ཕྱི་ལོ་ ༢༠༡༨ ཟླ་ ༡༠ ཚེས་ ༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༨ ཟླ་ ༩ ཚེས་ ༣༠ ནས་ ཟླ་ ༡༠ ཚེས་ ༡ བཅས་ཉིན་གྲངས་གཉིས་རིང་ལུས་སེམས་སྲོག་གི་བགྲོ་གླེང་ཚོགས་ཆེན་ཐེངས་བརྒྱད་པ་དེ་བཞིན་བཞུགས་སྒར་རྡ་ས་བོད་ཀྱི་སྨན་རྩིས་ཁང་དུ་ཚོགས་ཡོད་པ་དང་། ཐེངས་འདིའི་བགྲོ་གླེང་གི་བརྗོད་གཞི་གཙོ་བོ་ནི། བྱིས་པའི་སེམས་ཁམས་གསོ་སྐྱོང་ཞེས་པ་དེ་ཡིན་ཞིང་། བགྲོ་གླེང་གི་སྟེང་སེ་ལ་ཀུའི་བོད་ཁྱིམ་སློབ་གྲྭའི་ཚན་རིག་སྡེ་ཚན་གྱི་འཛིན་རིམ་བཅུ་གཅིག་གི་སློབ་ཕྲུག་གྲངས་ ༨༠ ཙམ་དང་། སྨན་རྩིས་ཁང་གི་སློབ་ཕྲུག བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ཀྱི་མདུན་ལམ་སློབ་སྟོན་ཚན་པའི་ལས་བྱེད། འཕྲོད་བསྟེན་ལས་ཁུངས་ཀྱི་ལས་བྱེད། ཕྱི་རྒྱལ་ཡུལ་གྲུ་ཁག་གཅིག་ནས་ཕེབས་པའི་སྐུ་ཚབ། དེ་བཞིན་རྡ་ས་ཁུལ་གྱི་དགོན་སྡེ་དང་བཙུན་དགོན་ཁག་གི་སྐུ་ཚབ་སོགས་ཚོགས་བཅར་བ་ ༣༠༠ ཙམ་མཉམ་ཞུགས་གནང་ཡོད་པ་རེད། ཐེངས་འདིའི་བརྗོད་གཞིའི་ཐོག་དགེ་བཤེས་མ་བསྟན་འཛིན་ལྷ་སྒྲོན་ལགས་ཀྱིས་ནང་པའི་གཞུང་ནས་གསུང་བའི་བྱིས་པའི་སེམས་ཁམས་གསོ་སྐྱོང་གི་སྐོར་དང་། རྒྱ་གར་བ་སྨན་རམས་པ་སག་ཤི་ཤརྨ་ལགས་ནས་རྒྱ་གར་ཚེ་ཡི་རིག་བྱེད་ལས་གསུང་བའི་བྱིས་པའི་སེམས་ཁམས་གསོ་སྐྱོང་གི་སྐོར་། སྨན་རམས་པ་ཨར་པདྨ་པྲི་ཡ་ལགས་ཀྱིས་སིངྷ་སྨན་གཞུང་ནས་གསུང་བའི་བྱིས་པའི་སེམས་ཁམས་གསོ་སྐྱོང་གི་སྐོར། ཨ་རི་ནས་ཡིན་པའི་སྨན་རབས་པ་ཌེ་ནི་སེ་མེག་ཌེར་མོཊ་ལགས་ནས་ནུབ་ཕྱོགས་སེམས་ཁམས་ཚན་རིག་ལས་གསུང་བའི་བྱིས་པའི་སེམས་ཁམས་གསོ་སྐྱོང་གི་སྐོར། སྨན་རམས་པ་ཡེ་ཤེས་རྡོ་རྗེ་ལགས་ཀྱིས་བོད་ཀྱི་གསོ་བ་རིག་པའི་གཞུང་ལས་གསུང་བའི་བྱིས་པའི་སེམས་ཁམས་གསོ་སྐྱོང་གི་སྐོར། སྨན་རམས་པ་སུ་བྷ་ས་སིང་གིས་ཧོ་མོ་པེ་ཐིའི་གཞུང་ལས་གསུང་བའི་བྱིས་པའི་སེམས་ཁམས་གསོ་སྐྱོང་གི་སྐོར། སྐར་རྩིས་པ་བསྟན་འཛིན་དབྱངས་སྐྱིད་ལགས་ཀྱིས་བོད་རྩིས་རིག་པའི་གཞུང་ལས་གསུང་བའི་བྱིས་པའི་སེམས་ཁམས་གསོ་སྐྱོང་གི་སྐོར། སྨན་རམས་པ་ཨེམ་ཨ་ན་ས་ལགས་ཀྱིས་ཁ་ཆེའམ་ཡུ་ནཱ་ཎིའི་སྨན་གཞུང་ནས་གསུང་བའི་བྱིས་པའི་སེམས་ཁམས་གསོ་སྐྱོང་གི་སྐོར་གསུངས་ཡོད་པ་མ་ཟད། བྱིས་པའི་སེམས་ཁམས་ཀྱི་དཀའ་ངལ་དང་། རྒྱུ་རྐྱེན། བཅོས་ཐབས་སོགས་ཀྱི་སྐོར་བགྲོ་གླེང་ལྷུག་པོར་གནང་།
ཕྱེད་ཡོལ་ཕྱི་དྲོ་ཆུ་ཚོད་ ༤།༣༠ སྟེང་མཇུག་བསྡོམས་ཀྱི་མཛད་སྒོའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་དང་དམིགས་བསལ་སྐུ་མགྲོན་འཕྲོད་བསྟེན་དྲུང་ཆེ་ཆུ་སྐྱ་སྦྲ་གཉིས་ཚེ་རྒྱལ་ལགས་ཕེབས་ཡོད་པ་དང་། སྐབས་དེར་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་གསུང་བཤད་གནང་དོན།
དེ་སྔ་ཡིན་ན་བོད་པའི་སྤྱི་ཚོགས་ནང་སེམས་ཁམས་ཐོག་དཀའ་ངལ་ཨེ་ཡོད་ན་སྙམ་བྱུང་། འདས་པའི་ལོ་གཅིག་གཉིས་ནང་གནས་ཚུལ་གོ་ཐོས་ལ་གཞིགས་ན་སྔར་བསམས་པ་ནང་བཞིན་རེད་མི་འདུག ད་ལྟའི་ཆར་ང་ཚོས་གཟབ་གཟབ་དང་དོ་སྣང་བྱེད་དགོས་པའི་གནས་སྟངས་ཤིག་ཆགས་འདུག འཛམ་གླིང་འཕྲོན་བསྟེན་ལྷན་ཚོགས་ཀྱིས་འཛམ་བུ་གླིང་ནང་སྤྱི་ཡོངས་ཀྱི་ཆ་ནས་ལང་ཚོ་དར་ལ་བབས་པའི་ལོ་ན་ ༡༠ ནས་ ༢༠ བར་གྱི་གཞོན་སྐྱེས་ཚོར་སེམས་ཁམས་འཕྲོད་བསྟེན་གྱི་དཀའ་ངལ་ཕྲད་དང་འཕྲད་བཞིན་ཡོད་པ་གསུངས་འདུག དེར་བརྟེན་ང་ཚོ་བོད་པའི་སྤྱི་ཚོགས་ནང་སེམས་ཁམས་འཕྲོད་བསྟེན་གྱི་དཀའ་ངལ་བྱུང་དང་འབྱུང་བཞིན་པའི་རྒྱུ་རྐྱེན་གང་ཡིན་པ་དེ་ངོས་འཛིན་བྱེད་དགོས་པ་གལ་ཆེན་པོ་ཆགས་ཡོད། དཔལ་འབྱོར་དང་མཐུན་རྐྱེན་འཕེལ་རྒྱས་སུ་འགྲོ་བཞིན་པའི་སྐབས་འདིར་བོད་པའི་སྤྱི་ཚོགས་ནང་དམིགས་བསལ་གྱི་གཞོན་སྐྱེས་ཚོར་སེམས་ཁམས་ཀྱི་དཀའ་ངལ་འཕྲད་བཞིན་པ་དེར་ང་ཚོས་གདོང་ལེན་བྱེད་དགོས་པ་དང་། སེམས་ཁམས་མི་བདེ་བ་ཚོ་མཉམ་དུ་བཞག་པ་དེ་ནོར་འདུག ཅེས་དགོངས་ཚུལ་གསུང་མཁན་བྱུང་ཡོད། ཐབས་ཤེས་གཞན་པ་ག་རེ་འདུག ང་ཚོས་བསམ་བློ་གཏོང་དགོས་པ་ཆགས་ཡོད། ང་རང་རྒྱ་གར་གྱི་བྱང་ཤར་དང་ལྷོ་ཕྱོགས་བོད་པའི་གཞིས་ཆགས་སོགས་ལ་སྐོར་སྐྱོད་བྱས་པ་བརྒྱུད་བོད་པའི་སྤྱི་ཚོགས་ནང་སེམས་ཁམས་འཕྲོད་བསྟེན་གྱི་དཀའ་ངལ་ཡོད་པ་དངོས་ཡོད་ར་འཕྲོད་བྱུང་། ཞེས་གསུངས། མཐར་རྡ་ས་བོད་ཀྱི་སྨན་རྩིས་ཁང་གི་འགན་འཛིན་བཀྲ་ཤིས་ཚེ་རིང་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་བ་དང་འབྲེལ་མཛད་སྒོ་གྲོལ། །
