་རྣམས་ལ་ཁྲིམས་སྒྲིག་དགོངས་དོན་ལས་དོན་ཞུ་སྒོ་མཐའ་དག་སྔར་ལྷག་ཚགས་ཚུད་ཡར་རྒྱས་ཡོང་སླད་ལས་དོན་བྱེད་ཕྱོགས་ཀྱི་ཟབ་སྦྱོང་གོ་སྒྲིག་ཞུས།
དེ་ཡང་གོང་ཚེས་ཉིན་གྱི་སྔ་དྲོ་ཚོུད་ ༩ ཐོག་ཟབ་སྦྱོང་ནང་མཉམ་ཞུགས་གནང་མཁན་བལ་ཡུལ་ས་གནས་ཁག ༡༧ ནས་ཁྱོན་ཚོགས་བཅར་བ་གྲངས་ ༢༤ བཅས་ཚང་འཛོམས་ཀྱིས་ཐོག་མར་དཔྱ་དེབ་བཟོ་ཕྱོགས་དང༌། ཚོགས་ཆུང་དང་འབྲེལ་ཆགས་ཁྲིམས་སྒྲིག་ཀྱི་ལེའུ་སོ་སོའི་དགོངས་དོན་ལས་དོན་བྱེད་ཕྱོགས་བཅས་ཀྱི་ཐོག་ཟབ་ཁྲིད་ཞུས་པ་དང༌། ཕྱི་ཚེས་ ༢༣ ཉིན་དཔྱ་དངུལ་བསྡུ་ཕྱོགས་དང༌། རྒྱུན་གྲོན་དང་ལོ་འཁོར་སྔོན་རྩིས་འབུལ་ཕྱོགས། རྩིས་ཁྲ་ཉར་ཕྱོགས་དང་འབྲེལ་བའི་རྩ་འཛིན་ལམ་སྟོན། རྩིས་ཞིབ་སྙན་ཐོར་ལན་འདེབས་འབུལ་ཕྱོགས་སོགས་ཀྱི་ཐོག་ཟབ་འཁྲིད་ཟིན་རྗེས་སྡེ་ཚན་ཆ་བགོས་ཀྱིས་དངོས་སུ་སྦྱོང་ཚན་གནང་ཡོད་པ་མ་ཟད།
སྐབས་ཐོག་སོ་སོར་སྐྱོན་གནད་རྣམས་ཡོ་བསྲང་ཀྱི་སློབ་སྟོན་ཞུས། དེ་བཞིན་ཚོགས་བཅར་བ་རྣམས་པའི་དྲི་བ་ཁག་ལ་ལན་འདེབས་གསལ་བཤད་དང༌། ཟབ་སྦྱོང་ནང་མཉམ་ཞུགས་གནང་མཁན་རྣམས་ཀྱིས་དོ་སྣང་ཆེན་པོའི་ངང་ཆ་ཤས་བཞེས་ཡོད་པ་མ་ཟད། མ་འོངས་ཟབ་སྦྱོང་འདི་ལྟར་མུ་མཐུད་གནང་ཐུབ་ཚེ་དགེ་མཚན་ཆེ་མངོན་སོགས་བསམ་ཚུལ་གསུངས་གནང་སོང༌།
ཟབ་སྦྱོང་གི་མཇུག་བསྡོམས་ཐོག་ཟབ་སྦྱོང་བ་ཡོངས་ཀྱིས་དོ་སྣང་ཆེན་པོའི་ཐོག་མཉམ་ཞུགས་གནང་བར་བསྔགས་བརྗོད་ཞུས་པ་མ་ཟད། བཀྲིས་གླིང་ས་གནས་འགོ་འཛིན་ལས་ཁུངས་ཀྱིས་ཟབ་སྦྱོང་གི་མཐུན་འགྱུར་གནང་སྒོ་ཁག་ཆད་ལུས་མེད་པར་གནང་བར་ཐུགས་རྗེ་ཆེ་ཞུ་རྒྱུ་བཅས་ཐེངས་འདིའི་ཟབ་སྦྱོང་རྒྱལ་ཁའི་ངང་མཇུག་སྒྲིལ་ཐུབ་པ་བྱུང་ཡོད།
