ཕྱི་ལོ་ ༢༠༡༨ ཟླ་ ༡༠ ཚེས་ ༩ རེས་གཟའ་མིག་དམར།
༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཕྱི་ལོ་ ༢༠༡༨ ཟླ་ ༡༠ ཚེས་ ༨ ཉིན་གྱི་སྔ་དྲོ་ཅེག་སྤྱི་མཐུན་རྒྱལ་ཁབ་ཀྱི་རླུང་འཕྲིན་དང་ཚགས་པར་ཁག་གཅིག་གི་གསར་འགོད་པའི་བཅར་འདྲིར་དང་ལེན་གནང་བ་དང་འབྲེལ་ཅེག་སྤྱི་མཐུན་རྒྱལ་ཁབ་ཀྱི་གཞུང་མང་གཉིས་ནས་ད་བར་བོད་དོན་ཆེད་ལྷག་བསམ་ཟོལ་མེད་ཀྱིས་རྒྱབ་སྐྱོར་གནང་དང་གནང་བཞིན་པར་ཐུགས་རྗེ་ཆེ་ཞུས་ཡོད།
ཉིན་རྒྱབ་དཔལ་ལྡན་སྲིད་སྐྱོང་མཆོག་གིས་ཅེག་སྤྱི་མཐུན་རྒྱལ་ཁབ་ Czech Republic ཀྱི་རྒྱལ་ས་པི་རག་ Prague ནང་རྟེན་གཞི་བྱས་པའི་ཛོ་ཧྥིན་ཕོ་བྲང་ Zofin Palace རིག་གཞུང་བསྟི་གནས་ཁང་གི་ཚོགས་ཁང་ནང་༢༠༠༠ ཞི་བདེའི་གླེང་སྟེགས་ཞེས་པའི་བཞུགས་མོལ་ཚོགས་འདུའི་སྟེང་མཉམ་ཞུགས་གནང་། ཚོགས་འདུ་གཙོ་སྐྱོང་བ་སྐུ་ཞབས་ཊོམ་སི་པོ་འཇར་ Toms Pojar ལགས་དང་། བཞུགས་མོལ་ཚོགས་འདུའི་ཐོག་གསུང་བཤད་གནང་མཁན་ཨུ་རུ་སུ་དང་ཡུ་རོབ་ཨེ་ཤི་ཡའི་སློབ་སྦྱོང་བསྟི་གནས་ཁང་གི་འགན་འཛིན་ཐེ་རེ་ས་ Theresa Fallon ལགས་རེད། ཚོགས་འདུ་གཙོ་སྐྱོང་བ་སྐུ་ཞབས་ཊོམ་སི་པོ་འཇར་ལགས་ཀྱིས་རྒྱ་ནག་གིས་གོ་ལ་ཡོངས་ལ་ཁ་གཏད་གཅོག་གི་ཡོད་དམ་ཞེས་པའི་བརྗོད་གཞི་དང་འབྲེལ་དྲི་བ་བཏོན་སྐབས་དཔལ་ལྡན་སྲིད་སྐྱོང་མཆོག་གིས་ལན་འདེབས་གནང་དོན།
ཕྱི་ལོ་ ༢༠༡༧ ལོར་རང་དབང་ཁང་པས་ Freedom House སྙན་ཐོ་བཏོན་པ་ལྟར་ན་རྒྱ་ནག་ནི། འཛམ་གླིང་ནང་དྲ་རྒྱའི་རང་དབང་ཐོག་དམ་བསྒྲགས་ཤུགས་ཆེ་ཤོས་བྱེད་མཁན་གྱི་རྒྱལ་ཁབ་རེད་ཅེས་འཁོད་ཡོད། རྒྱ་ནག་སྟོབས་ཤུགས་འཕེལ་བཞིན་པའི་སྐབས་འདིར་རང་གི་ནོར་འཁྲུལ་ཡོ་བསྲང་བྱེད་རྒྱུའི་ཚབ་ཏུ་དྲིལ་བསྒྲགས་བྱེད་བཞིན་ཡོད་པ་མ་ཟད། རྒྱ་ནག་གི་ཤུགས་རྐྱེན་ཨ་རིའི་ཤེས་ཡོན་བསྟི་གནས་ཁང་དང་། ཡུ་རོབ། ཨོ་སི་ཊོ་ལི་ཡ་སོགས་ཀྱི་ནང་སླེབས་ཡོད།
རྒྱ་ནག་གཞུང་གི་འཛུགས་སྐྲུན་ཡར་རྒྱས་ཀྱི་སྲིད་བྱུས་ཁག་ལག་བསྟར་བྱས་པར་བརྟེན་ནས་རང་བྱུང་ཐོན་ཁུངས་ཀྱིས་ཕྱུག་པའི་བོད་མཐོ་སྒང་གི་ཁོར་ཡུག་ལ་གཏོར་བརླག་ཚབས་ཆེན་འབྱུང་གི་ཡོད་པ་མ་ཟད། གཏེར་ཁ་སྔོག་འདོན་དང་ཆུ་མཛོད་བརྒྱབ་པའི་རྐྱེན་གྱིས་ཨེ་ཤི་ཡའི་གནམ་གཤིས་ལ་འགྱུར་ལྡོག་ཕྱིན་པ་དང་ལྷན་གོ་ལའི་ཚ་དྲོད་འཕེལ་བཞིན་ཡོད། རྒྱ་གཞུང་གིས་རྒྱུད་གཅིག་ལམ་གཅིག་One Belt OneRoad དང་། ཨེ་ཤི་ཡའི་འཛུགས་སྐྲུན་མ་དངུལ་དངུལ་ཁང་Asian Infrastructure Investment Bank སོགས་ཀྱི་ལས་འཆར་ཁག་ལག་བསྟར་གྱིས་མང་གཙོའི་རིན་ཐང་དང་འགྲོ་བ་མིའི་ཐོབ་ཐང་ལ་སྣང་ཆུང་དང་རྩིས་མེད་བཏང་སྟེ་རྒྱ་གཞུང་གི་ཤུགས་རྐྱེན་རྒྱལ་སྤྱིའི་སྡིངས་ཆའི་ཐོག་སྤེལ་ཐབས་བྱེད་བཞིན་ཡོད།
རྒྱ་ནག་འགོ་ཁྲིད་ཀྱི་འཐབ་བྱུས་ནི་མང་གཙོ་མེད་པའི་རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཟེར་བ་དེ་ཡིན་ཞིང་། རྒྱ་ནག་མི་མང་གིས་མང་གཙོ་མཐོང་འདོད་ཡོད་ལ་རྒྱ་ནག་དེ་བཞིན་མང་གཙོའི་ལུང་པ་ཞིག་ལ་ངེས་པར་དུ་འགྱུར་དགོས། རྒྱ་ནག་གི་ཤེས་ཡོན་པ་དང་། གསར་འགོད་པ་སོགས་ཡུ་རོབ་ནང་རྒྱུན་དུ་ཡོང་གི་ཡོད་པ་ལྟར། རྒྱུ་མཚན་ཅིའི་ཕྱིར་ཡུ་རོབ་ཀྱི་གསར་འགོད་པ་དང་ཤེས་ཡོན་པ་སོགས་བོད་ནང་ཡོང་འཇུག་གི་མེད། ཉེ་ཆར་ཨ་རིའི་གྲོས་ཚོགས་འོག་མའི་ནང་ཨ་རིའི་གཞུང་གི་ལས་བྱེད་མི་སྣ་དང་། བོད་པ་ཨ་རིའི་མི་སེར། གསར་འགོད་པ་སོགས་བོད་ནང་ཕར་འགྲོ་ཚུར་འོང་གི་གོ་སྐབས་འདྲ་མཉམ་གྱི་ཁྲིམས་འཆར་གཏན་འབེབས་གནང་བ་བཞིན། ཡུ་རོབ་ནས་ཀྱང་དེ་ལྟ་བུའི་ཁྲིམས་འཆར་ཞིག་གཏན་འབེབས་གནང་དགོས།
བོད་ནང་གི་གནས་སྟངས་ནི་ད་ལྟའི་ཆར་རིག་གནས་གསར་བརྗེ་བསྐྱར་གསོ་བྱུང་བ་ལྟ་བུ་ཡིན་པ་མ་ཟད། འདས་པའི་ལོ་ངོ་ ༡༠ ནང་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་གྱུར་ཡོད། བོད་ནང་ད་བར་བོད་མི་ ༡༥༢ ཀྱིས་རྒྱ་གཞུང་གི་དྲག་གནོན་ཅན་གྱི་སྲིད་བྱུས་ལ་ངོ་རྒོལ་གྱིས་རང་ལུས་མེར་སྲེག་གནང་ཡོད། འདས་པའི་ལོ་ངོ་ ༦༠ ནང་བོད་ལ་གནས་ཚུལ་ཐབས་སྡུག་པོ་བྱུང་བ་བཞིན་ཡུ་རོབ་སྤྱི་མཐུན་ཚོགས་པ་དང་ཡུ་རོབ་མི་མང་ལ་དེ་ལྟར་འབྱུང་མ་འཇུག་རོགས། བོད་མི་ཚོར་གནས་ཚུལ་ཐབས་སྡུག་པོ་བྱུང་བ་བཞིན་ཁྱེད་ཚོ་ལའང་དེ་ལྟར་འབྱུང་སྲིད་པ་ཞིག་རེད། བོད་ནང་གནས་ཚུལ་ཐབས་སྡུག་པོ་བྱུང་བ་བཞིན་ཡུ་རོབ་ནང་དེ་ལྟར་མི་འབྱུང་བའི་རེ་བ་དང་། ང་ཡུ་རོབ་ནང་སླེབས་དགོས་དོན་ནི་དེ་དྲན་སྐུལ་གཏོང་སླད་སླེབས་པ་ཡིན། ཞེས་གསུངས། །
