ཕྱི་ལོ་ ༢༠༡༨ ཟླ་ ༡༡ ཚེས་ ༢༤ རེས་གཟའ་སྤེན་པ།

༄༅། །ཕྱི་ལོ་ ༢༠༡༨ ཟླ་ ༡༡ ཚེས་ ༢༢ ཉིན་ཨ་རི་ནེའུ་ཡོག་དང་ནེའུ་ཇར་སི་བོད་རིགས་སྤྱི་མཐུན་ཚོགས་པའི་ཆོལ་གསུམ་ཟློས་གར་དབུ་བརྙེས་ནས་ལོ་ངོ་ ༢༥ འཁོར་བའི་དུས་དྲན་དང་སྟབས་བསྟུན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ལ་ཨ་རི་ནེའུ་ཡོག་དང་ནེའུ་ཇར་སི་བོད་རིགས་སྤྱི་མཐུན་ཚོགས་པས་ཐུགས་རྗེ་ཆེ་ཞུའི་ཆེ་བསྟོད་ཀྱི་གཟེངས་རྟགས་ཤིག་ཕུལ་འདུག
སྐབས་དེར་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན། ཕྲན་རང་ད་རེས་ཉིན་གྲངས་ ༢༦ རིང་གྲོང་ཁྱེར་ཁག་ ༡༢ ནང་གཞུང་འབྲེལ་ཕྱོགས་བསྐྱོད་བྱེད་བཞིན་ཡོད། ས་གནས་གང་དུ་ཕྱིན་པ་ཡིན་ནའང་མི་མང་གི་རྒྱབ་སྐྱོར་དང་གོ་རྟོགས་སྤེལ་རྒྱུ་སོགས་གང་ཅིའི་ཐད་ཡག་ཐག་གཅོད་བྱུང་སོང་།

ཕྱི་ལོ་ ༢༠༡༨ ཟླ་ ༡༠ ཚེས་ ༢༩ ཉིན་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱལ་སྤྱིའི་བསྟི་གནས་ཁང་ IIC དུ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ནས་ལོ་རྒྱུས་ཐོག་བོད་རྒྱ་ནག་གི་ཆ་ཤས་ནམ་ཡང་མིན། འོན་ཀྱང་བོད་ཀྱི་གནད་དོན་གསལ་བའི་ཐབས་ལམ་ཉག་གཅིག་ནི་དབུ་མའི་ལམ་གྱི་སྲིད་བྱུས་འདི་ཉིད་ཡིན། ཞེས་པའི་དཔེ་དེབ་དབུ་འབྱེད་གནང་དེབ་འདིའི་ནང་རང་ལུས་མེར་སྲེག་སྐོར་དང་། རྒྱལ་རབས་ལོ་རྒྱུས། འགྲོ་བ་མིའི་ཐོབ་ཐང་གི་གནས་སྟངས། བོད་མིའི་རིག་གཞུང་རྩ་མེད་བཟོས་པའི་གནས་སྟངས། དཔལ་འབྱོར་དང་ཁོར་ཡུག དབུ་མའི་ལམ་སྐོར་སོགས་དོན་ཚན་དགུ་ཙམ་ཡོད། ཨིན་ཡིག་ཐོག་ཕལ་ཆེར་ཤོག་གྲངས་ ༢༢༥ ཡོད། བོད་ཡིག་ཐོག་ཤོག་གྲངས་ ༣༠༠ ལྷག་ཙམ་ཆགས་ཀྱི་འདུག དེབ་འདི་ཧ་ཅང་གནད་འགག་ཆེན་པོ་རེད། འབྱུང་འགྱུར་ལོ་བཅུའི་ནང་དེབ་འདི་སྐད་ཡིག་འདྲ་མིན་ཐོག་བསྒྲུར་ནས་གང་མང་པར་འགྲེམས་བྱ་རྒྱུ་རེད།

ཉེ་ཆར་ཇི་ནི་ཝར་འཛམ་གླིང་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་དུས་བཀག་བསྐྱར་ཞིབ་ཐེངས་གསུམ་པ་གནང་ཡོད། སྐབས་དེར་འཛམ་གླིང་རྒྱལ་ཁབ་འདྲ་མིན་ཁག་ ༡༤༠ སྐུ་ཚབ་མཉམ་ཞུགས་གནང་ཡོད།
རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་དུས་བཀག་བསྐྱར་ཞིབ་ཐེངས་གསུམ་པའི་སྐབས་དེར་འཛམ་གླིང་རྒྱལ་ཁབ་བཅུ་གསུམ་གྱིས་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ལ་རྒྱབ་སྐྱོར་ཐོབ་པ་དང་། སེམས་འཚབ་ཀྱི་རྣམ་པ་ཤུགས་ཆེ་བཏོན་འདུག རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་དུས་བཀག་བསྐྱར་ཞིབ་ཐེངས་གསུམ་པ་ཚོགས་པའི་སྐབས་རྒྱ་ནག་གཞུང་གི་བློན་ཆེན་གཞོན་པ་དང་། སྐུ་ཚབ། ལས་བྱེད་སོགས་ཁྱོན་མི་གྲངས་ ༦༠ ཙམ་སླེབས་ནས་གནོན་ཤུགས་འདྲ་མིན་སྣ་ཚོགས་སྤྲད་ཡོད། འོན་ཀྱང་གནོན་ཤུགས་ཇི་ཙམ་སྤྲད་ཀྱང་བོད་མིར་བདེན་པ་ཡོད་པའི་དཔང་རྟགས་དེ་སུབ་ཐུབ་ཀྱི་མེད།

དེ་བཞིན་ཉེ་ཆར་སི་པན་ Spain གྱི་གྲོང་ཁྱེར་མེཌ་རིཌ་ Madrid ནང་གྲོང་སྡེ་སྤྱི་ཁྱབ་པ་མཆོག་གིས་ཕྲན་ལ་འགྲོན་འབོད་གནང་བ་ལྟར། ས་ཁུལ་དེར་རྒྱལ་སྤྱིའི་ཚོང་འདུས་ལྷན་ཚོགས་ཀྱི་དབུ་འབྱེད་མཛད་སྒོར་མཉམ་ཞུགས་བྱེད་རྒྱུ་བྱུང་བར་བརྟེན། རྒྱ་ནག་གི་ཚོང་འབྲེལ་སྐུ་ཚབ་ལྷན་ཚོགས་དེ་ནས་ཕྱིར་འཐེན་བྱས་དགོས་བྱུང་བ་དང་རྗེས་སུ་གཏམ་བཤད་བྱེད་རྒྱུའི་ཐད་གནོན་ཤུགས་སྤྲད་ཡོད། སྐབས་དེར་བོད་མི་མང་ཡུ་རོབ་སྤྱི་འཐུས་དགེ་བཤེས་ཐུབ་བསྟན་དབང་ཆེན་ལགས་ཀྱང་ལྷན་དུ་ཕེབས་ཡོད་པ་ཙམ་མ་ཟད་གསུང་བཤད་ཀྱང་གནང་ཐུབ་ཡོད། ཅེས་དང་།

ལྷག་པར་བོད་རིགས་ནང་ཁུལ་རྙོག་གྲ་ཆུང་ཙག་རིགས་ལ་མགོ་འཁོར་ནས་མ་བསྡད་པར་བོད་མི་ནང་ཁུལ་དམ་ཚིག་རྡོག་རྩ་གཅིག་སྒྲིལ་ཐོག་ནས་བོད་མིའི་བདེན་དོན་འཐབ་རྩོད་ཐོག་ནུས་པ་མཉམ་སྤུངས་བྱེད་དགོས་པ་སོགས་ཀྱི་གསུང་བཤད་གནང་ཡོད་པ་བཅས། །