ཕྱི་ལོ་ ༢༠༡༨ ཟླ་ ༡༠ ཚེས་ ༢༢ རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་རྒྱ་ཡིག་ཚན་པའི་གོ་སྒྲིག་འོག་ཕྱི་ལོ་ ༢༠༡༨ ཟླ་ ༡༠ ཚེས་ ༢༢ ནས་ ༢༥ བར་ཉིན་གྲངས་བཞིའི་རིང་བཞུགས་སྒར་རྡ་སའི་ཉེ་འདབས་སུ་ཆགས་པའི་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་ཁྱབ་ཁོངས་འཛིན་སྐྱོང་སྦྱོང་བརྡར་དང་། བདེ་དོན་ཚོགས་པའི་ཐུ་མི་ཚོགས་ཁང་དུ་རྒྱ་རིགས་ལས་དོན་དང་འབྲེལ་ལམ་བྱེད་ཕྱོགས་ཀྱི་ཚོགས་འདུ་ཐེངས་དྲུག་པའི་ཐོག་དཔལ་ལྡན་སྲིད་སྐྱོང་ཆེད་ཕེབས་གནང་ཡོད།
དེ་ཡང་གོང་ཚེ་ཉིན་གྱི་སྔ་དྲོ་ཆུ་ཚོད་ ༡༡།༢༠ ཐོག་སྲིད་སྐྱོང་བློ་བཟང་སེངྒེ་མཆོག་གིས་གསུང་བཤད་གནང་དོན། རྒྱ་རིགས་འབྲེལ་མཐུད་པ་གཅིག་པུ་ཙམ་མིན་པར་རང་རིགས་གཞོན་སྐྱེས་དང་། རབ་བྱུང་ན་རྒྱ་སྐད་དང་། རྒྱ་ནག་ཐད་གོ་རྟོགས་ཡོད་མཁན་རྣམས་དང་ལྷན་དུ་འཛམ་གླིང་གི་ས་ཕྱོགས་འདྲ་མིན་ནང་རྟེན་གཞི་བྱས་པའི་རྒྱ་རིགས་མང་པོ་ཞིག་འབྲེལ་བ་བྱེད་དགོས་ཀྱི་ཡོད་སྟབས་འདིར་ཚོགས་འདུ་གོ་སྒྲིག་བྱེད་པ་ཞིག་རེད། སྔ་ལོར་མཚོན་ན་རྒྱ་སྐད་ཤེས་མཁན་རྣམས་ལྷན་འཛོམས་ཀྱི་ཚོགས་འདུ་ཞིག་ཚོགས་ཡོད།
གཞི་རྩའི་དེ་རིང་འདིར་རྒྱ་གར་གྱིས་གཙོས་པས་རྒྱལ་ཁབ་ ༡༢ ནས་ཚོགས་བཅར་བ་སླེབས་འདུག འོན་ཀྱང་ཚོགས་བཅར་བའི་གྲངས་ཀ་ད་དུང་ལོང་མི་འདུག ཚོགས་འདུ་འདི་ང་ཚོས་ཧ་ཅང་གལ་ཆེན་པོ་ཞིག་ཡིན་པར་ངོས་འཛིན་བྱས་ནས་གོ་སྒྲིག་བྱེད་ཀྱི་ཡོད། གང་ཡིན་བརྗོད་ན། བོད་མི་ས་ཡ་དྲུག་ཡོད། རྒྱ་རིགས་ཐེར་འབུམ་གཅིག་དང་། ས་ཡ་ཉིས་བརྒྱ་ཡོད། བརྒྱ་ཆར་བརྩིས་པ་ཡིན་ན་བརྒྱ་ཆ་ཕྱེད་ཀ་ལས་མེད། མདོར་ན་བོད་མི་རེ་རེར་རྒྱ་མི་ ༩༩ ལྷག་ཡོད། བྱེས་ལ་ཡོད་པའི་བོད་རིགས་རྣམས་ནས་ཕྱི་སྡོད་རྒྱ་རིགས་ས་ཡ་མེང་པོ་དེ་དག་བསྙབ་ཐབས་བྱེད་དགོས་པ་ཧ་ཅང་གལ་ཆེན་པོ་རེད།
དེང་སྐབས་འཛམ་གླིང་སྟེང་རྒྱ་ནག་གི་སྟོབས་ཤུགས་ཇེ་ཆེར་འགྲོ་བཞིན་ཡོད་སྟབས་རྒྱ་ནག་སྐོར་ལའང་དོ་སྣང་བྱེད་མཁན་མང་དུ་འགྲོ་བཞིན་ཡོད།
ཉེ་ལམ་ངོས་རང་ཅེག་སྤྱི་མཐུན་རྒྱལ་ཁབ་ Czech Republic ཏུ་འགྲོ་སྐབས་ཡུལ་དེར་གྲོས་ཚོགས་འཐུས་མི་ ༥༡ ལས་གྲུབ་པའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཞིག་གསར་འཛུགས་གནང་ནས་ད་ཆ་འཛམ་གླིང་ནང་གི་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཆེ་ཤོས་ཆགས་པ་རེད།
གཞན་ཡང་རྒྱ་ནག་གཞུང་གི་སྲིད་བྱུས་རྒྱུད་གཅིག་ལམ་གཅིག་དེ་ཉིད་ཕྱི་ལོ་ ༢༠༠༩ དང་༢༠༡༠ ལ྄ོ་ནས་སྲིད་བྱུས་འདི་སླེབས་ཡོད་སྐོར་དང་། སྲིད་བྱུས་དེར་ཤར་ཡུ་རོབ་རྒྱལ་ཁབ་ཧང་གེ་རི་ཕུད་ཡུ་རོབ་རྒྱལ་ཁབ་ ༢༧ གྱིས་སྐྱོན་བརྗོད་བྱེད་ཡོད་པ་དང་། ང་ཚོའི་ངོས་ནས་གནད་དོན་དེ་རིགས་རྒྱལ་སྤྱིའི་སྡིངས་ཆའི་སྟེང་གང་མང་སྤེལ་དགོས་པ་གལ་ཆེན་པོ་ཡོན་སྐོར།
དེ་བཞིན་ལྔ་དང་ལྔ་བཅུའི་འཆར་སྣང་སྐོར་ངོ་སྤྲོད་སྙིང་བསྡུས་གནང་མཐར་དཔལ་ལྡན་སྲིད་སྐྱོང་མཆོག་གིས་ཚོགས་བཅར་བ་ཡོངས་ལ་ཚོགས་འདུའི་ཐོག་ཆ་ཤས་གང་མང་ལེན་རྒྱུ་དང་། བགྲོ་གླེང་ལྷུག་པོ་ཡོང་བའི་རེ་འདུན་གནང་སྟེ་དྲི་བར་རྣམས་ལ་ལན་འདེབས་གནང་།
སྤྱིར་ཚོགས་འདུའི་དམིགས་ཡུལ་གཅོ་བོ་ནི། བོད་རྒྱའི་དབར་ལོ་རྒྱུས་ཀྱི་འབྲེལ་བ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་དང་རྒྱ་མི་རིགས་ལ་འབྲེལ་ལམ་བྱེད་ཕྱོགས། བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས། བོད་ཀྱི་ཁོར་ཡུག་གི་གལ་གནད་སྐོར། ཡིག་ངག་གཉིས་ཀྱི་ཐོག་ནས་འབྲེལ་ལམ་དང་ཞུ་གཏུག་ནུས་རྩལ་གོང་སྤེལ། རྒྱ་མི་རིགས་དང་འབྲེལ་ལམ་གོང་སྤེལ་གཏོང་ཕྱོགས་ཀྱི་ཐབས་བྱུས་དང་ལས་འཆར་གོ་རིམ་སྒྲིག་ཕྱོགས་ཅེས་ཀྱི་བརྗོད་གཞིའི་ཐོག་གོ་རྟོགས་སྤེལ་རྒྱུ་ཡིན་འདུག་པ་བཅས། །
