ཕྱི་ལོ་ ༢༠༡༨ ཟླ་ ༡༡ ཚེས་༢༢ རེས་གཟའ་ཕུར་བུ།
༄༅། །ཕྱི་ལོ་ ༢༠༡༨ ཟླ་ ༡༡ ཚེས་ ༢༠ ཉིན་གྱི་ཉིན་རྒྱབ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཁེ་ན་ཌའི་མངའ་སྡེ་ཨལ་བྷར་ཌའི་ Alberta གྲོང་ཁྱེར་ཀལ་གྷ་རིའི་ Calgary ནང་ཕེབས་འབྱོར་གྱིས་ཁུལ་དེའི་གསར་འགྱུར་ཚན་པའི་བཅར་འདྲི་ལ་དང་ལེན་གནང་སྟེ་ད་ལྟའི་བོད་ནང་གི་གནས་སྟངས་སྤྱིའི་སྐོར་འགྲེལ་བརྗོད་གནང་ཡོད་པ་དང་། ཉིན་དེའི་དགོང་དྲོ་དཔལ་ལྡན་སྲིད་སྐྱོང་མཆོག་དང་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིགས་ལགས་རྣམ་གཉིས་ཀྱིས་ཨལ་བྷར་ཌའི་ཁུལ་གྱི་བོད་རིགས་ལྔ་བརྒྱ་ཙམ་ལ་གསུང་བཤད་གནང་ཡོད།
དེ་ཡང་དཔལ་ལྡན་སྲིད་སྐྱོང་མཆོག་གིས། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་། བོད་མིའི་སྒྲིག་འཛུགས། ལྷག་པར་ཁེ་ན་ཌའི་མི་སེར་དང་གཞིས་སྤོ། སྣ་མང་རིག་གཞུང་གི་བློན་ཆེན་ཟུར་པ་Jason Kenney, former Minister for Citizenship, Immigration and Multiculturalism of Canada འཇའ་སན་ཀེན་ནེ་Jason Kenney ལགས་བཅས་ཀྱི་ཐུགས་རྗེ་བཀའ་དྲིན་ལ་བརྟེན་ནས་གྲོང་ཁྱེར་ཀལ་གྷ་རིའི་ནང་རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་ནང་གནས་སྡོད་བོད་མི་ཆིག་སྟོང་ཙམ་གཞིས་སྤོ་གནང་ཐུབ་ཡོད། ཅེས་དྲན་གསོའི་ཚུལ་དུ་གསུང་།
ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་ཨ་རུ་ན་ཅལ་མངའ་སྡེའི་ཁུལ་ནས་གསར་དུ་ཕེབས་པའི་བོད་རིགས་སྤུན་ཟླ་ཚོས་ཁེ་ན་ཌའི་ནང་གཞིས་སྤོ་གནང་དགོས་པའི་རྒྱུ་མཚན་ཅི་ཡིན་ཤེས་པའི་ཐོག་ས་གནས་བོད་རིགས་སྤྱི་མཐུན་ཚོགས་པ་དང་། ཨལ་བྷར་ཌ་བོད་རིགས་སྤྱི་མཐུན་ཚོགས་པ་དང་མཉམ་རུབ་ཀྱིས་བོད་ཀྱི་ཆོས་དང་རིག་གཞུང་། སྐད་ཡིག་སོགས་མི་ཉམས་རྒྱུན་འཛིན་བྱེད་དགོས་པ་དང་། དེ་བཞིན་བོད་རིགས་ནང་ཁུལ་ལ་མཐུན་སྒྲིལ་བྱེད་དགོས་པའི་རེ་འདུན་བཏོན།
གཞན་ཡང་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས། ཁེ་ན་ཌའི་ཨོན་ཊེ་རིའོ་ Ontario མངའ་སྡེའི་རྒྱལ་ས་ཊོ་རོན་ཊོའི་ Toronto ནང་རྟེན་གཞི་བྱས་པའི་ཊོ་རོན་ཊོའི་མཐོ་སློབ་ཁང་ University of Toronto དུ་གསུང་བཤད་གནང་སྐབས་རྒྱ་མིའི་སློབ་ཕྲུག་ཚོས་ངོ་རྒོལ་གྱིས་བོད་དོན་དང་འབྲེལ་བའི་སྐོར་དྲི་བ་དྲིས་ཡོད་པ་དང་། སྐབས་དེར་དཔལ་ལྡན་སྲིད་སྐྱོང་མཆོག་གིས་དྲི་བ་རེ་རེ་ལ་ལན་འདེབས་གནང་རྗེས་རྒྱ་རིགས་སློབ་ཕྲུག་ཚོས་དགའ་མོས་གནང་ཡོད་པའི་སྐོར་དང་། ཕྱི་རྒྱལ་དུ་ཡོད་པའི་བོད་རིགས་སྤུན་ཟླ་ཚོ་དང་། ལྷག་པར་གཞོན་སྐྱེས་རྣམ་པ་ཚོས་བོད་རྒྱ་གཉིས་ཀྱི་ལོ་རྒྱུས་ལ་སློབ་སྦྱོང་བྱེད་རྒྱུ་གལ་ཆེན་པོ་ཡིན་སྐོར་དང་། དེ་བཞིན་རྒྱ་རིགས་རྣམས་ལ་གོ་རྟོགས་སྤེལ་རྒྱུ་གལ་ཆེན་པོ་ཡིན་པའི་སྐོར་གསུང་།
དེ་བཞིན་དཔལ་ལྡན་སྲིད་སྐྱོང་མཆོག་གིས། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དགུང་ལོ་བགྲེས་པོ་ཆགས་ཡོད་སྟབས་ཕྱི་རྒྱལ་ཡུལ་གྲུ་ཁག་ཏུ་ཆིབས་སྒྱུར་གནང་རྒྱུའི་མཛད་རིམ་ཁག་ཉུང་དུ་མཛད་ཡོད་པའི་སྐོར་དང་། བོད་ནང་གི་བོད་མི་ཚོས་རང་ལུས་མེར་སྲེག་མུ་མཐུད་གནང་བཞིན་པའི་སྐོར། རང་དབང་ལུང་པར་ཡོད་པའི་བཙན་བྱོལ་བོད་རིགས་སྤུན་ཟླ་ཚོས་བོད་དོན་ལས་འགུལ་གང་ཐུབ་སྤེལ་དགོས་པ་སོགས་ཀྱི་སྐོར་གསུངས་།
བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་བོད་མིའི་སྒྲིག་འཛུགས་ཀྱི་བཀའ་དྲིན་བརྗེད་མི་རུང་བ་དང་། རང་ཉིད་བོད་མི་ཡིན་པ་དེ་བརྗེད་མི་རུང་བ་བཅས་བརྗེད་མི་རུང་བ་གསུམ་གྱི་སྐོར་གསུང་བཤད་གནང་ཡོད་པ་བཅས། །
