ཕྱི་ལོ་ ༢༠༡༨ ཟླ་ ༡༠ ཚེས་ ༡༦ རེས་གཟའ་མིག་དམར།

༄༅། །ཕྱི་ལོ་ ༢༠༡༨ ཟླ་ ༡༠ ཚེས་ ༡༢ ནས་ ༡༤ བར་ཉིན་གྲངས་གསུམ་རིང་རྒྱལ་སྤྱིའི་བོད་དོན་འབྲེལ་མཐུད་ཁང་ International Tibet Network ནས་ཨ་རིའི་ཁ་ལི་ཧྥོར་ནི་ཡའི་བོད་རིགས་སྤྱི་མཐུན་ཚོགས་པས་མཐུན་འགྱུར་འོག་ཨ་རིའི་སན་ཕི་རན་སི་སི་ཁོ་བྷའི་ San Francisco Bay Areaས་ཁུལ་དུ་ཨ་རི་དང་ཁེ་ན་ཌ། མེཀ་སི་ཀོ་བཅས་གསུམ་གྱི་ནང་གི་བོད་དོན་རྒྱབ་སྐྱོར་ཚོགས་པ་ཁག་ ༡༧ ཙམ་གྱི་སྐུ་ཚབ་འཐུས་མི་སོགས་ལ་སྦྱོང་བརྡར་དང་འཆར་གཞི་ལྡན་པའི་ཐོག་ནས་ནང་ཁུལ་གྱི་འབྲེལ་ལམ་གོང་མཐོར་གཏང་རྒྱུའི་སྐོར་ཚོགས་འདུ་ཚོགས་ཡོད།

དེ་ཡང་ཉིན་གྲངས་གསུམ་རིང་གི་ཚོགས་འདུའི་ཐོག་ས་གནས་བོད་དོན་རྒྱབ་སྐྱོར་ཚོགས་པ་དང་། ཚོགས་བཅར་བ་སོགས་འཛུལ་ཞུགས་ཀྱིས་བོད་དོན་ལས་འགུལ་དེ་བཞིན་སྔར་ལས་ལྷག་ཤུགས་ཆེ་གཏོང་ཆེད་གདོང་ལེན་དང་གོ་སྐབས་སོགས་ཀྱི་སྐོར་གྲོས་བསྡུར་ལྷུག་པོ་གནང་ཡོད།

སྐབས་དེར་ཕྱི་དྲིལ་ལས་ཁུངས་ཀྱི་ལས་བྱེད་བསྟན་འཛིན་སྒྲོན་གསལ་ལགས་ཀྱིས་བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུའི་འཆར་སྣང་སྐོར་ངོ་སྤྲོད་དང་། འབྱུང་འགྱུར་ཕྱི་ཟླ་ ༡༡ ཚེས་ ༢ ཉིན་སུད་སིའི་གྲོང་ཁྱེར་ཇི་ནི་ཝ་ནང་རྒྱ་ནག་ནང་སྤྱི་ཡོངས་ཀྱི་འགྲོ་བ་མིའི་ཐོབ་ཐང་གནས་སྟངས་ཐོག་ཞིབ་འཇུག་གནང་བའི་དུས་བཀག་བསྐྱར་ཞིབ་ཚོགས་འདུའི་སྐོར་གསུངས།

བྱང་ཨ་རི་སྐུ་ཚབ་དོན་གཅོད་ཁང་གི་ཨ་རིའི་སྲིད་གཞུང་གི་འབྲེལ་མཐུད་པ་བསྟན་འཛིན་དཔལ་སྐྱིད་ལགས་ཀྱིས་བྱང་ཨ་རིའི་དོན་ཁང་གི་འབྱུང་འགྱུར་གྱི་འཆར་གཞི་དང་ལས་དོན་གནང་ཕྱོགས་སོགས་ཀྱི་སྐོར་གསུངས།

ཚོགས་བཅར་བ་ཡོངས་ནས་བོད་ཀྱི་ཆབ་སྲིད་བཙོན་ཟུར་དང་འཇིགས་བྲལ་གློག་བརྙན་བཟོ་པ་པོ་དོན་གྲུབ་དབང་ཆེན་ལགས་དང་ཁོང་གི་གཟའ་ཟླ་རྣམ་གཉིས་དང་ཐུག་འཕྲད་གནང་ཡོད་པ་མ་ཟད། རྒྱལ་སྤྱིའི་བོད་དོན་འབྲེལ་མཐུད་ཁང་གིས་ཕྱི་ལོ་ ༢༠༡༨ ལོའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པ་དེ་ཉིད་ཀྱི་སྙིང་སྟོབས་གཟེངས་རྟགས་དོན་གྲུབ་དབང་ཆེན་ལགས་ལ་ཕུལ་ཡོད། ཚོགས་བཅར་བ་ཡོངས་ནས་བོད་ཀྱི་སྐད་ཡིག་ཐོབ་ཐང་རྩོད་ལེན་པ་བཀྲ་ཤིས་དབང་ཕྱུག་ལགས་གློད་བཀྲོལ་གཏོང་དགོས་པའི་སྐོར་དང་། འབྱུང་འགྱུར་བོད་མིའི་རང་དབང་སྒེར་ལངས་གསུམ་བཅུ་དུས་དྲན་ཐེངས་ ༦༠ ཐམ་པའི་སྐོར། བོད་ནང་ཕར་འགྲོ་ཚུར་འོང་གི་གོ་སྐབས་འདྲ་མཉམ་གྱི་ཁྲིམས་འཆར་ལག་བསྟར་ཡོང་བ་སོགས་ཀྱི་སྐོར་གྲོས་བསྡུར་གནང་། དེ་བཞིན་པཎ་ཆེན་ཆུང་སྲིད་རིན་རིན་པོ་མཆོག་མགྱོགས་མྱུར་གློད་བཀྲོལ་གཏོང་དགོས་པའི་སྐོར་དང་རྒྱ་གཞུང་གིས་བོད་ནང་གཏེར་ཁ་སྔོག་འདོན་བྱེད་བཞིན་ཡོད་པའི་སོགས་ཀྱི་སྐོར་གྲོས་བསྡུར་གནང་ཡོད་པ་བཅས། །