༢༠༡༨ ཟླ་ ༡༡ ཚེས་ ༡༦ རེས་གཟའ་པ་སངས།
ལྕམ་སྐུ་ཨི་ལེ་ཡ་ན་རོ་སི་ལེ་ཊི་ནེན་ Ileana Ros-Lehtinen མཆོག་དང་ལྷན།
༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཨ་རིའི་གྲོས་ཚོགས་གོང་འོག་ནང་བོད་དོན་རྒྱབ་སྐྱོར་སྤྱི་དང་། ལྷག་པར་ཨ་རིའི་བོད་དོན་དམིགས་བསལ་འབྲེལ་མཐུད་པ་མགྱོགས་མྱུར་བསྐོ་གཞག་ཡོང་བ་དང་། བོད་ནང་ཕར་འགྲོ་ཚུར་འོང་གི་རང་དབང་སྤྲོད་དགོས་པ། དེ་བཞིན་བོད་མིར་ཨ་རིའི་གཞུང་གིས་རོགས་དངུལ་ཨ་སྒོར་ས་ཡ་གསུམ་བཀའ་འཁྲོལ་ཐོབ་པ་དེ་དག་མགྱོགས་མྱུར་ལག་བསྟར་ཐུབ་ཆེད་དང་། གྲོས་ཚོགས་གོང་འོག་གི་འཐུས་མི་རྣམས་ནས་ད་བར་བོད་མི་དང་བོད་དོན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་གནང་འདུག
དེ་ཡང་ཐེངས་འདིར་སྲིད་སྐྱོང་མཆོག་གིས་ཨ་རིའི་གྲོས་ཚོགས་འོག་མའི་འཐུས་མི་ལྕམ་སྐུ་ཨི་ལེ་ཡ་ན་རོ་སི་ལེ་ཊི་ནེན་ Ileana Ros-Lehtinen མཆོག་དང་མཇལ་འཕྲད་གནང་སྟེ། ད་བར་ལོ་ངོ་སུམ་ཅུ་ཙམ་རིང་ལྕམ་སྐུ་མཆོག་ནས་བོད་མི་དང་བོད་དོན་ལ་རྒྱབ་སྐྱོར་ཤུགས་ཆེ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་པ་དང་སྦྲགས། ཕྱོགས་མཚུངས་ལྕམ་སྐུ་མཆོག་གྲོས་ཚོགས་ཀྱི་འཐུས་མི་ནས་འཕོ་འགྱུར་གནང་རྒྱུ་ཡིན་སྟབས་འབྱུང་འགྱུར་ཕྱག་ལས་ཇི་འདྲ་ཞིག་གནང་ཡང་བྱ་བ་ལམ་ལྷོངས་ཡོང་བ་དང་བོད་མི་དང་བོད་དོན་ནམ་ཡང་མ་རྗེད་པར་རྒྱབ་སྐྱོར་མུ་མཐུད་དགོས་པའི་འབོད་སྐུལ་ཡང་ཞུས་འདུག
གཞན་ཡང་སྲིད་སྐྱོང་མཆོག་གིས་གྲོས་ཚོགས་གོང་མའི་འཐུས་མི་བཅུ་གཅིག་དང་གྲོས་ཚོགས་གོང་མའི་ལས་བྱེད་ཁག་གཅིག་བཅས་དང་ལྷན་གླེང་སྟེགས་སྒོར་མོའི་ལྷན་ཚོགས་ཤིག་ནང་ཕེབས་འདུག སྐབས་དེར་ཨ་རིའི་གྲོས་ཚོགས་བརྒྱུད་བོད་དོན་ཐོག་རྒྱབ་སྐྱོར་མུ་མཐུད་གོང་འཕེལ་གཏོང་རྒྱུའི་གོ་སྐབས་དང་ཐབས་ལམ་ཇི་ཡོད། ཨ་རིའི་གཞུང་གིས་རྒྱ་ནག་ཐོག་འཛིན་པའི་སྲིད་བྱུས་སྐོར་སོགས་བགྲོ་གླེང་ལྷུག་པོ་གནང་འདུག དེ་ཡང་གླེང་སྟེགས་སྒོར་མོའི་ལྷན་ཚོགས་དེ་གོ་སྒྲིག་གནང་མཁན་གྲོས་ཚོགས་གོང་མའི་འཐུས་མི་སྐུ་ཞབས་པེ་ཊིག་ལི་ཧེ་ Patrick Leahy མཆོག་གི་སློབ་སྟོན་པ་ཉི་མ་བྷི་ན་ར་ Nima Binara ལགས་ཡིན་འདུག
དེ་བཞིན་སྲིད་སྐྱོང་མཆོག་གིས་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནེན་སི་པི་ལོ་སི་Leader Nancy Pelosiམཆོག་གི་སློབ་སྟོན་པ་རི་ཝ་པ་ར་ཡི་ཛི་Reva Priceལགས་དང་མཇལ་འཕྲད་གནང་སྟེ་གྲོས་ཚོགས་འཐུས་མི་རྣམས་ཀྱིས་བོད་མིའི་འགྲོ་བ་མིའི་ཐོབ་ཐང་ལ་རྒྱབ་སྐྱོར་ཤུགས་ཆེ་ཇི་ལྟར་གཏོང་རྒྱུས་མཚོན་གནད་དོན་ཁག་གཅིག་ཐོག་གོ་བསྡུར་སྦྱང་བཤད་ལྷུག་པོ་གནང་འདུག
གོ་སྐབས་དང་བསྟུན་སྲིད་སྐྱོང་མཆོག་གིས་ལྕམ་སྐུ་ནེན་སི་པི་ལོ་སི་མཆོག་གིས་ད་བར་བོད་མི་དང་ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཐུགས་ཧ་ཅང་ཉེ་བའི་མཛའ་བརྩེའི་འབྲེལ་ལམ་རྒྱུན་སྐྱོང་ཞུས་ཏེ་བོད་དོན་ཐོག་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞུས་འདུག གཞན་ཡང་དཔལ་ལྡན་སྲིད་སྐྱོང་མཆོག་གིས་ཨ་རིའི་རོགས་རམ་ཐེབས་རྩའི་(USAID)སྐུ་ཚབ་འཐུས་མི་རྣམས་དང་མཇལ་འཕྲད་གནང་སྟེ་རྒྱ་གར་དང་བལ་ཡུལ་གནས་སྡོད་བོད་མི་བཙན་བྱོལ་བ་རྣམས་ཀྱི་ཚོགས་པ་སྒྲིག་འཛུགས་གསར་འཛུགས་དང་ཡར་རྒྱས་ཀྱི་ལས་གཞི་འདྲ་མིན་ལ་དམིགས་ནས་ད་བར་མཐུན་འགྱུར་རོགས་རམ་རྒྱ་ཆེ་གནང་དང་གནང་མུས་ལ་ཐུགས་རྗེ་ཆེ་གསུང་འདུག
དེ་ཡང་ཨ་རིའི་ནང་གི་གཞུང་འབྲེལ་ལས་དོན་རྣམས་ཡོངས་སུ་གྲུབ་རྗེས་དཔལ་ལྡན་སྲིད་སྐྱོང་མཆོག་གིས་ཕྱི་ཚེས་ ༡༦ ཁེ་ན་ཌའི་རྒྱལ་སྤྱིའི་བདེ་འཇག་ལྷན་ཚོགས་Halifax International Security Forumསུ་ཕེབས་རྒྱུ་ཡིན་འདུག་པ་བཅས། །
