བོད་མི་མང་སྤྱི་འཐུས་སྐུ་ཚབ་ཚོགས་ཆུང་ནས་ཡུ་པི་མངའ་སྡེའི་སྤྱི་ཁྱབ་བློན་ཆེན་སོགས་མཇལ་འཕྲད་ཀྱིས་བོད་དོན་ཞུ་སྐུལ་ལེགས་གྲུབ་བྱུང་བ།

གསར་ལས་ཁང་གི་གསར་འགོད་པས།

༢༠༡༨-༡༠-༡༩

ཕྱི་ལོ་ ༢༠༡༨ ཟླ་ ༡༠ ཚེས་ ༡༨ རེས་གཟའ་པ་སངས།

ཡུ་པི་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཡོ་གྷི་ཨ་དྷི་ཏི་ཡ་ནཱ་ཐ་མཆོག

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། བོད་མི་མང་སྤྱི་འཐུས་ཚེ་རིང་གཡུ་སྒྲོན་ལགས་དང་། སྤྱི་འཐུས་དོན་གྲུབ་བཀྲ་ཤིས་ལགས་བཅས་ལས་གྲུབ་པའི་སྐུ་ཚབ་ཚོགས་ཆུང་གིས་ཕྱི་ལོ་ ༢༠༡༨ ཟླ་ ༡༠ ཚེས་ ༡༠ ནས་ ༡༥ བར་ཉིན་ལྔའི་རིང་རྒྱ་གར་བྱང་ཕྱོགས་ཡུ་པི་མངའ་སྡེའི་ནང་སྤྱི་ཁྱབ་བློན་ཆེན་སོགས་མཇལ་འཕྲད་ཀྱིས་བོད་དོན་ཞུ་སྐུལ་གྱི་ལས་རིམ་རེ་ཞིག་མཇུག་བསྒྲིལ་གནང་ཡོད་འདུག

མངའ་སྡེའི་གྲོས་ཚོགས་ཀྱི་ཚོགས་གཙོ་སྐུ་ཞབས་ཧི་རི་ཌེཡ་ནཱར་ཡན་མཆོག

དེ་ཡང་སྤྱི་འཐུས་རྣམ་པ་གཉིས་ནས་ཕྱི་ཚེས་ ༡༠ ནས་ ༡༥ བར་ཡུ་པི་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཡོ་གྷི་ཨ་དྷི་ཏི་ཡ་ནཱཐ་ Shri.Yogi Adityanath ji མཆོག་དང་། མངའ་སྡེའི་གྲོས་ཚོགས་ཀྱི་ཚོགས་གཙོ་སྐུ་ཞབས་ཧི་རི་ཌེཡ་ནཱར་ཡན་ Shri Hriday Narayan Dikshit མཆོག མངའ་སྡེའི་འགྲིམ་འགྲུལ་བློན་ཆེན་སྐུ་ཞབས་ས་ཝན་རྡ་ར་དྷེབ་སིང་ Shri.Sawandra Dev Singh མཆོག མངའ་སྡེའི་བློན་ཆེན་སྐུ་ཞབས་ཨ་ཤུ་ཏོཤི་ཊན་ཌོན་ Shri Ashutosh Tandon མཆོག རྒྱ་གར་ས་མཇ་ཝ་ཏི་སྲིད་དོན་ཚོགས་པའི་འགོ་འཁྲིད་དང་།

མངའ་སྡེའི་འགྲིམ་འགྲུལ་བློན་ཆེན་སྐུ་ཞབས་ས་ཝན་རྡ་ར་དྷེབ་སིང་མཆོག

མངའ་སྡེའི་སྤྱི་ཁྱབ་བློན་ཆེན་ཟུར་པ་སྐུ་ཞབས་ཨག་ལེ་ཤི་ཡཱ་དྷབ་ Akhilesh Yadav མཆོག ས་མཇ་ཝ་ཏི་སེག་གུ་ལར་སྲིད་དོན་ཚོགས་པའི་འགོ་འཁྲིད་སྐུ་ཞབས་ཤི་ཝེ་པཱལ་ཡཱ་དྷེབ་ Shiv Pal Yadav མཆོག ལག་ནའོ་གྲོང་ཁྱེར་གྱི་སྤྱི་ཁྱབ་ཟུར་པ་སྐུ་ཞབས་དྷའོ་ཇི་གུབ་ཏཱ་ Shri Dauji Gupta མཆོག ལོག་དྷལ་སྲིད་དོན་ཚོགས་པའི་དྲུང་ཆེ་སྐུ་ཞབས་ཨོམ་ཀཱར་སིང་ Omkar Singh ལགས། མངའ་སྡེའི་ཀོང་རེ་སི་སྲིད་དོན་ཚོགས་པའི་ཚོགས་གཞོན་སྐུ་ཞབས་ཏཱི་ཝ་རི་ Shri.Dr. T Tiwari ལགས། མངའ་སྡེའི་བྷི་ཨེས་པིའི་སྲིད་དོན་ཚོགས་པའི་དྲུང་ཆེ་སྐུ་ཞབས་སཱ་ཏི་ཤ་ཅན་དྷ་ར་མི་ཤ་རཱ་ (Shri Satish Chandra Mishra ལགས། འཕགས་བོད་འབྲེལ་མཐུད་ཚོགས་པའི་འབྲེལ་མཐུད་པ་སྐུ་ཞབས་སཱན་ཇེཡ་ཤུག་ལཱ་ Shri Sanjay Shuklaལགས། ཧིན་བོད་མཛའ་འབྲེལ་ཚོགས་པའི་ཚོགས་གཞོན་སློབ་དཔོན་སྐུ་ཞབས་རཱ་མེཤ་ཅན་ཌ་ཏི་ཝ་རི་ Prof.Ramesh Chand Tiwari ལགས་བཅས་དང་མཇལ་འཕྲད་གནང་སྟེ།

མངའ་སྡེའི་སྤྱི་ཁྱབ་བློན་ཆེན་ཟུར་པ་སྐུ་ཞབས་ཨག་ལེ་ཤི་ཡཱ་དྷབ་མཆོག

སྤྱི་འཐུས་སྐུ་ཚབ་ཚོགས་ཆུང་ནས་གཞིས་བྱེས་བོད་མི་ཡོངས་ཀྱི་ཚབ་ཞུས་ནས་སྤྱིར་རྒྱ་གར་གཞུང་མང་གཉིས་དང་། དམིགས་བསལ་ཡུ་པི་མངའ་སྡེའི་གཞུང་མང་གཉིས་ནས་ད་བར་བོད་དོན་ཐོག་རྒྱབ་སྐྱོར་དང་། ས་གནས་བོད་མི་སུད་ཚོང་བ་རྣམས་ལ་མཐུན་འགྱུར་རོགས་རམ་གང་ལེགས་གནང་བར་ཐུགས་རྗེ་ཆེ་ཞུས་གནང་བ་དང་སྦྲགས། བོད་ཀྱི་ལོ་རྒྱུས་ངོ་སྤྲོད་སྙིང་བསྡུས་དང་། རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས། འཕགས་བོད་གཉིས་དབར་ལོ་རྒྱུས་ཐོག་གི་འབྲེལ་བ་ཇི་ཡོད། དེ་བཞིན་སྤྱི་འཐུས་རྣམ་པ་ཆ་བགོས་ཀྱིས་མངའ་སྡེ་ཁག་ནང་གྲོས་ཚོགས་འཐུས་མི་སོགས་མཇལ་འཕྲད་ཀྱིས་བོད་དོན་ཞུ་སྐུལ་གནང་བཞིན་ཡོད་སྐོར།

ལག་ནའོ་གྲོང་ཁྱེར་གྱི་སྤྱི་ཁྱབ་ཟུར་པ་སྐུ་ཞབས་དྷའོ་ཇི་གུབ་ཏཱ་མཆོག་དང་ལོག་དྷལ་སྲིད་དོན་ཚོགས་པའི་དྲུང་ཆེ་སྐུ་ཞབས་ཨོམ་ཀཱར་སིང་ལགས།

བོད་མི་མང་སྤྱི་འཐུས་ལྷན་ཚོགས་ཀྱི་སྒྲོམ་གཞི། གཉིས་སྨན་དབུ་མའི་ལམ་གྱི་སྐོར་སོགས་ཀྱི་ཐོག་གསུངས་གནང་བ་མ་ཟད། བོད་དོན་སྤྱི་དང་། ལྷག་པར་བོད་རྒྱ་ཞི་མོལ་ཡོང་ཐབས་སླད་མུ་མཐུད་རྒྱབ་སྐྱོར་གང་ཐུབ་གནང་སྐྱོང་ཡོང་བའི་རེ་བསྐུལ་དང་། རྒྱ་གར་དབུས་སའི་གྲོས་ཚོགས་ནང་བོད་དོན་གླེང་སློང་དང་། བོད་དོན་ཐོག་གྲོས་ཆོད་འཇོག་ཐབས་གནང་རོགས་བཅས་ཞུས་གནང་འདུག དེ་བཞིན་དཔོན་རིགས་རྣམས་བཞུགས་སྒར་རྡ་སར་ཕེབས་གནང་མཛད་རྒྱུའི་རེ་བསྐུལ་ཡང་ཞུས་གནང་འདུག

ས་མཇ་ཝ་ཏི་སེག་གུ་ལར་སྲིད་དོན་ཚོགས་པའི་འགོ་འཁྲིད་སྐུ་ཞབས་ཤི་ཝེ་པཱལ་ཡཱ་དབ་མཆོག

སྐབས་དེར་སྤྱི་ཁྱབ་བློན་ཆེན་མཆོག་གིས་བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་དད་པ་ཆེན་པོ་ཡོད་སྐོར་གསུངས་གནང་འདུག་པ་མ་ཟད། སྤྱི་འཐུས་སྐུ་ཚབ་ཚོགས་ཆུང་ནས་ཡུ་པི་མངའ་སྡེའི་ས་གནས་ལག་ནའོ་ནང་གི་བོད་རིགས་སུད་ཚོང་བ་རྣམས་ལ་མཐུན་འགྱུར་རོགས་རམ་མུ་མཐུད་གནང་རོགས་ཞུས་པར། སྐུ་ཞབས་ཁོང་ནས་ཞལ་བཞེས་གནང་ཡོད་འདུག

མངའ་སྡེའི་ཀོང་རེ་སི་སྲིད་དོན་ཚོགས་པའི་ཚོགས་གཞོན་སྐུ་ཞབས་ཏཱི་ཝ་རི་མཆོག

དེ་བཞིན་རྒྱ་གར་གསར་འགྱུར་བརྒྱུད་ལམ་(ANI) གྱི་གསར་འགོད་པ་སྐུ་ཞབས་རཱག་ཝིན་དཱར་ (Mr Raghvendra Pandey) ལགས་ཀྱིས་བཅར་འདྲི་གནང་བར། སྤྱི་འཐུས་སྐུ་ཚབ་ཚོགས་ཆུང་ནས་དང་ལེན་ཞུས་ཏེ་མངའ་སྡེའི་བློན་ཆེན་སོགས་མཇལ་འཕྲད་ཀྱིས་བོད་དོན་ཞུ་སྐུལ་གནང་བའི་སྐོར་འགྲེལ་བརྗོད་སྙིང་བསྡུས་ཞུས་གནང་ཡོད་འདུག

མངའ་སྡེའི་བྷི་ཨེས་པིའི་སྲིད་དོན་ཚོགས་པའི་དྲུང་ཆེ་སྐུ་ཞབས་སཱ་ཏི་ཤ་ཅན་དྷ་ར་མི་ཤ་རཱ་མཆོག

ས་གནས་བོད་མིའི་སུད་ཚོང་འགོ་པ་ཚེ་རིང་དོན་གྲུབ་ལགས་དང་། རྟ་མགྲིན་ལགས་རྣམ་གཉིས་ཀྱིས་དཔོན་རིགས་མཇལ་འཕྲད་ཀྱི་ལས་རིམ་ཐོག་འབྲེལ་མཐུད་ཀྱི་མཐུན་འགྱུར་གང་ལེགས་གནང་ཡོད་འདུག །