ཕྱི་ལོ་ ༢༠༡༨ ཟླ་ ༡༠ ཚེས་ ༡༧ རེས་གཟའ་ལྷག་པ།
༄༅། །བོད་མིའི་སྒྲིག་འཛུགས་ཀྱི་ཐུགས་རྗེ་ཆེ་ཞུའི་ལས་དོན་ཚོགས་ཆུང་དང་སིམ་སྤྱི་ལས་ཁུངས་ཐུན་མོང་གི་གོ་སྒྲིག་འོག་ཧི་མཱ་ཅལ་མངའ་སྡེའི་གཞུང་མང་གཉིས་ལ་བོད་མི་ཡོངས་ནས་ཐུགས་རྗེ་ཆེ་ཞུའི་ལས་རིམ་གྱི་ཆ་ཤས་སུ་བོད་ཀྱི་ཐུན་མོང་མ་ཡིན་པའི་རིག་གཞུང་རྡུལ་ཚོན་དཀྱིལ་འཁོར་དང་གཏོར་མ་བཞེངས་པ་དང་། གཞས་སྣ་འཁྲབ་སྟོན། རིན་མེད་སྨན་བཅོས་སོགས་བོད་ཀྱི་སྲོལ་རྒྱུན་རིག་གཞུང་འགྲེམས་སྟོན་གྱི་ལམ་ནས་ཧི་མཱ་ཅལ་མངའ་སྡེའི་གཞུང་མང་གཉིས་ནས་ད་བར་བོད་དོན་ཆེད་རྒྱབ་སྐྱོར་གནང་དང་གནང་བཞིན་པར་བཀའ་དྲིན་རྗེས་དྲན་མཚོན་ཆེད་ཐུགས་རྗེ་ཞུའི་ལས་འགུལ་སྤེལ་ཡོད།
དེ་ཡང་ཕྱི་ཚེས་ ༡༦ ཉིན་སིམ་ལ་རིཇ་ Ridge ཐང་ཆེན་དུ་ཐུབ་བསྟན་རྡོ་རྗེ་བྲག་ཨེ་ཝམ་ལྕོག་སྒར་ཆོས་འཁོར་རྣམ་རྒྱལ་གླིང་དགོན་པའི་དགེ་འདུན་པ་ཁག་གཅིག་གིས་མར་རྒྱན་དང་མཆོད་པའི་ཡོ་བྱད་སྐོར། སིམ་ལ་ཇོ་ནང་མ་དགོན་རྟག་བརྟན་ཕུན་ཚོགས་ཆོས་གླིང་དགོན་པ་ནས་རྡུལ་མཚོན་དཀྱིལ་འཁོར་བཞེངས་སྟངས་སོགས་ཀྱི་སྐོར་ངོ་སྤྲོད་དང་།
བོད་ཀྱི་ཟློས་གར་ཚོགས་པས་རིག་གཞུང་འཁྲབ་སྟོན། སྨན་རྩིས་ཁང་ནས་རིན་མེད་སྨན་བཅོས་བརྟག་དཔྱད། དེ་བཞིན་ཕྱི་དྲིལ་བོད་ཀྱི་འགྲེམས་སྟོན་ཚན་པས་འཕགས་བོད་དབར་གྱི་གནའ་དེང་གི་འབྲེལ་ལམ། བཙན་བྱོལ་ནང་འགྲུལ་བཞུད་ཞེས་པའི་བརྗོད་གཞིའི་ཐོག་པར་རིས་འགྲེམས་སྟོན་དང་སིམ་ལ་དབྱངས་ཅན་དགའ་ཚལ་གླིང་མཉམ་ལས་ནས་འཐག་ལས་ལག་ཤེས་འགྲེམས་སྟོན་གནང་བ་བརྒྱུད་ཧི་མཱ་ཅལ་མངའ་སྡེའི་གཞུང་མང་གཉིས་ལ་ཐུགས་རྗེ་ཆེ་ཞུ་བ་དང་སྦྲགས་བོད་ཀྱི་ཐུན་མོང་མ་ཡིན་པའི་རིག་གཞུང་སྐོར་གོ་རྟོགས་རྒྱ་ཆེ་སྤེལ་ཡོད།
ཧི་མཱ་ཅལ་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོ་སྲུང་བརྩི་གཟབ་རྒྱས་ཞུས་པའི་སྐོར་རྒྱ་གར་དང་རྒྱལ་སྤྱིའི་གསར་འགྱུར་བརྒྱུད་ལམ་གྲགས་ཅན་གྱི་བརྙན་འཕྲིན་དང་ཚགས་ཤོག་སོགས་ཀྱི་སྟེང་དྲིལ་བསྒྲགས་རྒྱ་ཆེ་བྱུང་འདུག་པ་བཅས། །
