ཕྱི་ལོ་ ༢༠༡༨ ཟླ་ ༡༡ ཚེས་ ༢༣ རེས་གཟའ་ས་པངས།

༄༅། །ཕྱི་ལོ་ ༢༠༡༨ ཟླ་ ༡༡ ཚེས་ ༢༢ རེས་གཟའ་ཕུར་བུ་ཉིན་ཧིན་བོད་མཛའ་འབྲེལ་ཚོགས་པའི་གོ་སྒྲིག་འོག་རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་མོན་རྟ་དབང་དུ་ཡོད་པའི་ཀ་ལ་དབང་པོའི་ཚོགས་ཁང་དུ་ Strong and Secured Border: A Way to Developed and Cultured India ཞེས་པའི་བགྲོ་གླེང་ལྷན་ཚོགས་སུ་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་ལྷན་ཞུགས་ཀྱིས་གསུང་བཤད་གནང་ཡོད།
དེ་ཡང་སྐུ་མགྲོན་གཙོ་བོ་རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་ནང་སྲིད་བློན་ཆེན་སྐུ་ཞབས་ཀུ་མར་ཝ་ཡེ་མཆོག་ Shri Kumar Waii, Hon’ble Home Minister of Arunachal Pradesh  དང་། ཧིན་བོད་མཛའ་འབྲེལ་ཚོགས་པའི་གཙོ་འཛིན་སྐུ་ཞབས་ཨིན་དེ་རེཤ་ཀུ་མར Indresh Kumar ལགས། རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་རིན་ཆེན་མཁའ་འགྲོ་ལགས། Shri R. K. Khrimey ཨ་རུ་ན་ཅལ་མངའ་སྡེའི་བློན་ཆེན་ཟུར་པ་སྐུ་ཞབས་ཚེ་རིང་འགྱུར་མེད་ལགས་དང་།  དི་ཀེ་མཐོང་མདོག་ལགས། D.K. Thongdok ནཱ་རེཤ་གུ་ལོ་ལགས།  Naresh Glow དགེ་བཤེས་ཀུན་ཕན་ལགས།  Geshe Kunphen ལགས། གཞན་ཡང་གནད་ཡོད་མི་སྣ་དང་བོད་དོན་གོམ་བགྲོད་ལས་འགུལ་བ་ ༡༠༠ ཙམ་མཉམ་ཞུགས་གནང་ཡོད།

སྐབས་དེར་དཔལ་འབྱོར་བཀའ་བློན་མཆོག་གིས་ཕྱི་ལོ་ ༡༩༥༩ གོང་ལ་འཕགས་བོད་གཉིས་དབར་ས་མཚམས་ཀྱི་དཀའ་ངལ་གང་ཡང་མེད་སྐོར་དང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་ངོ་སྤྲོད་དང་དེ་དག་ལག་བསྟར་ཞུ་དགོས་སྐོར་དྲན་སྐུལ་ཡང་གནང་ཡོད་པ་མ་ཟད། བོད་ཀྱི་གནད་དོན་དེ་བཞིན་བོད་མི་ཙམ་མིན་པར་འཛམ་གླིང་སྤྱི་ཡོངས་དང་། ལྷག་པར་གླིང་ཆེན་ཨེ་ཤི་ཡའི་ཁོར་ཡུག་དང་འབྲེལ་བ་ཆེན་པོ་ཆགས་ཀྱི་ཡོད་སྐོར་དང་། དེ་བཞིན་བོད་མིའི་སྒྲིག་འཛུགས་ནས་ཕྱི་ལོ་ ༢༠༡༨ ལོ་འདི་བཞིན་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་ལོར་སྲུང་བརྩི་ཞུ་བཞིན་ཡོད་པ་ལྟར། བོད་མིའི་སྒྲིག་འཛུགས་དང་། བོད་མི་ཡོངས་ཀྱི་ཚབ་བྱས་ཏེ་རྒྱ་གར་གཞུང་མང་གཉིས་ནས་ད་བར་བོད་དོན་དང་བོད་མིར་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞུས་གནང་ཡོད། 

དེ་རྗེས་ཨ་རུ་ན་ཅལ་མངའ་སྡེའི་ནང་སྲིད་བློན་ཆེན་སྐུ་ཞབས་ཀུ་མར་ཝ་ཡེ་མཆོག་གིས་དེ་སྔ་ཨ་རུ་ན་ཅལ་དང་བོད་དབར་ས་མཚམས་བཀག་འགོག་མེད་པར་ཚོང་འབྲེལ་བྱེད་སྲོལ་ཡོད་སྐོར་དང་། ས་གནས་ཀྱི་ཡུལ་མི་རྣམས་བོད་དུ་ཚ་ཉོ་རུ་འགྲོ་གི་ཡོད་སྐོར་སོགས་ཀྱི་གསུང་བཤད་གནང་མཚམས། སྐུ་ཞབས་ཨིན་དེ་རེཤ་ཀུ་མར་མཆོག་གིས་ད་ཆ་རྒྱ་བོད་ཀྱི་ས་མཚམས་ཀྱི་སྲུང་སྐྱོབ་ཐད་འགྲོ་གྲོན་ཕོན་ཆེར་བཏང་དང་གཏོང་མུས་ཡིན་སྐོར་སོགས་ཀྱི་གསུང་བཤད་གནང་ཡོད།

བགྲོ་གླེང་ལྷན་ཚོགས་གྲུབ་རྗེས་བཀའ་བློན་ཀརྨ་ཡེ་ཤེས་མཆོག་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་སྐུ་ཞབས་རྡོ་རྗེ་མཁའ་འགྲོ་མཆོག་གི་དྲན་རྟེན་འགྲེམས་སྟོན་ཁང་དུ་ཕེབས་ཡོད་པ་བཅས། །