ཕྱི་ལོ་ ༢༠༡༨ ཟླ་ ༡༡ ཚེས་༢༣ རེས་གཟའ་པ་སངས།
༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༡༡ ཚེས་ ༡༨ ཉིན་ཕྱི་དྲོ་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་སྦེལ་ཇམ་ Belgium རྒྱལ་ས་སྦར་སིལ་ Brussels དུ་ཕེབས་འབྱོར་གནང་ཡོད་པ་དང་། སྐབས་དེར་སྦར་སིལ་སྐུ་ཚབ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་། དོན་གཅོད་ལས་བྱེད། དེ་བཞིན་ས་གནས་བོད་རིགས་ཚོགས་པའི་འགོ་འཁྲིད་རྣམས་ནས་ཕེབས་བསུའི་སྣེ་ལེན་ཞུས་གནང་ཡོད་འདུག
དེ་ཡང་དཔལ་ལྡན་ཚོགས་གཙོ་མཆོག་གིས་མཛད་རིམ་གྱི་ཉིན་དང་པོར་ཐོག་མར་ཕི་ལེ་མིཤ་གྲོས་ཚོགས་ཀྱི་ཚོགས་གཙོ་སྐུ་ཞབས་ཇན་པེའུ་མན་སི་ Jan Peumans, Speaker of the Flemish Parliament མཆོག་དང་། སྦེལ་ཇམ་གྲོས་ཚོགས་འཐུས་མི་ལྕམ་སྐུ་ སེ་བྷི་ན་ དི་ བྷི་ཐུ་ནི་ Senator Ms Sabrina de Bethune མཆོག་རྣམ་གཉིས་དང་སོ་སོར་མཇལ་འཕྲད་གནང་ཡོད་པ་དང་།
དེ་ནས་རིམ་པས་ཡུ་རོབ་གྲོས་ཚོགས་སུ་དཔལ་ལྡན་ཚོགས་གཙོ་མཆོག་གིས་ཡུ་རོབ་གྲོས་ཚོགས་འཐུས་མི་སྐུ་ཞབས་ཀ་ལའོ་ས་ བྷུ་ཆ་ནར་ MEP Klaus Buchner, from Germany མཆོག་དང་། གྲོས་ཚོགས་འཐུས་མི་ལྕམ་སྐུ་མོ་ལེ་ སི་ཀོཌ་ཀེ་ཏོ་MEP Molly Scott-Cato, UK མཆོག གྲོས་ཚོགས་འཐུས་མི་ལྕམ་སྐུ་ལའེ་མ་ ཨན་ཌི་རི་ཀིན་ MEP Laima Andrikiene, Lithuania མཆོག གྲོས་ཚོགས་འཐུས་མི་སྐུ་ཞབས་ཁེ་རི་ས་ཊན་ ཌན་ པི་རི་ཌ་ MEP Christian Dan Preda, Romania མཆོག གྲོས་ཚོགས་འཐུས་མི་སྐུ་ཞབས་ཊོ་མ་སི་ MEP Tomas Dzechovsky, Czech Republic མཆོག གྲོས་ཚོགས་འཐུས་མི་སྐུ་ཞབས་ཐོ་མ་སི་ མན་ MEP Thomas Mann མཆོག གྲོས་ཚོགས་འཐུས་མི་སྐུ་ཞབས་ར་མོན་ ཊི་མོ་ས་ MEP Ramon Tremosa མཆོག་དང་། གྲོས་ཚོགས་འཐུས་མི་སྐུ་ཞབས་ས་བྷ་སོ་གོར་ MEP Csaba Sogor མཆོག་བཅས་ཡུ་རོབ་གྲོས་ཚོགས་འཐུས་མི་བརྒྱད་དང་མཇལ་འཕྲད་གནང་ཡོད་འདུག
མཇལ་འཕྲད་སྐབས་དཔལ་ལྡན་ཚོགས་གཙོ་མཆོག་གིས་བོད་ནང་རྒྱ་ནག་གཞུང་གིས་བོད་མིའི་སྨྲ་བརྗོད་རང་དབང་དང་། བསམ་བློའི་རང་དབང་། འདུ་འཛོམས་རང་དབང་། ཆོས་དད་རང་དབང་སོགས་གཞི་རྩའི་འགྲོ་བ་མིའི་ཐོབ་ཐང་ཁག་རྡོག་རོལ་གཏོང་བཞིན་ཡོད་སྐོར་དང་། བོད་ནང་རང་བྱུང་གཏེར་ཁ་གང་བྱུང་ཚད་མེད་བསྔོག་བཏོན་དང་། རྒྱུགས་ཆུ་ཁག་ལ་ཆུ་མཛོད་བརྒྱབ་པ། བོད་ནས་བལ་ཡུལ་བར་མེ་འཁོར་ལྕགས་ལམ་འཛུགས་བསྐྲུན་གྱི་ལས་འཆར་དང་། ཁྲེན་ཏུ་ནས་ལྷ་ས་བར་ལྕགས་ལམ་གསར་རྒྱག་ལས་འཆར་སོགས་ཀྱིས་བོད་ཀྱི་ཁོར་ཡུག་ལ་གནོད་འཚེ་ཚབས་ཆེན་བཟོ་བཞིན་ཡོད་པའི་སྐོར། དེ་བཞིན་བོད་ནང་བོད་མི་རྣམས་ཀྱིས་རང་ལུས་མེར་བསྲེགས་ཕུལ་བཞིན་ཡོད་སྐོར་སོགས་བོད་ནང་གི་ཛ་དྲག་གནས་སྟངས་དང་། རྗེས་ལོར་བོད་མི་རྣམས་རྒྱ་གར་བཙན་བྱོལ་དུ་འབྱོར་ནས་ལོ་ངོ་ ༦༠ འཁོར་བཞིན་ཡོད་པ་བཅས་ཀྱི་ཐོག་གསུངས་གནང་ཡོད་པ་མ་ཟད། དབུ་མའི་ལམ་གྱི་ཐོག་ནས་རྒྱ་ནག་གཞུང་དང་ལྷན་གྲོས་མོལ་བརྒྱུད་བོད་ཀྱི་གནད་དོན་སེལ་རྒྱུར་མུ་མཐུད་སྔར་ལྷག་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་གནང་ཡོད་འདུག
གྲོས་ཚོགས་འཐུས་མི་རྣམ་པས་ཁོང་རྣམས་སྔོན་མ་ནས་བོད་ཀྱི་གནད་དོན་ཐོག་ཐུགས་འཁུར་ཆེན་པོ་གནང་བཞིན་ཡོད་གནས་དང་། འབྱུང་འགྱུར་ཡང་བོད་དོན་ཐོག་མུ་མཐུད་རྒྱབ་སྐྱོར་གནང་རྒྱུ་ཡིན་པའི་ཞལ་བཞེས་དང་། ཁོང་རྣམས་མང་ཆེ་བས་བོད་དང་བོད་མིའི་གནད་དོན་ལ་རྒྱབ་སྐྱོར་གནང་བར་བརྟེན་རྒྱ་ནག་གཞུང་གིས་གནོན་ཤུགས་སྤྲད་པའི་ཉམས་མྱོང་སྐོར་དང་། ཡང་ཁག་ཅིག་གིས་རྒྱ་ནག་དབང་འཛིན་པ་ཚོས་ཁོང་རྣམས་ཀྱི་མིང་གཞུང་ནག་པོའི་ནང་བཀོད་དེ་ཁོང་རྣམས་ཀྱི་བུ་ཕྲུག་རྒྱ་ནག་ལ་འགྲོ་རྒྱུའི་མཐོང་མཆན་མི་སྤྲད་པ་སོགས་བྱས་པའི་སྐོར་གསུངས་གནང་ཡོད་པ་དང་།
དེ་བཞིན་རྒྱ་ནག་གཞུང་གིས་རྒྱལ་སྤྱིའི་ནང་མངོན་གསལ་དོད་པོས་གནོན་ཤུགས་སྤྲད་བཞིན་ཡོད་པའི་ཞིབ་ཕྲའི་གནས་ཚུལ་དང་། རྒྱལ་སྤྱིའི་ནང་རྒྱ་ནག་གཞུང་གི་གནོན་ཤུགས་ལ་གདོང་ལེན་བྱེད་བཞིན་ཡོད་པའི་རྣམ་པ་གསལ་པོ་ཡིན་སྐོར་སོགས་གྲོས་བསྡུར་ལྷུག་པོ་གནང་ཡོད་པ་དང་། ཁོང་རྣམས་ཚང་མས་བོད་ཀྱི་གནད་དོན་མགྱོགས་མྱུར་སེལ་བའི་སྨོན་འདུན་དང་། ཁོང་རྣམས་ཀྱི་ངོས་ནས་བོད་དོན་ཐོག་མུ་མཐུད་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད་འདུག
སྦེར་སིལ་ཁུལ་གྱི་གྲོས་ཚོགས་འཐུས་མི་སོགས་མཇལ་འཕྲད་ཀྱི་མཛད་རིམ་ཁག་ལེགས་པར་གྲུབ་རྗེས། ཕྱི་ཚེས་ ༢༡ ཉིན་དཔལ་ལྡན་ཚོགས་གཙོ་མཆོག་ཕ་རན་སི་རྒྱལ་ས་པེ་རི་སི་ Paris ལ་ཕེབས་འབྱོར་གནང་ཡོད་པ་དང་། སྐབས་དེར་ཕ་རན་སི་འབྲེལ་མཐུད་པ་རྣམ་རྒྱལ་བསམ་གྲུབ་ལགས་དང་། ས་གནས་བོད་རིགས་ཚོགས་པའི་འགོ་འཁྲིད་བཅས་ནས་ཕེབས་བསུའི་སྣེ་ལེན་ཞུས་གནང་ཡོད་འདུག
ཕ་རན་སི་རྒྱལ་ས་པེ་རི་སིར་དཔལ་ལྡན་ཚོགས་གཙོ་མཆོག་དང་ལྷན་སྦར་སིལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་། དོན་གཅོད་ལས་བྱེད་བཅས་ཕེབས་གནང་ཡོད་པ་དང་། པེ་རི་སི་ཁུལ་དུ་དཔལ་ལྡན་ཚོགས་གཙོ་མཆོག་ནས་གྲོས་ཚོགས་གོང་འོག་གཉིས་ཀྱི་བོད་དོན་རྒྱབ་སྐྱོར་ཚོགས་པའི་འཐུས་མི་ཁག་དང་མཇལ་འཕྲད་གནང་རྒྱུ་ཡིན་པ་བཅས། །
