ཕྱི་ལོ་ ༢༠༡༨ ཟླ་ ༡༠ ཚེས་ ༣ རེས་གཟའ་ལྷག་པ།

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱིས་རྒྱ་གར་རྒྱལ་ཡོངས་སུ་བོད་དོན་ཞུ་སྐུལ་གྱི་ལས་འགུལ་ཞིག་སྤེལ་བཞིན་ཡོད་པ་ལྟར། བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གི་ཚོགས་མི་སྤྱི་འཐུས་ཟླ་བ་ཚེ་རིང་ལགས་དང་། སྤྱི་འཐུས་མཁན་པོ་འཇམ་དཔལ་བསྟན་འཛིན་ལགས།  སྤྱི་འཐུས་བསམ་གཏན་ཆོས་སྒྲོན་ལགས།  སྤྱི་འཐུས་བཀྲ་ཤིས་དོན་གྲུབ་ལགས་བཅས་ཀྱིས་ཕྱི་ལོ་ ༢༠༡༨ ཟླ་ ༡༠ ཚེས ༢ ཉིན་ནས་རྒྱ་གར་བྱང་ཕྱོགས་སྡེ་ར་ལྡུན་ཁུལ་དུ་བོད་དོན་ཞུ་སྐུལ་གྱི་ལས་འགུལ་འགོ་འཛུགས་གནང་ཡོད་འདུག

དེ་ཡང་སྤྱི་འཐུས་རྣམ་པ་ཕྱི་ཚེས་ ༡ ཉིན་གྱི་སྔ་དྲོ་བཞུགས་སྒར་རྡ་ས་ནས་ཕེབས་ཐོན་གྱིས་སྡེ་ར་ལྡུན་ལ་ཕེབས་འབྱོར་སྐབས་ས་འཐུས་ཚོགས་གཙོ་དང་། གཞིས་འགོ བོད་རང་དབང་ལས་འགུལ་བདེན་པའི་ཚོགས་གཙོ། ལས་དྲུང་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་གནང་འདུག

སྐབས་དེར་སྤྱི་འཐུས་རྣམ་པས་བོད་དང་རྒྱ་གར་དབར་གྱི་འབྲེལ་ལམ་དང་། བོད་འདི་རྒྱ་གར་གྱིས་གཙོས་དཀྱིལ་ཤར་ཨེ་ཤི་ཡའི་ནང་གལ་ཆེན་པོ་ཇི་ལྟར་ཆགས་ཚུལ། རྒྱ་ནག་གཞུང་གིས་བོད་ཐོག་འཛིན་པའི་གདུག་རྩུབ་ཅན་གྱི་སྲིད་བྱུས་གང་ཡོད། རྒྱ་གར་གྱི་གནའ་བོའི་རིག་གཞུང་བོད་མིས་བདག་གཅེས་ཇི་ལྟར་བྱས་ཡོད་ཚུལ་དང་། དེ་བཞིན་རྒྱ་གར་དབུས་སའི་གཞུང་མང་གཉིས་བོད་མི་ཚོར་སྔ་ཕྱི་བར་གསུམ་དུ་བཀའ་དྲིན་ཆེ་ཚུལ་བཅས་ཀྱི་ཐོག་གསལ་འདོན་གནང་ཐུབ་པ་བྱུང་ཡོད་པ་བཅས། །