ཕྱི་ལོ་ ༢༠༡༨ ཟླ་ ༡༠ ཚེས་ ༣ རེས་གཟའ་ལྷག་པ།
༄༅།།འདི་གར་ཆེས་མཐོའི་ཁྲིམས་ཞིབ་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༡༠ ཚེས་ ༡ ཉིན་གྱི་ཕྱི་དྲོ་ཆུ་ཚོད་ ༦ ཐོག་མེ་གྷན་བོད་ཀྱི་གསོལ་མགྲོན་ཁང་དུ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་མཆོག་དང་། ཁྲིམས་ཞིབ་པ་གཞན་གཉིས་མཆོག བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོ་མཆོག དཔལ་ལྡན་སྲིད་སྐྱོང་མཆོག་གིས་དབུས་བཀའ་བློན་རྣམ་པ། འོས་བསྡུའི་འགན་འཛིན་དང་འདེམས་ལྷན་ཚོགས་གཙོ་གཅིག་ལྕོགས་བཅས་དང་། ཆེས་མཐོའི་ཁྲིམས་ཞིབ་ཁང་གི་ལས་བྱེད་ཆེ་ཕྲ་ལྷན་འཛོམས་ཀྱིས་ཆེས་མཐོའི་ཁྲིམས་ཞིབ་པ་ཟུར་པ་ཆོས་ཁྲི་སྟེང་པ་ངག་དབང་ཆོས་གྲགས་མཆོག་ལ་གཞུང་འབྲེལ་ཕེབས་སྐྱེལ་གསོལ་སྟོན་འདེགས་འབུལ་ཞུས་ཡོད།
གསོལ་སྟོན་སྐབས། ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གིས་ཁྲིམས་ཞིབ་པ་ཟུར་པ་ངག་དབང་ཆོས་གྲགས་མཆོག་གིས་ད་བར་བོད་མིའི་སྒྲིག་འཛུགས་ནང་མི་ལོ་ ༤༣ ཙམ་ལ་སྲི་ཞུ་ཞབས་འདེགས་བསྒྲུབས་ཡོད་པར་བསྔགས་བརྗོད་དང་། མ་འོངས་པར་སྐུ་འཚོ་བདེ་བའི་འཚམས་སྨོན་གྱིས་བརྒྱན་ཏེ་དྲན་རྟེན་མཚོན་བྱེད་དུ་དངུལ་ལས་གྲུབ་པའི་མཆོད་ཀོང་ཞིག་དང་། སྐྱེས་འཕྲིན་བཅས་གནང་ཡོད། ཁྲིམས་ཞིབ་པ་ཟུར་པ་ངག་དབང་ཆོས་གྲགས་མཆོག་གིས་ལས་དོན་ཉམས་མྱོང་སྙིང་བསྡུས་ཤིག་ངོ་སྤྲོད་དང་ཐུགས་རྗེ་ཆེ་ཞུས་ཡོད།
ཁྲིམས་ཞིབ་པ་ཟུར་པ་གང་ཉིད་ཕྱི་ལོ་ ༢༠༡༣ ལོར་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་དྲུག་པའི་ཐོག་འདེམས་ཐོན་བྱུང་ཞིང་། ཕྱི་ལོ་ ༢༠༡༣ ཟླ་ ༡༠ ཙེས་ ༣ ནས་ཕྱི་ལོ་ ༢༠༡༨ ཟླ་ ༩ ཚེས་ ༢ བར་ལོ་ངོ་བཞི་དང་ཟླ་བ་བཅུ་གཅིག་ཙམ་གྱི་རིང་ཁྲིམས་ཞིབ་པའི་མཛད་ཁུར་བསྐྱེད་བཞེས་གནང་ཡོད་པ་བཅས། །
