ཕྱི་ལོ་ ༢༠༡༨ ཟླ་ ༡༡ ཚེས་ ༢༢ རེས་གཟའ་ཕུར་བུ།

༄༅། །དཔལ་གསང་ཆེན་སྔ་འགྱུར་རྙིང་མའི་དབུ་འཛིན་ཁྲི་རབས་བདུན་པ་༸སྐྱབས་རྗེ་ཀཿཐོག་དགེ་རྩེ་རིན་པོ་ཆེ་འགྱུར་མེད་བསྟན་པ་རྒྱལ་མཚན་མཆོག་ཕྱི་ལོ་ ༢༠༡༨ ཟླ་ ༡༡ ཚེས་ ༡༩ རེས་གཟའ་ཟླ་བ་ཉིན་དགོངས་པ་ཆོས་དབྱིངས་སུ་ཐིམ་པའི་ཡིད་སྐྱོའི་གནས་ཚུལ་བྱུང་བར་བཀའ་ཤག་ལྷན་རྒྱས་ཐུགས་ཕམ་ཆེན་པོ་དང་བཅས་ཏེ་སྐུ་ཞི་བར་གཤེགས་པ་ྋསྐྱབས་རྗེ་ཀཿཐོག་དགེ་རྩེ་རིན་པོ་ཆེ་མཆོག་གང་གི་ཐུགས་ཀྱི་བཞེད་དགོངས་མཐའ་དག་ཡོངས་སུ་རྫོགས་པ་དང་། སླར་ཡང་བསྟན་པ་དང་འགྲོ་བའི་དོན་དུ་ཡང་སྲིད་འཁྲུལ་བྲལ་མྱུར་དུ་བྱོན་ཕྱིར་བོད་མིའི་སྒྲིག་འཛུགས་ཀྱི་འགོ་ལས་ཡོངས་ནས་ཕྱི་ལོ་ ༢༠༡༨ ཟླ་ ༡༡  ཚེས་ ༢༢ ཉིན་གུང་ཆུ་ཚོད་ ༡༢ ཐོག་གངས་སྐྱིད་ཚོགས་ཁང་གསར་པའི་ནང་བོད་མིའི་སྒྲིག་འཛུགས་ཀྱི་མང་གཙོ་ཀ་བ་གསུམ་གྱི་མཛད་གཙོ་རྣམ་པས་དབུས་བོད་མི་མང་སྤྱི་འཐུས་རྒྱུན་ལས་རྣམ་པ་དང་། ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཐོག་སྨོན་ལམ་གསུང་འདོན་ཞུས་མུར་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་གསུང་བཤད་གནང་དོན།

སྐྱབས་གནས་དགེ་འདུན་གྱི་སྡེ། བོད་མིའི་སྒྲིག་འཛུགས་ཀྱི་མང་གཙོ་ཀ་བ་གསུམ་གྱི་མཛད་གཙོ་རྣམ་པས་དབུས་སྲི་ཞུའི་ལས་བྱེད་རྣམ་པ་དེ་རིང་འདིར་གཞུང་འབྲེལ་མཆོད་འབུལ་སྨོན་ལམ་ཚོགས་དགོས་པའི་རྒྱུ་མཚན་མང་ཆེ་བས་གསན་ཡོད་རེད། སྔ་འགྱུར་རྙིང་མའི་དབུ་འཛིན་ཁྲི་རབས་བདུན་པ་༸སྐྱབས་རྗེ་ཀཿཐོག་དགེ་རྩེ་རིན་པོ་ཆེ་འགྱུར་མེད་བསྟན་པ་རྒྱལ་མཚན་མཆོག་རེས་གཟའ་ཟླ་བ་ཉིན་བལ་ཡུལ་དུ་གློ་བུར་དགོངས་པ་གཞན་དོན་དུ་གཤེགས་པའི་ཧ་ཅང་བློ་ཕམ་དང་ཡིད་སྐྱོའི་གནས་ཚུལ་བྱུང་འདུག དེར་བརྟེན་དེ་རིང་གི་སྨོན་ལམ་འདིའི་ཐོག་ནས་བོད་མིའི་སྒྲིག་འཛུགས་མ་ལག་དང་བཅས་པའི་ཚབ་ཞུས་ཏེ་མྱ་ངན་གུས་འདུད་ཞུ་རྒྱུ་དང་། དེ་བཞིན་༸སྐྱབས་རྗེ་དམ་པ་ཁོང་གིས་བླ་བྲང་ཞབས་འབྲིང་པ་རྣམ་པ། སྐུ་ཉེ་ལྟོས་བཅས། དེ་བཞིན་ཕྱི་ནང་དང་གཞིས་བྱེས་གཉིས་སུ་ཡོད་པའི་ཞལ་སློབ། དེ་དང་ཆབས་ཅིག་སྔ་འགྱུར་རྙིང་མའི་འདུས་སྡེ་ཡོངས་ཀྱི་བླ་གྲྭ་སྔགས་གསུམ་ཡོངས་ལ་བོད་མིའི་སྒྲིག་འཛུགས་ངོས་ནས་སྙིང་ཐག་པ་ནས་ཐུགས་གསོ་གཏིང་ཟབ་ཞུ་ཡི་ཡོད། ཅེས་ཞུ་རྒྱུ་ཡིན།

དགོངས་པ་རྫོགས་སྟངས་སྐོར་འདས་མཆོད་གོ་སྒྲིག་ཚོགས་ཆུང་དང་དགོན་པ་ཁག་བཞི་ཙམ་མཉམ་དུ་ཡིག་ཐོག་བཟོས་པ་ཞིག་འདུག་པ་དེ་སྙན་སྒྲོན་ཞུ་ཆོག་པ་ཞུ་རྒྱུ་ཡིན།དཔལ་གསང་ཆེན་སྔ་འགྱུར་རྙིང་མའི་དབུ་འཛིན་ཁྲི་རབས་བདུན་པ་༸སྐྱབས་རྗེ་ཀཿཐོག་དགེ་རྩེ་རིན་པོ་ཆེ་འགྱུར་མེད་བསྟན་པ་རྒྱལ་མཚན་མཆོག་དགུང་སྙིང་རྟ་ཕྱི་ལོ་ ༡༩༥༤ བོད་ཟལ་དགུ་པའི་བོད་ཚེས་ ༢༢ ཉིན་མདོ་སྨད་མགོ་ལོག་ཏུ་སྐུ་འཁྲུངས་ཤིང་། དེ་ཡང་བོད་མིའི་སྒྲི་གའཛུགས་ཀྱི་ཆོས་རིག་ལས་ཁུངས་ནས་བཀོད་ཁྱབ་འོག་བཞུགས་སྒར་དུ་ཆོས་ཚོགས་ཐེངས་བཅུ་གསུམ་པ་བསྐྱང་གཏན་འཁེལ་བ་ལྟར་བོད་རབ་བྱུང་བཅུ་བདུན་པའི་ས་ཁྱི་སྨིན་དྲུག་ཟླ་བའི་དཀར་ཕྱོགས་དགའ་བ་གསུམ་པ་སྟེ། སྤྱི་ལོ་ ༢༠༡༨ ལོའི་བོད་ཟླ་བཅུ་པའི་བོད་ཚེས་ ༡༠ ཕྱི་མའི་ཉིན་རིན་པོ་ཆེ་མཆོག་ཆིབས་སྒྱུར་གནང་དགོས་ངེས་པ་ལ་གྲ་སྒྲིག་གང་འཚམས་བྱས་པ་དང་། ལམ་བར་ནས་ཀཿཐོག་ཨ་འཛོམ་དགོན་དང་། ཀཿཐོག་གཞི་ཆེན་བཻ་རོ་གླིང་དགོན་གཉིས་ལ་ཉིན་འགར་བཞུགས་འཆར་ཞལ་བཞེས་གནང་ཡོད་ཀྱང་ཉིན་དེའི་ནུབ་མོར་ཁོང་གི་དངོས་སློབ་དད་པ་དམ་ཚིག་གཙང་ཞིང་ཐུགས་གཅིགས་ཤིན་ཏུ་ཆེ་བའི་ཞབས་ཏོག་པ་རི་ཁྲོད་པ་བླ་མ་གོང་འཕེལ་དང་། རི་ཁྲོད་པའི་བླ་མ་གུ་རུ་གཉིས་ལ་ཁོང་གིས་དངོས་སུ་གསུངས་པ་འདིར་མདོར་བསྡུས་ཙམ་ཞིག་ཞུས་ན་མི་རྟག་པའི་གཏམ་དང་འབྲེལ་ནས་ ༼ སང་ཉིན་ང་ཤི་འདུག་ཡོད་ན་གུ་རུ་ཁྱེད་གཉིས་ཀས་ཤིང་ཨེ་རག་མི་ཤེས་སྣུམ་ཉིས་ནས་ཕ་གའི་རིའི་སྒང་དུ་མེ་བསྲེག་གཏོང་དགོས། ༽ ཞེས་དང་།

ཚེས་ ༡༡ ཉིན་གྱི་ཞོགས་པའི་ཆུ་ཚོད་བཅུ་དང་ཕྱེད་ཀ་ཡས་མས་སུ་ཞབས་ཏོག་པ་བླ་མ་གོང་འཕེལ་དང་། མཉམ་དུ་རིན་པོ་ཆེའི་ཐུགས་དགོངས་ནང་བཞིན་རྐང་ལམ་བརྒྱུད་ཞབས་ཐང་ཕེབས་སྐབས་སུ། གློ་བུར་ལམ་འཕྲང་མི་བདེ་སར་ཕེབས་པ་ན་ཁོང་གིས་ཞབས་ཏོག་པ་གོང་འཕེལ་གྱིས་རིན་པོ་ཆེ་འདི་ནས་མ་ཕེབས་མ་གཏོགས་ལམ་ཁ་མིན་འདུག ཅེས་ཞུས་ཚེ་ ༼ཁྱོད་ནི་སྙིང་རྗེ་སྡུག་ལྡན་གྱི་ཕུང་པོ་འདི་ལ་ཅི་འདྲའི་ཞེན་ཆགས་ཆེན་པོ་རེད་འདུག་ཨ། ༽ ཞེས་སོགས་གསུང་བཞིན་ཤར་རྒྱག་ཕེབས་མཚམས་ཆུ་ཚོད་བཅུ་གཅིག་དང་ཕྱེད་ཀ་ཡས་མས་སུ་ཕེབས་ལམ་ནས་ཞབས་སྣེ་འདྲེད་པའི་རྐྱེན་བྱས་ཏེ་གློ་བུར་དུ་གཟུགས་སྐུའི་བཀོད་པ་ཆོས་དབྱིངས་སུ་བསྡུས་པའི་ཚུལ་བསྟན་སོང་བ་ལགས་ན། ཞིང་གཤེགས་དམ་པ་ཁོང་གིས་ལམ་གྱི་མངོན་རྟོགས་ལ་ཉེ་ཞོ་གང་ཡང་མེད་ཕྱིར་དང་། འབྲེལ་ཐོག་ཀུན་ལ་སྐྱབས་འཇུག་ཡང་ཡང་ཞུ་རྒྱུ་དང་། ལྷག་པར་༸སྐྱབས་རྗེ་ཀ་ཐོག་རྨོག་སྤྲུལ་གི་ཞལ་བཀོད་ལྟར་བལ་ཡུལ་སྔ་འགྱུར་ཀ་ཐོག་ཨ་འཛོམ་དགོན་འདུས་སྤྱི་དང་། བལ་ཡུལ་ཀ་ཐོག་གཞི་ཆེན་བཻ་རོ་གླིང་དགོན་འདུས་སྤྱི་གཉིས་ཀྱི་གཙོ་འགན་བཞེས་ཏེ་འདས་མཆོད་གོ་སྒྲིག་ཚོགས་ཆུང་དང་། མགོ་ལོག་ཐེབས་རྩ་ཁང་དང་། སྐལ་བཟང་རྡོ་རྗེ་ནང་མི་བཅས་ལྷན་འཛོམས་ཐོག་འབྲེལ་ཡོད་ཐུན་མོང་ནས་དམིགས་བསལ་ཙམ་མ་གཏོགས་སྤྱིར་བཏང་ཞག་གསུམ་རིང་གསང་རྒྱ་དམ་པོ་བྱེད་རྒྱུ་བཅས་དགོངས་རྫོགས་འགྲོ་དང་འགྲོ་མུས་སུ་མཆིས། ཟླ་བ་འདིའི་བོད་ཚེས་ ༢༠ ཉིན་གྱི་ཕྱི་དྲོ་ཆུ་ཚོད་ལྔ་པར་དད་ལྡན་སེར་སྐྱ་མི་མང་ཡོངས་ལ་སྐུ་གདུང་མཇལ་ཁ་གནང་རྒྱུ་ཐག་ཆོད་བྱུང་ཡོད། 

བོད་རྒྱལ་ལོ་ ༢༡༤༥ སོན་པའི་འདས་ལོ་ ༢༥༦༢ རབ་བྱུང་ ༡༧ རྣམ་འཕྱང་ཞེས་པ་འབྱུང་བཞི་ལྡན་ས་ཁྱི་དཀར་ཕྱོགས་སྟོང་པ་གསུམ་པ་སྟེ། ཕྱི་ལོ་ ༢༠༡༨ སྤྱི་ཟླ་ ༡༡ ཚེས་སྤྱི་ཚེས་ ༢༢ ཉིན་ཞིང་གཤེགས་དམ་པ་ཁོང་གི་འདས་མཆོད་གོ་སྒྲིག་ཚོགས་ཆུང་དང་། བལ་ཡུལ་ཀཿཐོག་གཞི་ཆེན་པོར་བཻ་རོ་གླིང་དགོན་འདུས་སྤྱི་དང་སྔ་འགྱུར་ཀཿཐོག་ཤ་མཛོམས་ཞིང་གཤེགས་དམ་པ་ཁོང་གི་འདུས་མཆོད་གོ་སྒྲིག་ཚོགས་ཆུང་དང་། བལ་ཡུལ་ཀཿཐོག་གཞི་ཆེན་བཻ་རོ་གླིང་དགོན་འདུས་སྤྱི་དང་། སྔ་འགྱུར་ཀཿཐོག་ཨ་འཛོམས་དགོན་འདུས་སྤྱི་དང་། མགོ་ལོག་ཐེབས་རྩ་ཁག་དང་། སྐལ་བཟང་རྡོ་རྗེ་ནང་མི་བཅས་འབྲེལ་ཡོད་ཐུན་མོང་ཆེན་པོས་གུས་པ་ཆེན་པོས་སྒོ་ནས་ཕུལ། 

སྐྱབས་རྗེ་ཀཿཐོག་དགེ་རྩེ་རིན་པོ་ཆེ་མཆོག་ནི། ཕྱི་ལོ་ ༡༩༥༤ ལོར་མགོ་ལོག་རྡོ་ཡུལ་མཁར་ནང་གོང་མའི་ལྷ་ཁང་སུམ་མདོ་རུ་ཡབ་བློ་ལྡན་ཕུན་ཚོགས་དང་། མ་ཡུམ་ཆོས་འཕགས་སྒྲོལ་མ་གཉིས་ཀྱི་སྲས་སུ་སྐུ་འཁྲུངས། ཨ་འཛོམས་རྒྱལ་སྲས་འགྱུར་མེད་རྡོ་རྗེ་མཆོག་དང་། རྫོང་གསར་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་མཆོག ཀརྨ་པ་རིག་པའི་རྡོ་རྗེ་མཆོག་སོགས་ནས་ངོས་འཛིན་གནང་བ་བཞིན་ཤར་རྒྱལ་བ་ཀཿཐོག་དགོན་དུ་ཕྱི་ལོ་ ༡༩༨༠ ལོར་ཁྲི་འདོན་མཛད་སྒོ་ཟབ་རྒྱས་གནང་། དེ་རྗེས་སྤྲུལ་སྐུ་ཉི་ཟླ་མཆོག་དང་། མཁན་ཆེན་འཇིགས་མེད་ཕུན་ཚོགས་མཆོག ཀཿཐོག་མཁན་རྒན་རྒྱལ་མཚན་ནོར་བུ་མཆོག ཀཿཐོག་རྨོག་ཚ་རིན་པོ་ཆེ། ཨ་འཛོམས་འབྲུག་པ་རིན་པོ་ཆེ་སོགས་ཀྱི་མདུན་ནས་དབང་ལུང་གིས་ཐུགས་རྒྱུད་ཡོངས་སུ་ཕྱུག་པར་མཛད།

ཕྱི་ལོ་ ༡༩༩༧ ལོར་རྒྱ་གར་འཕགས་པའི་ཡུལ་དུ་ཕེབས་འབྱོར་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས། སྐྱབས་རྗེ་འཁྲུལ་ཞིག་རིན་པོ་ཆེ། སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ། སྐྱབས་རྗེ་གྲུབ་དབང་པད་ནོར་རིན་པོ་ཆེ་སོགས་ཀྱི་སྐུ་མདུན་ནས་དབང་ལུང་གདམས་ངག་མང་པོ་ཞུས་ཤིང་། འཕགས་པའི་གནས་ཆེན་ཁག་ཏུ་སྐུ་མཚམས་ལ་བཞུགས་གནང་བ་དང་། འཛམ་གླིང་ཤར་ནུབ་མང་པོ་ཕེབས་ནས་བསྟན་འགྲོའི་དོན་མཛད་ཡོད། འདི་ལོའི་ཕྱི་ཟླ་ ༡ ནང་གནས་མཆོག་རྡོ་རྗེ་གདན་དུ་སྔ་འགྱུར་རྙིང་མའི་སྨོན་ལམ་ཆེན་མོ་ཐེངས་ ༢༩ པའི་ཐོག་༸སྐྱབས་རྗེ་རིན་པོ་ཆེ་མཆོག་སྔ་འགྱུར་རྙིང་མའི་དབུ་འཛིན་ཁྲི་རབས་བདུན་པར་ཁྲི་འདོན་བྱུང་བ་ནས་ད་བར་མཛད་འཕྲིན་སྐྱོང་མུས་ངང་དེ་རིང་སྔ་དྲོར་ཀཿ་ཐོག་ཨ་འཛོམས་དགོན་འདུས་སྤྱི་དང་བལ་ཡུལ་ཀཿཐོག་གཞི་ཆེན་བཻ་རོ་གླིང་དགོན་འདུས་སྤྱི་གཉིས་ཀྱིས་གཅོས་འདས་མཆོད་གོ་སྒྲིག་ཚོགས་ཆུང་བཅས་ཐུན་མོང་ནས་གསལ་བསྒྲགས་སྤེལ་བ་བཞིན་༸སྐྱབས་རྗེ་ཀཿཐོག་དགེ་རྩེ་རིན་པོ་ཆེ་མཆོག་ཕྱི་ལོ་ ༢༠༡༨ ཟླ་ ༡༡ ཚེས་ ༡༩ རེས་གཟའ་ཟླ་བ་ཉིན་བལ་ཡུལ་ཡང་ལེ་ཤོད་ཀྱི་རི་ཁྲོད་ནས་ངོ་མཚར་བའི་ཞལ་ཆེམས་ཁྱད་པར་ཅན་དང་གློ་བུར་དུ་གཟུགས་སྐུའི་བཀོད་པ་ཆོས་དབྱིངས་སུ་བསྡུས་ཚུལ་བསྟན་པས་ཡིད་སྐྱོའི་གནས་ཚུལ་ཐོན་འདུག ཅེས་སོགས་ཀྱི་གསུང་བཤད་གནང་།

ཉིན་རྒྱབ་ཆུ་ཚོད་ ༢ ནས་གཞུང་འབྲེལ་མྱ་ངན་གུས་འདུད་མཚོན་ཕྱིར་དབུས་ཀྱི་ལས་ཁུངས་ཁག་ལས་མཚམས་བཞག་ཡོད་པ་བཅས།།