ཕྱི་ལོ་ ༢༠༡༨ ཟླ་ ༡༠ ཚེས་ ༡༦ རེས་གཟའ་མིག་དམར།

༄༅། །ཕྱི་ལོ་ ༢༠༡༨ ཟླ་ ༡༠ ཚེས་ ༡༥ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་རྒྱ་གར་བྱང་ཕྱོགས་ཧི་མཱ་ཅལ་མངའ་སྡེའི་རྒྱལ་ས་སིམ་ལའི་རིཇ་ Ridge ཐང་ཆེན་དུ་བོད་མིའི་སྒྲིག་འཛུགས་ཀྱི་ཐུགས་རྗེ་ཆེ་ཞུའི་ལས་དོན་ཚོགས་ཆུང་དང་སིམ་སྤྱི་ལས་ཁུངས་ཐུན་མོང་གི་གོ་སྒྲིག་འོག་ཧི་མཱ་ཅལ་མངའ་སྡེའི་གཞུང་མང་གཉིས་ལ་བོད་མི་ཡོངས་ནས་ཐུགས་རྗེ་ཆེ་ཞུའི་མཛད་སྒོ་གྲུབ་རྗེས་ཇོ་ནང་རྟག་བརྟན་ཕུན་ཚོགས་ཆོས་གླིང་དུ་ཆེད་ཕེབས་ཀྱིས་དགོན་པར་འཚམས་གཟིགས་གནང་ཡོད།

གཞན་ཡང་དཔལ་ལྡན་སྲིད་སྐྱོང་མཆོག་སིམ་ལ་གཏན་སློབ་དུ་ཆེད་ཕེབས་ཀྱིས་སློབ་ཕྲུག་རྣམས་ལ་སློབ་སྦྱོང་བྱེད་པའི་སྐབས་བོད་ཀྱི་སྐད་ཡིག་དང་། རིག་གཞུང་། དེ་བཞིན་རྒྱལ་རབས་ལོ་རྒྱུས་ཐོག་སློབ་སྦྱོང་དང་དོ་སྣང་གནང་དགོས་པ་དང་། ང་ཚོ་རྒྱལ་ཁབ་གཞན་གྱི་སློབ་ཕྲུག་དང་མི་འདྲ་བར་བོད་ཀྱི་རྩ་དོན་རྩོད་བཞིན་ཡོད་སྟབས་འགན་འཕར་མ་ཞིག་ཡོད་སྐོར། བོད་ཕྲུག་རྣམས་སློབ་ཕྲུག་གཞན་དང་མི་འདྲ་བ་ལས་འགན་མང་བ་ཡོད་པར་བརྟེན་སློབ་སྦྱོང་ལ་དོ་སྣང་དང་ཧུར་བརྩོན་མང་བ་བྱེད་དགོས་སྐོར། གལ་ཏེ་སློབ་སྦྱོང་ལ་ཧུར་བརྩོན་མ་བྱེད་ན་བོད་རྒྱལ་ཁབ་ཤོར་བ་དེ་བརླག་ངེས་དང་། ང་ཚོར་སྐད་ཡིག་དང་རིག་གཞུང་ཕྱུག་པོ་ཡོད་པ་དེ་དག་བརླག་འགྲོ་ངེས་ཡིན་པར་བརྟེན་ང་ཚོར་དམིགས་བསལ་གྱིས་ལས་འགན་ཆེན་པོ་ཞིག་ཡོད་སྐོར།

སློབ་ཕྲུག་རྣམས་ནས་ཐ་མ་ཁ་དང་ཉལ་ཐག་རིགས་རྩ་བ་ཉིད་ནས་འཐེན་རྒྱུ་མེད་པ་དང་། འཕྲོད་བསྟེན་ལ་དོ་སྣང་བྱེད་དགོས་པ། དེ་བཞིན་དུས་ཚོད་འཕྲོ་བརླག་མ་གཏང་བར་སློབ་སྦྱོང་ཐོག་ཧུར་བརྩོན་བྱས་པ་བརྒྱུད་རང་གི་རྐང་པའི་སྟེང་ཧྲ་ཏག་ཏག་ལངས་ཏེ་བོད་ཀྱི་རྩ་དོན་ཆེད་ཞབས་འདེགས་བསྒྲུབ་དགོས་པ་དང་། གལ་སྲིད་སློབ་སྦྱོང་ཐོག་ཧུར་བརྩོན་མ་བྱས་ན། མི་ཚེ་དོན་དང་ལྡན་པ་ཡོང་གི་མེད་སྐོར་སོགས་ཀྱི་གསུང་བཤད་གནང་།

ཕྱོགས་མཚུངས་ཐུབ་བསྟན་རྡོ་རྗེ་བྲག་ཨེ་ཝམ་ལྕོག་སྒར་ཆོས་འཁོར་རྣམ་རྒྱལ་གླིང་དུ་ཆེད་ཕེབས་ཀྱིས་དགོན་པར་འཚམས་གཟིགས་གནང་ཡོད་པ་བཅས། །