བྱང་ཨ་རི་སྐུ་ཚབ་དོན་གཅོད་མཆོག་ས་གནས་སྦོ་སེ་ཊོན་དུ་གཞུང་འབྲེལ་ཕྱོགས་བསྐྱོད་གནང་བ།

གསར་ལས་ཁང་གི་གསར་འགོད་པས།

༢༠༡༨-༡༠-༡༠

ཕྱི་ལོ་ ༢༠༡༨ ཟླ་ ༡༠ ཚེས་ ༡༠ རེས་གཟའ་ལྷག་པ།

༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ ༡༠ ཚེས ༥ ཉིན་གྱི་སྔ་དྲོ་ཆུ་ཚོད ༧ ཙམ་ནས་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་དང་།ཕྱག་རོགས་བོད་རིགས་སྤྱི་མཐུན་འབྲེལ་ལས་བསྟན་འཛིན་ཚེ་དཔག་ལགས་ལྷན་བཅར་གྱིས་རྒྱལ་ས་ཝ་ཤིང་ཀྲོན་ནས་མཁའ་ལམ་བརྒྱུད་སྦོ་སེ་ཊོན་ལ་ཕེབས་འབྱོར་མཚམས་ས་གནས་བོད་རིགས་སྤྱི་མཐུན་ཚོགས་པའི་རྒྱུན་ལས་རྣམས་ནས་ཕེབས་བསུ་ཞུས།

དགོང་མོ་ཆུ་ཚོད ༦ ཐོག་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ས་གནས་སྦོ་སེ་ཊོན་གནས་སྡོད་བོད་རིགས་བརྒྱ་སྐོར་ཙམ་འདུ་འཛོམས་ཐོག་གསུང་བཤད་གནང་བའི་སྙིང་པོར། སྐུ་ཚབ་དོན་གཅོད་ལས་འཁུར་ཞུས་པ་ནས་ལས་དོན་གལ་ཆེ་བ་གཅིག་ནི་ཨ་རིའི་ས་གནས་བོད་རིགས་ཡོད་སར་འགྲོ་རྒྱུའི་འཆར་གཞི་ལྟར་ས་གནས་མང་ཆེ་བར་བཅར་ཐུབ་ཡོད་པ་དང་། ད་ལམ་ཡང་ས་གནས་འདིར་ཡོང་དགོས་དོན་ལས་འཆར་ལྟར་ཡིན་པ་དང་།

དེ་ཡང་ཁོང་གིས་དོན་གཅོད་ལས་ཁུངས་ནས་ལས་ཀ་བྱེད་ཕྱོགས་ངོ་སྤྲོད་དང་། ཨ་རི་དང་ཁེ་ན་ཌ་གཞུང་གཉིས་ནས་བོད་དོན་རྒྱབ་སྐྱོར་སྔར་མུས་ལྟར་འགྲོ་བཞིན་པ་མ་ཟད། འདི་ལོར་རོགས་དངུལ་སྤར་ཆ་གནང་ཡོད་པ་དང་མ་འོོངས་པར་མུ་མཐུད་གནང་རེ་ཡོད་སྐོར་སོགས་དང་།

གཞན་ཡང་ཉེ་ཆར་ཨ་རིའི་གྲོས་ཚོགས་འོག་མས་བོད་ནང་འགྲོ་འོང་ཆོག་པའི་ཁྲིམས་འཆར་རྒྱབ་སྐྱོར་ཐོབ་ཟིན་ཡོད་པ་དེ་གཏམ་བཟང་དང་མི་རིང་བར་གྲོས་ཚོགས་གོང་མ་ནས་རྒྱབ་སྐྱོར་འཐོབ་དགོས་སྟབས། ས་གནས་སོ་སོའི་བོད་རིགས་སྤྱི་མཐུན་ཚོགས་པ་ཁག་ནས་ས་གནས་སོ་སོའི་གྲོས་ཚོགས་གོང་མའི་འཐུས་མི་ལ་ཡིག་ངག་གཉིས་ཐོག་ནས་རྒྱབ་སྐྱོར་དགོས་པའི་ལས་འགུལ་སྤེལ་དགོས་པ་དང་། དུས་རྒྱུན་དུ་བོད་མི་ཚོས་༧གོང་ས་མཆོག་གི་བཀའ་དྲིན་རྗེད་མི་རུང་བ་དང་། བོད་མིའི་སྒྲིག་འཛུགས་སོ་སོའི་གཞུང་ཡིན་པ་རྗེད་མི་རུང་བ། རང་ཉིད་བོད་པ་ཡིན་པ་རྗེད་མི་རུང་བ་དང་། ལྷག་པར་ཕ་མས་འགན་ཁུར་ནས་སོ་སོའི་བུ་ཕྲུག་ཚོས་བོད་སྐད་རྒྱག་པ་དང་བོད་མིའི་བཟང་སྤྱོད་རྒྱུད་ལ་འཇགས་གནང་དགོས་པ་བཅས་ཀྱི་གསུང་བཤད་ལམ་སྟོན་གནང་། ཕྱི་ཚེས ༦ ཉིན་གྱི་སྔ་དྲོ་ཨེམ་ཧར་སེ་ཕྱོགས་སུ་ཕེབས་ཐོན་གནང་ཡོད་པ་བཅས། །

གསར་གནས།