ཕྱི་ལོ་ ༢༠༡༨ ཟླ་ ༡༠ ཚེས་ ༨ རེས་གཟའ་ཟླ་བ།
༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། སྐབས་ ༡༦ པའི་བོད་མི་མང་སྤྱི་འཐུས་རྣམས་བོད་མིའི་འདུ་སྡོད་གཞིས་ཆགས་ཁག་ལ་ཕྱོགས་ཕེབས་གནང་རྒྱུའི་ས་བགོས་ཡོད་པ་ལྟར། སྤྱི་འཐུས་མཁན་པོ་ཀཿབྲག་དངོས་གྲུབ་བསོད་ནམས་ལགས་དང་སྤྱི་འཐུས་བ་ར་ཚེ་དབང་བཀྲ་ཤིས་ལགས་རྣམ་གཉིས་ཕྱི་ལོ་ ༢༠༡༨ ལོའི་ཟླ་ ༡༠ ཚེས་ ༨ ནས་ཚེས་ ༡༩ བར་སུ་ན་མདའ་དང་། མི་རིགས། མཁའ་ཤང་། སུ་ཁི་ཡ། མ་ནི་བྷ་ཇན། གུམ། བླ་མ་ཧ་བཀྲ། ཨོཌ་བྷ་རེ། རྡོར་གླིང་བཅས་ཀྱི་བོད་མིའི་གནས་སྡོད་ཁག་ལ་གཞུང་འབྲེལ་ཕྱོགས་ཕེབས་གནང་གཏན་འཁེལ་ཡོད།
དེ་ཡང་སྤྱི་འཐུས་མཁན་པོ་ཀཿ བྲག་དངོས་གྲུབ་བསོད་ནམས་ལགས་ཕྱི་ཟླ་ ༡༠ ཚེས་ ༨ ཉིན་གྱི་ཕྱི་དྲོ་རྡ་ས་ནས་ལྡི་ལིར་ཕེབས་ཐོན་གནང་རྒྱུ་དང་། ཕྱི་ཚེས་ ༡༠ ཉིན་ལྡི་ལི་ནས་མཁའ་ལམ་བརྒྱུད་སི་ལི་གུ་རིར་ཕེབས་ཐོན་གནང་རྒྱུ། དེ་ཉིན་སྤྱི་འཐུས་བ་ར་ཚེ་དབང་བཀྲ་ཤིས་ལགས་སྒང་ཏོག་ནས་སི་ལི་གུ་རིར་ཕེབས་ཐོན་གནང་སྟེ་སྤྱི་འཐུས་རྣམ་པ་གཉིས་ལྷན་འཛོམས་གནང་རྗེས། རྡོར་གླིང་ལ་ཕེབས་ཐོན་གནང་རྒྱུ། དེ་ནས་ཕྱི་ཚེས་ ༡༡ ནས་ ༡༥ བར་གོང་འཁོད་ས་གནས་ཁག་གི་ནང་ལས་རིམ། ཕྱི་ཚེས་ ༡༩ ཉིན་སྤྱི་འཐུས་རྣམ་པ་གཉིས་སོ་སོའི་བཞུགས་གནས་སུ་ཕེབས་འབྱོར་གནང་རྒྱུ་ཡིན་པ་བཅས།།
