ཕྱི་ལོ་ ༢༠༡༨ ཟླ་ ༡༠ ཚེས་ ༡༨ རེས་གཟའ་ཕུར་བུ།
༄༅། །རྒྱ་ནག་ནང་སྤྱི་ཡོངས་ཀྱི་འགྲོ་བ་མིའི་ཐོབ་ཐང་གནས་སྟངས་ཐོག་ཞིབ་འཇུག་གནང་བའི་དུས་བཀག་བསྐྱར་ཞིབ་ཚོགས་འདུ་ཐེངས་གསུམ་པ་དེ་བཞིན་ཕྱི་ཟླ་ ༡༡ འགོ་སྟོད་དུ་སུད་སིའི་གྲོང་ཁྱེར་ཇི་ནི་ཝ་ནང་འཚོགས་གཏན་འཁེལ་ཡོད་པ་དང་། དུས་བཀག་བསྐྱར་ཞིབ་ཚོགས་འདུ་སླེབ་ལ་ཉེ་བའི་སྐབས་འདིར། ཕྱི་ལོ་ ༢༠༡༨ ཟླ་ ༡༠ ཚེས་ ༡༦ ཉིན་ཡུ་རོབ་གྲོས་ཚོགས་ནང་ཡུ་རོབ་བོད་དོན་རྒྱབ་སྐྱོར་ཚོགས་པས་གོང་གི་གནད་དོན་དང་འབྲེལ་བའི་ཚོགས་འདུ་ཞིག་ཚོགས་ཡོད།
དེ་ཡང་ཚོགས་འདུའི་ཐོག་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་ཡོ་རོབ་གྲོས་ཚོགས་ཀྱི་འཐུས་མི་སྐུ་ཞབས་ཐོ་མ་སི་མན་ Mr. Thomas Mann ལགས་ཀྱིས་སྦར་སེལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་གདན་ཞུ་གནང་ཡོད་པ་དང་། ཚོགས་འདུའི་ཐོག་སྦར་སེལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཚོགས་འདུའི་སྐོར་འགྲེལ་བརྗོད་གཟབ་རྒྱས་གནང་ཡོད་པ་མ་ཟད། ཡུ་རོབ་ནང་གི་བློན་ཆེན་ལས་ཁུངས་ཁག་དང་ཡུ་རོབ་གྲོས་ཚོགས་ཀྱི་འཐུས་མི་བཅས་ལ་བོད་དོན་དང་འབྲེལ་བའི་སྐོར་ཞུ་སྐུལ་གནང་བའི་སྐོར་གསུང་། ཕྱོགས་མཚུངས་ཡུ་རོབ་གྲོགས་ཚོགས་ཀྱི་འཐུས་མི་ ༢༠ ཙམ་གྱིས་མཚན་རྟགས་བཀོད་དེ་རྒྱ་ནག་གི་ཡོངས་ཁྱབ་དུས་མཚམས་བསྐྱར་ཞིབ་ཚོགས་འདུ་ཐེངས་གཉིས་པའི་སྐབས་ཀྱི་གྲོས་འཆར་རྣམས་ལག་བསྟར་ཡོང་བར་རེ་སྐུལ་ཞུ་རྒྱུ་ཡིན་པའི་སྐོར་གསུང་།
སྐུ་ཞབས་ཐོ་མ་སི་མན་ལགས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཉེ་ཆར་འཇར་མི་ནི་ནང་༸ཞབས་སོར་འཁོད་སྐབས་མཇའ་འཕྲད་ཞུས་པའི་སྐོར་དང་། སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཕྱི་ལོ་ ༢༠༡༨ ཟླ་ ༩ ཚེས་ ༡༤ ནས་ ༡༨ བར་ནེ་དར་ལེན་ཌིའི་ Netherlands ནང་ཆིབས་སྒྱུར་ཐེངས་བདུན་པ་བསྐྱངས་པའི་སྐོར་གསུངས།
ཚོགས་འདུའི་ཐོག་གནད་དོན་གཞན་གྲོས་བསྡུར་གནང་ཡོད་པ་ནི། འབྱུང་འགྱུར་ཕྱི་ལོ་ ༢༠༡༩ ཟླ་ ༣ ཚེས་ ༡༠ རེས་གཟའ་ཉི་མ་ཉིན་ཡུ་རོབ་བོད་ཀྱི་རྒྱབ་ཏུ་ལང་ཡོད། ཅེས་པའི་གསུམ་བཅུ་དུས་དྲན་སྲུང་བརྩི་ཞུ་རྒྱུ་ཡིན་པའི་སྐོར་དང་། གསུམ་བཅུ་དུས་དྲན་གྱི་མཛད་སྒོ་དེ་བཞིན་ཡུ་རོབ་སྤྱི་འཐུས་གཉིས་དང་ཡུ་རོབ་བོད་རིགས་སྤྱི་མཐུན་ཚོགས་པ་ནས་གོ་སྒྲིག་ཞུ་རྒྱུ་ཡིན་པའི་སྐོར་སོགས་གསུང་བཤད་གནང་།
རྒྱལ་སྤྱིའི་བོད་དོན་ལས་འགུལ་ཁང་གི་ལས་བྱེད་ཝིན་སེན་ཊི་མེ་ཊེན་ Mr. Vincent Metten ལགས་ཀྱིས་རྒྱ་ནག་གཞུང་གིས། བོད་ཀྱི་རྒྱལ་ས་ལྷ་ས་ཁྱོན་ཡོངས་ལ་དམ་བསྒྲགས་ཤུགས་ཆེ་བྱེད་བཞིན་ཡོད་པ་མ་ཟད། ལྷར་པར་རྒུ་རྩ་བཙོན་ཁང་དང་། གྲྭ་བཞི་བཙོན་ཁང་། ཆུ་ཤུར་བཙོན་ཁང་སོགས་ཀྱི་ཐོག་དམ་བསྒྲགས་ཤུགས་ཆེ་བྱེད་བཞིན་ཡོད། དེ་བཞིན་བཙོན་ཁང་དེ་དག་གི་ཉེ་འཁོར་དུ་རྒྱལ་སྤྱིའི་ཡུལ་སྐོར་སྤྲོ་འཆམ་པ་ཚོར་དམིགས་ཏེ་སྤྲོ་སྐྱིད་ཁང་དང་སྐར་མ་ལྔ་ཅན་གྱི་མགྲོན་ཁང་སོགས་བརྒྱབ་ཡོད་པའི་སྐོར་གསུངས།
སྤྱིར་སྐུ་ཞབས་ཐོ་མ་སི་མན་ལགས་ཀྱིས་ཚོགས་འདུ་གཙོ་སྐྱོང་གནང་ཐོག་ཡུ་རོབ་གྲོས་ཚོགས་འཐུས་མི་སྐུ་ཞབས་སོ་གོར་ལགས་དང་། སྦར་སེལ་སྐུ་ཚབ་དོན་གཅོད་ཁང་གི་ལས་བྱེད། ཡུ་རོབ་གྲོས་ཚོགས་ཀྱི་ལས་རོགས་སོགས་ཚོགས་འདུར་མཉམ་ཞུགས་གནང་ཡོད་པ་བཅས། །
