ཕྱི་ལོ་ ༢༠༡༨ ཟླ་ ༡༡ ཚེས་ ༢༣ རེས་གཟའ་པ་སངས།
༄༅།།སྔ་འགྱུར་རྙིང་མའི་དབུ་འཛིན་ཁྲི་རབས་བདུན་པ་༸སྐྱབས་རྗེ་ཀཿཐོག་དགེ་རྩེ་རིན་པོ་ཆེ་མཆོག་གི་བླ་བྲང་ཞབས་འབྲིང་བ་རྣམས་དང་།བལ་ཡུལ་སྔ་འགྱུར་ཀཿཐོག་ཨ་འཛོམ་དགོན་དང་སྔ་འགྱུར་ཀཿཐོག་གཞི་ཆེན་བེེ་རོ་དགོན་གཉིས་ཀྱི་འདུས་སྤྱི། ༸སྐྱབས་རྗེ་དམ་པའི་འདས་མཆོད་གོ་སྒྲིག་ཚོགས་ཆུང་། མགོ་ལོག་ཐེབས་རྩ་ཁང་། སྐལ་བཟང་རྡོ་རྗེ་ཁྱིམ་ཚང་བཅས་ཐུན་མོང་ལ།
ཆེད་ཞུ། ཉེ་ཆར་ཕྱི་ལོ་ ༢༠༡༨ ཟླ་ ༡༡ ཚེས་ ༡༩ ཉིན་གསང་ཆེན་སྔ་འགྱུར་རྙིང་མའི་ཆོས་བརྒྱུད་ཀྱི་དབུ་འཛིན་ཁྲི་རབས་བདུན་པ་༧སྐྱབས་རྗེ་ཀཿཐོག་དགེ་རྩེ་འགྱུར་མེད་བསྟན་པ་རྒྱལ་མཚན་རིན་པོ་ཆེ་མཆོག་གློ་བུར་དུ་དགོངས་པ་ཆོས་དབྱིངས་སུ་བསྡུས་ཚུལ་བསྟན་པའི་ཤིན་ཏུ་ཡིད་སྐྱོའི་གནས་ཚུལ་བྱུང་བ་ནི། བསྟན་པ་སྤྱི་དང་ཁྱད་པར་སྔ་འགྱུར་རྙིང་མའི་བསྟན་པ་ལ་གོད་ཆག་ཆེན་པོ་ཞིག་ཡིན་པས། བོད་མིའི་སྒྲིག་འཛུགས་བཀའ་ཤག་ནས་མྱ་ངན་གུས་བཏུད་དང་། ༸སྐྱབས་རྗེ་དམ་པ་དེའི་ཤུལ་བཞུགས་ཞབས་འབྲིང་དང་། སྐུ་ཉེ་ལྟོས་བཅས། གཞིས་བྱེས་ཕྱི་ནང་ཞལ་སློབ་སེར་སྐྱ་ཡོངས་རྫོགས། དེ་བཞིན་སྔ་འགྱུར་བསྟན་པའི་བརྒྱུད་འཛིན་འདུས་སྡེ་དང་རྗེས་འཇུག་ཡོངས་བཅས་ལ་ཐུགས་གསོ་གཏིང་ཟབ་ཞུ་བཞིན་ཡོད། དེ་ལྟར་མཚོན་སླད་ད་ཉིན་ཕྱི་ཚེས་ ༢༢ ཉིན་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་སྲི་ཞུའི་ལས་བྱེད་རྣམས་ཚང་འཛོམས་ཀྱིས་ཆུ་ཚོད་གཅིག་རིང་སྨོན་ལམ་གསུང་འདོན་དང་། དེ་རྗེས་གཞུང་འབྲེལ་མྱ་ངན་གུས་བཏུད་མཚོན་ཕྱིར་སྒྲིག་འཛུགས་ཀྱི་ལས་ཁུངས་རྣམས་ལས་མཚམས་འཇོག་རྒྱུ་ཞུས་ཡོད། མཐའ་དོན། ༸སྐྱབས་རྗེ་བདེ་བར་གཤེགས་པ་དེ་ཉིད་ཀྱི་ཐུགས་དགོངས་ཟབ་མོ་ཇི་མཆིས་རྣམས་ཡོངས་སུ་རྫོགས་པ་དང་། སླར་ཡང་བོད་ཀྱི་བསྟན་འགྲོའི་དོན་དུ་ཡང་སྲིད་འཁྲུལ་བྲལ་རིན་པོ་ཆེ་མྱུར་དུ་བྱོན་པའི་སྨོན་འདུན་ཤུགས་དྲག་ཞུ་རྒྱུ་བཅས། བོད་མིའི་སྒྲིག་འཛུགས་བཀའ་ཤག་གིས་ཕྱི་ལོ་ ༢༠༡༨ ཟླ་ ༡༡ ཚེས་ ༢༢ ལ། །
བཀའ་ཤག་གི་ཐུགས་གསོ་གནང་བ།
གསར་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)
འབྲེལ་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)