ཕྱི་ལོ་ ༢༠༡༨ ཟླ་ ༡༡ ཚེས་ ༡༦ རེས་གཟའ་པ་སངས།
༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་རྒྱལ་སའི་མངའ་ཁུལ་ཉིན་མཐའ་མའི་གཞུང་འབྲེལ་ལས་དོན་སྤེལ་སྐབས་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་པེ་ཊིག་ལི་ཧེ་མཆོག་ཐུག་འཕྲད་གནང་ཡོད་འདུག ཁོང་ནི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཐུགས་འདྲིས་ཧ་ཅང་ཆེ་བའི་གྲོགས་པོ་རྙིང་པ་ཞིག་ཡིན་ཞིང་། བོད་དོན་དང་བོད་མིའི་རང་དབང་དང་། འགྲོ་བ་མིའི་ཐོབ་ཐང་སྲུང་སྐྱོབ་ཆེད་རྒྱབ་སྐྱོར་ཤུགས་ཆེ་གནང་མཁན་ཞིག་ཀྱང་ཡིན་འདུག ལྷག་པར་ཁོང་གིས་ལོ་ ༤༤ རིང་ཨ་རིའི་གྲོས་ཚོགས་གོང་འོག་ནང་འགྲོ་བ་མིའི་ཐོབ་ཐང་གི་གནད་དོན་ཐད་ལས་དོན་རྒྱ་ཆེ་སྤེལ་མྱོང་ཡོད་འདུག
དེ་ཡང་མཇལ་འཕྲད་སྐབས་དཔལ་ལྡན་སྲིད་སྐྱོང་མཆོག་གིས་ཁོང་ལ་བོད་མི་དང་བོད་དོན་ཐོག་ཆོད་སེམས་བརྟན་པོས་རྒྱབ་སྐྱོར་ཤུགས་ཆེ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་པ་དང་སྦྲགས། ཉེ་ཆར་ཁོང་གིས་ཨ་རིའི་གྲོས་ཚོགས་གོང་མའི་ནང་བོད་མིའི་འགྲོ་བ་མིའི་ཐོབ་ཐང་དང་། ཆོས་དད་རང་དབང་ཐོག་རྒྱབ་སྐྱོར་གྱི་གྲོས་ཆོད་ཞིག་སྤྱི་མོས་ཐོག་གཏན་འབེབས་གནང་ཡོད། ཁོང་གིས་དཔལ་ལྡན་སྲིད་སྐྱོང་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཕྲོད་བཞེས་དང་། བོད་ནང་ཆབ་སྲིད་དམ་བསྒྲགས་ཀྱི་གནས་སྟངས། དེ་བཞིན་གྲོས་ཚོགས་བརྒྱུད་བོད་དོན་ཐོག་རྒྱབ་སྐྱོར་སྔར་བས་ནུས་ཤུགས་ཆེ་རུ་ཇི་ལྟར་གཏོང་ཐུབ་མིན་གོ་བསྡུར་ལྷུག་པོ་གནང་འདུག
དེ་རྗེས་དཔལ་ལྡན་སྲིད་སྐྱོང་མཆོག་གིས་སྤྱི་མཐུན་དང་མང་གཙོ་ཚོགས་པ་ཐུན་མོང་ལས་གྲུབ་པའི་House Democracy Partnership ཚོགས་གཙོ་མཆོག ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ Peter Roskam མཆོག་དང་སྐུ་ཞབས་ David Price རྣམ་པ་དང་ལྷན་དུ་མཇལ་འཕྲད་ཀྱིས་བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས་དང་། བཙན་བྱོལ་བོད་མིའི་མང་གཙོའི་འཕེལ་རིམ། དེ་བཞིན་བོད་མི་མང་སྤྱི་འཐུས་ལྷན་ཁང་གི་སྒྲོམ་གཞི་དང་ལས་དོན་བྱེད་ཕྱོགས་སོགས་ངོ་སྤྲོད་སྙིང་བསྡུས་གནང་། སྐབས་དེར་ཁོང་རྣམ་གཉིས་ཀྱིས་མ་འོངས་པར་བོད་མི་མང་སྤྱི་འཐུས་ལྷན་ཁང་གི་ལས་དོན་སྤེལ་ཐོག་མཉམ་རུབ་དང་སྐབས་མཚམས་ཕྱར་གྲུ་མཉམ་འདེགས་ཇི་ལྟར་ཐུབ་མིན་སྐོར་གོ་བསྡུར་ལྷུག་པོ་གནང་ཡོད།
དཔལ་ལྡན་སྲིད་སྐྱོང་མཆོག་གིས་དེ་ཉིན་གྱི་ལས་རིམ་མཐའ་མར་བསམ་བློའི་སློབ་སྟོན་བསྟི་གནས་ང་ Hudson Institute ཞེས་པར་མཁས་པ་དང་ཤེས་ལྡན་མི་སྣ་ཁག་གཅིིག་དང་ལྷན་གླེང་སྟེགས་སྒོར་མོའི་ལྷན་ཚོགས་ཤིག་ཚོགས་འདུག
སྤྱིར་བསྟི་གནས་ཁང་དེར་ཉེ་ལམ་སྔ་ཨ་རིའི་སྲིད་འཛིན་གཞོན་པ་སྐུ་ཞབས་མེག་པེན་སི་ Mike Pence མཆོག་གིས་རྒྱ་ནག་གཞུང་ལ་ཨ་རིའི་རྒྱལ་ནང་གི་ཆབ་སྲིད་ཐོག་ཐེ་བྱུས་བྱས་པ་དང་། ཨ་རི་དང་ཚོང་འབྲེལ་བྱེད་སྐབས་དྲང་བདེན་དང་འདྲ་མཉམ་མེད་པའི་སྲིད་བྱུས་ལག་བསྟར་བྱས་པ། དེ་བཞིན་ལྷོ་རྒྱ་ནག་རྒྱ་མཚོའི་ནང་དམག་དོན་རྒྱ་སྐྱེད་ཐོག་སྟོབས་ཤུགས་ངོམས་པ་སོགས་ལ་སྐྱོན་བརྗོད་ཤུགས་ཆེ་གནང་ཡོད་འདུག གླེང་སྟེགས་སྒོར་མོའི་ཚོགས་འདུའི་སྐབས་དེར་ཤེས་ལྡན་མི་སྣ་སོགས་ཀྱིས་བོད་མཐོ་སྒང་གི་གལ་གནད་སྐོར་དང་། བོད་མཐོ་སྒང་ནི་གླིང་ཆེན་ཨེ་ཤེ་ཡའི་ཆུ་མགོ་ཆགས་ཡོད་པའི་སྐོར་དང་། དེ་བཞིན་རྒྱ་ནག་གཞུང་གི་དབང་སྒྱུར་འོག་བོད་ཀྱི་ཆོས་དང་རིག་གཞུང་སོགས་རྩ་མེད་དུ་འགྲོ་བཞིན་པའི་སྐོར། རྒྱ་དཀར་ནག་གཉིས་དང་བོད་བཅས་ཀྱི་ས་མཚམས་རྩོད་རྙོག་དང་། ཨར་རྒྱ་ཡུལ་གཉིས་ཀྱི་འབྲེལ་བ་སོགས་གནད་དོན་མང་པོ་ཞིག་སྐོར་གཏམ་བཤད་དང་དྲི་བ་དྲིས་ལན་སོགས་གནང་ཡོད་འདུག
ཕྱི་ལོ་ ༢༠༡༨ ཟླ་ ༡༡ ཚེས་ ༡༦ རེས་གཟའ་པ་སངས་ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་ཁེ་ན་ཌའི་རྒྱལ་སྤྱིའི་བདེ་འཇག་ལྷན་ཚོགས་Halifax International Security Forum སུ་ཕེབས་རྒྱུ་ཡིན་འདུག་པ་བཅས། །
