ཕྱི་ལོ་ ༢༠༡༨ ཟླ་ ༡༠ ཚེས་ ༣ རེས་གཟའ་ལྷག་པ།
༄༅། །ཕྱི་ལོ་ ༢༠༡༨ ཟླ་ ༡༠ ཚེས་ ༣ ཉིན་གྱི་སྔ་དྲོ་ཆུ་ཚོད་ ༡༡།༣༠ ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བཀའ་ཤག་ཚོགས་ཁང་ནང་བཙན་བྱོལ་བོད་མིའི་འོས་བསྡུའི་སྒྲིག་གཞི་བསྐྱར་བཅོས་དང་འབྲེལ་བའི་གསར་འགོད་གསལ་བསྒྲགས་ཤིག་སྤེལ་ཡོད།
དེ་ཡང་ཐོག་མར་དཔལ་ལྡན་སྲིད་སྐྱོང་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་སྐབས་འོས་བསྡུའི་སྒྲིག་གཞིར་བསྐྱར་བཅོས་ཁྲིམས་ཡིག་ལ་མཚན་རྟགས་བཀོད་པ་དང་སྦྲགས་གསར་འགོད་པ་རྣམས་ལ་གསུང་དོན། ཚོགས་དྲུང་ལྷ་ཁང་ཚེ་རིང་སྟོབས་རྒྱལ་ལགས་འདིར་ཆེད་དུ་ཕེབས་པར་ཐུགས་རྗེ་ཆེ་ཞུ་རྒྱུ་ཡིན།
དེ་རིང་འོས་བསྡུའི་སྒྲིག་གཞིར་བསྐྱར་བཅོས་ཡིག་ཆར་སྲིད་སྐྱོང་གིས་མཚན་རྟགས་བཀོད་པར་བརྟེན་ད་ནས་བཟུང་ཁྲིམས་སུ་གཏན་འབེབས་བྱུང་བ་རེད། གཞི་རྩའི་ཆ་ནས་ཚང་མས་མཁྱེན་གསལ་རེད། དེ་སྔ་སྲིད་སྐྱོང་དང་སྤྱི་འཐུས་འོས་བསྡུ་དུས་ཡུན་རིང་དྲགས་པའི་རྐྱེན་གྱིས། དུས་ཚོད་ཐུང་དུ་གཏང་དགོས་ཀྱི་འདུག་ཅེས་གསུང་མཁན་སྤྱི་མོས་བྱུང་ཡོད། དེ་སྔ་ཡིན་ན་དངོས་གཞིའི་འོས་བསྡུའི་སྐབས་སུ་ཟླ་བ་དྲུག་དང་། ཉི་མ་རྩི་བ་ཡིན་ན་ཉིན་གྲངས་ ༡༨༠ འགོར་གྱི་ཡོད། དེའི་སྒང་སྔོན་འགྲོ་བརྩིས་ན་ཉིན་གྲངས་ ༢༠༠ ལྷག་འགོར་གྱི་ཡོད། སླད་ཕྱིན་ཉིན་གྲངས་ ༡༠༠ ལས་ཉུང་བའི་ནང་འོས་བསྡུ་ཚར་དགོས་ཀྱི་ཡོད། དུས་ཚོད་ལྡབ་གཅིག་ཉུང་དུ་བཏང་ཡོད། ཕྱི་ལོ་ ༢༠༡༡ དང་། ལྷག་པར་ཕྱི་ལོ་ ༢༠༡༦ ལོར་ཆོལ་ཁའི་ཕྱོགས་ཞེན་གྱི་གནས་ཚུལ་མང་པོ་བྱུང་བ་རེད།
སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ལས་ཉིན་དགུ་པའི་སྔ་དྲོའི་ཚོགས་དུས་ཐོག་བཙན་བྱོལ་བོད་མིའི་འོས་བསྡུའི་སྒྲིག་གཞི་བསྐྱར་བཅོས་ཁྲིམས་འཆར་ཡོངས་སུ་གྲུབ་སྟེ། བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ཉི་ཤུ་རྩ་བཞི་པ། དངུལ་དངོས་སོགས་ལྐོག་རྔན་སྤྲོད་ལེན་དང་རྒྱུད་སྐུལ་ཐབས་ཤེས་ཞེས་པའི་ནང་གསེས་བདུན་པའི་ཐོག་ཆོལ་ཁ་གསུམ་གྱི་སྒྲིག་འཛུགས་དང་ཆོས་བརྒྱུད་ཁག གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་ཁག་བཅས་ཀྱིས་སྲིད་སྐྱོང་དང་སྤྱི་འཐུས་ཀྱི་འོས་གཞི་འདོན་པ་དང་། རྒྱབ་གཉེར་གསལ་བསྒྲགས་རིགས་བྱེད་མི་ཆོག་ཅེས་བཟོ་བཅོས་ཁྲིམས་འཆར་ལ་བགྲོ་གླེང་ལྷུག་པོ་གནང་མཐར། ངོ་ཡོད་སྤྱི་འཐུས་གསུམ་ཆ་གཉིས་ཀྱི་རྒྱབ་སྐྱོར་ཐོག་བཟོ་བཅོས་ཁྲིམས་འཆར་དེ་གཏན་འབེབས་ཀྱིས་ཁ་གསལ་པོ་ཆགས་ཡོད། རྒྱུན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་བཅའ་ཁྲིམས་ཀྱི་དགོངས་དོན་ལྟར་ཆབ་སྲིད་ཚོགས་པ་མེད་པའི་མང་གཙོ་ཞེས་པ་དེ་ཁ་ཡོད་ལག་ཡོད་ཆགས་ཡོད།
ད་ནས་བཟུང་སྲིད་སྐྱོང་དང་སྤྱི་འཐུས་ཀྱི་འོས་མིར་བཞེང་དགོས་ན་གང་ཟག་སྒེར་སོ་སོས་བཞེངས་ཏེ་འོས་ཤོག་ཐོབ་ཐབས་དགོས་པ་མ་གཏོགས། ཆོལ་ཁ་དང་ཚོགས་པ་ཁག་གིས་སྲིད་སྐྱོང་དང་སྤྱི་འཐུས་ཀྱི་འོས་མི་མིང་འདོན་བྱེད་པ་དང་གསལ་བསྒྲགས་རིགས་གཏན་ནས་སྤེལ་མི་ཆོག་པ་གསལ་པོ་ཆགས་ཡོད། དེ་དངོས་གནས་འགྲིག་འདུག་བསམ་པ་བྱུང་།
གཞི་རྩའི་བོད་པའི་མི་འབོར་དེ་རྒྱལ་ཁབ་མི་འདྲ་བ་སུམ་ཅུ་བཞི་བཅུའི་ནང་ཁ་འཐོར་ནས་གནས་ཡོད་ཀྱང་། མི་འབོར་གྲངས་ཀ་བརྩི་བ་ཡིན་ན་འབུམ་གཅིག་དང་ཕྱེད་ཀ་མ་གཏོགས་མེད། དེར་བརྟེན་ང་ཚོའི་སྤྱི་ཚོགས་ནང་འོས་མི་གང་འདྲ་ཞིག་བཞེངས་རུང་བོད་པའི་མི་འབོར་འབུམ་གཅིག་དང་ཕྱེད་ཀས་ཧ་མ་གོ་བ་དེ་འདྲའི་གནད་འགག་མཐོང་གི་མི་འདུག ཆབ་སྲིད་ཚོགས་པ་ཡོད་པའི་ལུང་པ་ཁག་གི་ནང་གཟིགས་དང་། ཆབ་སྲིད་ཚོགས་པའི་དགོས་དོན་དང་རྩ་དོན་གཉིས་བར་ལ་བསྡུར་ཡོང་དུས་སྐབས་རེ་ཆབ་སྲིད་ཚོགས་པའི་དགོས་དོན་གལ་ཆེ་བ་བརྩིས་ཏེ་རྩ་དོན་གལ་ཆེ་བ་མ་བརྩིས་མཁན་ཡོང་གི་ཡོད། ཆབ་སྲིད་ཚོགས་པའི་ནང་ཕྱག་ལས་གནང་མཁན་མི་སྒེར་ཡོང་གི་ཡོད།
དེར་བརྟེན་སྒེར་དོན་དང་ཚོགས་པ་གཉིས་ལས་སྒེར་དོན་གལ་ཆེ་བར་བརྩིས་ཏེ། ཚོགས་པ་བེད་སྤྱོད་བཏང་ནས་རྩ་དོན་ལ་མ་འཚམ་པའི་ཕྱག་ལས་གནང་སྲིད་པ་རེད། ཆབ་སྲིད་ཚོགས་པ་མེད་པའི་ཐོག་མང་གཙོའི་ལམ་དུ་ཕྱིན་པ་ཡིན་ན། ཕུགས་ལ་ལྷིང་འཇགས་དང་ཞི་འཇམ་ཡོང་གི་རེད། དེར་བརྟེན་གྲོས་ཚོགས་ནས་ཁྲིམས་འཆར་གཏན་འབེབས་གནང་བ་དེར་རྒྱབ་སྐྱོར་ཡོད། ཅེས་ཞུ་རྒྱུ་ཡིན།
གཞི་རྩའི་སྔོན་འགྲོ་དང་དངོས་གཞི་གཉིས་ཀ་དགོས་ཀྱི་ཡོད། སྲིད་སྐྱོང་གི་སྔོན་འགྲོ་དང་དངོས་གཞིའི་འོས་བསྡུའི་སྐབས་དབུས་འོས་བསྡུ་ལས་ཁང་ནས་སྲིད་སྐྱོང་གི་དངོས་གཞིའི་འོས་གཞི་གཉིས་ལས་མ་ཉུང་བ་གསལ་བསྒྲགས་བྱེད་དགོས་པ་དང་། གལ་ཏེ་འོས་གཞི་གཅིག་ལས་མེད་པ་དང་། དེ་ལ་སྔོན་འགྲོའི་འོས་ཤོག་ཁྱོན་འབོར་གྱི་བརྒྱ་ཆ་ ༥༡ ལས་མི་ཉུང་བའི་རྒྱབ་སྐྱོར་ཐོབ་ཡོད་ཚེ་ཁ་གཏད་མེད་པའི་སྲིད་སྐྱོང་ལ་འདེམས་ཐོན་བྱུང་བར་ངོས་འཛིན་གསལ་བསྒྲགས་བྱ་རྒྱུ། མེད་ཚེ་སྔོན་འགྲོའི་འོས་བསྡུ་བསྐྱར་དུ་བྱེད་དགོས། འོན་ཀྱང་སྔོན་འགྲོའི་འོས་བསྡུའི་སྐབས་འོས་མི་གཅིག་ལ་འོས་ཤོག་ཁྱོན་འབོར་བརྒྱ་ཆ་ ༦༠ ཡན་ཐོབ་ཡོད་ཚེ་དངོས་གཞིའི་ལས་རིམ་འགྲོ་མི་དགོས་པར་སྲིད་སྐྱོང་ལ་འདེམས་ཐོན་བྱུང་བར་ངོས་འཛིན་གསལ་བསྒྲགས་བྱ་རྒྱུ་བཅས་ངོ་ཡོད་སྤྱི་འཐུས་གསུམ་ཆ་གཉིས་ཀྱི་ཐོག་ནས་གཏན་འབེབས་གནང་ཡོད། ད་རེས་གྲོས་ཚོགས་ནས་ཁྲིམས་འཆར་གཏན་འབེབས་གནང་བ་དེས་ཏན་ཏན་ང་ཚོ་སྤྱི་ཚོགས་དང་འོས་བསྡུ་ལྷིང་འཇགས་ཡོང་བར་ཕན་ཐོགས་ཡོང་རྒྱུ་ཡིན་པར་ཡིད་ཆེས་ཡོད། ཅེས་གསུངས། །
