ཕྱི་ལོ་ ༢༠༡༨ ཟླ་ ༩ ཚེས་ ༥ རེས་གཟའ་ལྷག་པ།
༄༅། །ཕྱི་ལོ་ ༢༠༡༨ ཟླ་ ༩ ཚེས་ ༣ ཉིན་གྱི་སྔ་དྲོ་ཨིན་ཡུལ་གྱི་ས་གནས་བོད་རིགས་དང་བོད་དོན་རྒྱབ་སྐྱོར་བ་ ༨༠ ལྷག་ལྷན་འཛོམས་ཀྱིས་རྒྱལ་ས་ལོན་ཌོན་གྱི་ཤར་ཕྱོགས་སུ་རྟེན་གཞི་བྱས་པའི་ཝལ་ཐིམ་ཧྥོར་རད་སི་ཊི་Waltham Forest Town Hall གྲོང་སྡེའི་ཚོགས་ཁང་གི་མདུན་ཐང་དུ་ཐེངས་དང་པོར་བོད་ཀྱི་རྒྱལ་དར་སྒྲེང་འཛགས་གནང་འདུག
དེ་ཡང་གྲོང་སྡེའི་སྤྱི་ཁྱབ་པ་སཱ་ལེ་ལི་ཊལ་འཇོན་ Sally Littlejohn ལགས་དང་གྲོང་སྡེའི་སྤྱི་ཁྱབ་ལྷན་ཁང་གི་འགན་འཛིན་ཁི་ལར་ཁོ་གྷི་ཧི་ལི་ Clare Coghill ལགས། ཚོགས་མི་བྷར་བྷེ་རི་ Kastriot Berberi ལགས། དེ་བཞིན་སྤྱི་ཁྱབ་ལྷན་ཁང་གི་ལས་བྱེད་ཁག་གཅིག་བཅས་བོད་ཀྱི་རྒྱལ་དར་སྒྲེང་འཛུགས་ཀྱི་མཛད་སྒོར་མཉམ་ཞུགས་གནང་འདུག
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་རྣམས་ལ་མང་གཙོའི་ལམ་བཟང་གསོལ་སྩལ་བཀའ་དྲིན་བསྐྱངས་ཏེ་མི་ལོ་ ༥༨ འཁོར་བའི་དུས་ཆེན་མཛད་སྒོ་དང་སྟབས་བསྟུན་བོད་ཀྱི་རྒྱལ་དར་སྒྲེང་འཛུགས་གནང་བ་ཞིག་ཡིན་འདུག གྲོང་སྡེའི་སྤྱི་ཁྱབ་ལྷན་ཁང་གི་ཚོགས་མི་བྷར་བྷེ་རི་ལགས་ཀྱིས་བོད་ཀྱི་རྒྱལ་དར་སྒྲེང་འཛུགས་ཀྱི་མཛད་སྒོའི་ཐོག་མཉམ་ཞུགས་གནང་མཁན་ཡོངས་ལ་ཕེབས་བསུ་དང་སྦྲགས། ཐེངས་འདིར་བོད་ཀྱི་རྒྱལ་དར་སྒྲེང་འཛུགས་ལས་འགུལ་གྱི་བརྒྱུད་རིམ་དེ་བཞིན་འདས་པའི་ཟླ་ཤས་རིང་ས་གནས་ཀྱི་བོད་མི་དང་ལྷན་གྲོས་བསྡུར་གནང་བའི་སྐོར་སོགས་གསུང་བཤད་མདོར་བསྡུས་ཤིག་གནང་། གྲོང་སྡེའི་སྤྱི་ཁྱབ་པས་བོད་རིགས་སྤུན་ཟླ་མང་པོ་ཞིག་མཛད་སྒོར་ཕེབས་པར་ཁོང་དགའ་ཚོར་ཆེན་པོའི་སྒོ་ནས་བོད་ཀྱི་མང་གཙོའི་དུས་ཆེན་ལ་ཚང་མར་འཚམས་འདྲིའི་བཀྲ་ཤིས་བདེ་ལེགས་ཞུས་ཡོད།
ཝལ་ཐིམ་ཧྥོར་རད་སི་ཊི་གྲོང་སྡེའི་སྤྱི་ཁྱབ་ལྷན་ཁང་གི་འགན་འཛིན་ཁི་ལར་ཁོ་གྷི་ཧི་ལི་ལགས་ཀྱིས། ལྟ་ན་སྡུག་པའི་བོད་ཀྱི་བུད་མེད་དང་བུ་མོ་ལོ་ཆུང་ཚོས་རང་གི་ཐུན་མིན་སྲོལ་རྒྱུན་གྱི་ཆས་གོས་གྱོན་ནས་མཛད་སྒོར་ཕེབས་པ་མཐོང་སྐབས་དགའ་ཚོར་ཆེན་པོ་བྱུང་བ་མ་ཟད། གྲོང་སྡེའི་སྤྱི་ཁྱབ་ལྷན་ཁང་ལ་ ༢༠༡༩ ལོའི་ལོན་ཌོན་གྲོང་སྡེ་རིག་གཞུང་ Borough of Culture in 2019 གི་གཟེངས་རྟགས་ཨང་དང་པོ་ཐོབ་པར་གཏམ་བཟང་གི་གནས་ཚུལ་དང་། བོད་མི་དང་བོད་ཀྱི་རིག་གཞུང་དཔེ་མཚོན་དུ་བཀོད་དེ་སྣ་མང་རིག་གཞུང་གིས་ཕྱུག་པའི་ལོན་ཌོན་གྲོང་སྡེའི་སྐོར་གསུང་བཤད་གནང་།
ཨིན་ཡུལ་སྐུ་ཚབ་དོན་གཅོད་ཆོས་འཕེལ་ཚེ་རིང་ལགས་ཀྱིས་ཝལ་ཐིམ་ཧྥོར་རད་སི་ཊི་གྲོང་སྡེའི་སྤྱི་ཁྱབ་པ་སཱ་ལེ་ལི་ཊལ་འཇོན་ལགས་དང་ཝལ་ཐིམ་ཧྥོར་རད་སི་ཊི་གྲོང་སྡེའི་སྤྱི་ཁྱབ་ལྷན་ཁང་གི་འགན་འཛིན་ཁི་ལར་ཁོ་གྷི་ཧི་ལི་ལགས། ཚོགས་མི་བྷར་བྷེ་རི་ལགས། དེ་བཞིན་སྤྱི་ཁྱབ་ལྷན་ཁང་གི་ལས་བྱེད་སོགས་བོད་ཀྱི་རྒྱལ་དར་སྒྲེང་འཛུགས་ཀྱི་མཛད་སྒོར་ཆེད་དུ་ཕེབས་པར་ཐུགས་རྗེ་ཆེ་ཞུས་པ་དང་སྦྲགས། བཙན་བྱོལ་བོད་མིའི་མང་གཙོའི་འཕེལ་རིམ་དང་། སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་མང་གཙོའི་ལམ་བཟང་གསོལ་སྩལ་བཀའ་དྲིན་བསྐྱངས་ཏེ་མི་ལོ་ ༥༨ འཁོར་བའི་དུས་དྲན་མཛད་སྒོ་དེ་བཞིན་འཛམ་གླིང་གི་ས་ཕྱོགས་གང་སར་གནས་པའི་བོད་རིགས་སྤུན་ཟླ་ཡོངས་ནས་སྲུང་བརྩི་ཞུས་པའི་སྐོར་སོགས་གསུང་བཤད་གནང་། དེ་རྗེས་བོད་ཀྱི་གཞས་སྣ་འཁྲབ་སྟོན་གཟིགས་འབུལ་ཞུ་སྐབས་ཚོགས་བཅར་བ་ཡོངས་ནས་དོ་སྣང་དང་དགའ་བསུ་ཆེན་པོ་ཞུས་འདུག
ཝལ་ཐིམ་ཧྥོར་རད་སི་ཊི་གྲོང་སྡེའི་སྤྱི་ཁྱབ་པ་མཆོག་གིས་ཚོགས་བཅར་བ་ཡོངས་སྤྱི་ཁྱབ་ལྷན་ཁང་གི་ཚོགས་ཁང་དུ་མགྲོན་འབོད་གནང་བ་དང་། སྐབས་དེར་ཨིན་ཡུལ་བོད་རིགས་ཚོགས་པའི་ཚོགས་གཙོ་སྤེན་པ་བློ་བཟང་ལགས་ཀྱིས་གྲོང་སྡེའི་སྤྱི་ཁྱབ་པ་སཱ་ལེ་ལི་ཊལ་འཇོན་མཆོག་དང་གྲོང་སྡེའི་སྤྱི་ཁྱབ་ལྷན་ཁང་གི་འགན་འཛིན་ཁི་ལར་ཁོ་གྷི་ཧི་ལི་ལགས། ཚོགས་མི་བྷར་བྷེ་རི་ལགས། དེ་བཞིན་སྤྱི་ཁྱབ་ལྷན་ཁང་གི་ལས་བྱེད་སོགས་ནས་ཐེངས་འདིའི་བོད་ཀྱི་རྒྱལ་དར་སྒྲེང་འཛུགས་ཀྱིས་ལོ་རྒྱུས་རང་བཞིན་ལྡན་པའི་གྲུབ་འབྲས་བྱུང་བར་ཐུགས་རྗེ་ཆེ་ཞུ་གནང་བ་མ་ཟད། འབྱུང་འགྱུར་ཡང་མུ་མཐུད་སྤྱི་ཁྱབ་ལྷན་ཁང་གི་རྒྱབ་སྐྱོར་འོག་ལོ་ལྟར་བོད་ཀྱི་རྒྱལ་དར་སྒྲེང་འཛུགས་ཀྱི་མཛད་སྒོ་སྲུང་བརྩི་ཞུ་ཐུབ་པའི་རེ་བ་ཡོད། ཅེས་གསུངས་པ་དང་མཛད་སྒོ་གྲོལ། །
