ཕྱི་ལོ་ ༢༠༡༨ ཟླ་ ༩ ཚེས་ ༣ རེས་གཟའ་ཟླ་བ།

༄༅། །འདི་གར་ལྷོ་སྤྱི་ལས་ཁུངས་ནས་ཕྱི་ལོ་ ༢༠༡༨ ཟླ་ ༩ ཚེས་ ༣ ཉིན་བཏང་གནས་ནང་འཁོད་དོན།   བོད་རྒྱལ་ལོ་ ༢༡༤༥ ཕྱི་ལོ་ ༢༠༡༨ ཟླ་ ༩ ཚེས་ ༢ རེས་གཟའ་ཉི་མའི་ཉིན་སྦེང་ལོར་གྲོང་ཁྱེར་གནས་སྡོད་བོད་རིགས་སེར་སྐྱ་མི་མང་དང་སློབ་ཕྲུག་བཅས་ནས་བོད་ཀྱི་མང་གཙོ་དབུ་བརྙེས་ཏེ་མི་ལོ་ ༥༨ འཁོར་བའི་དུས་ཆེན་ཁྱད་པར་ཅན་སྲུང་བརྩི་ཞུས་ཡོད། དེ་ཡང་གོང་ཚེས་ཉིན་གྱི་སྔ་དྲོའི་ཆུ་ཚོད་ ༩ པའི་ཐོག་བོད་རིགས་སེར་སྐྱ་མང་ཚོགས་ཚང་འཛོམས་ཀྱིས་དཀར་ཕྱོགས་སྐྱོང་བའི་ལྷ་སྲུང་རྣམས་ལ་འཕྲིན་བསྐུལ་གནད་སྨིན་འབད་སྒྲུབ་ཞུས་རྗེས་ཀྭི་བསོ་ལྷ་རྒྱལ་འཐེན། དེ་རྗེས་ཆུ་ཚོད་ ༡༠ པའི་ཐོག་བོད་ཁྱིམ་ཚོགས་ཁང་དུ་མཛད་སྒོ་དངོས་གཞི་དབུ་འཛུགས་ཀྱི་ཐོག་མར་སྐུ་མགྲོན་གཙོ་བོ་ Rev. Father Pradeep Kumar Samad, Associate Director, St. John’s Medical College & Hospital མཆོག་དང༌། ལྷོ་སྤྱི་ཆོས་འཕེལ་ཐུབ་བསྟན་ལགས་རྣམ་གཉིས་ཀྱིས་མར་མེ་ཞལ་ཕྱེ་གནང༌། དེ་ནས་ཚོགས་སྡེ་ཁག་གི་འགན་འཛིན་དང་མི་མང་བཅས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་དཔར་མཐོང་གྲོལ་རིན་པོ་ཆེར་མཇལ་དར་ཕུལ།   བོད་ཁྱིམ་སློབ་ཕྲུག་དང་མི་མང་བཅས་ནས་འཕགས་བོད་གཉིས་ཀྱི་རྒྱལ་གླུ་དང་མང་གཙོ་གསར་གཞས་ཕུལ་རྗེས་སྐུ་མགྲོན་དང་མི་མང་རྣམས་ལ་རྟེན་འབྲེལ་གྱི་གསོལ་ཇ་འབྲས་བསིལ་འདེགས་འབུལ་ཞུས།

ལྷོ་སྤྱི་ཆོས་འཕེལ་ཐུབ་བསྟན་ལགས་ཀྱིས་བཀའ་ཤག་གི་གསུང་འཕྲིན་དང་ལྷོ་སྤྱི་ལས་བྱེད་ཀརྨ་དགེ་ལེགས་ཀྱིས་བོད་མི་མང་སྤྱི་འཐུས་ལྷན་ཁང་གི་གསུང་འཕྲིན་སྒྲོག་སྦྱང་གནང་། སྐུ་མགྲོན་གཙོ་བོ་ནས་དུས་ཆེན་དང་འབྲེལ་བའི་གསུང་བཤད་ཟབ་རྒྱས་གནང་བ་དང་སྦྲགས་བོད་ཀྱི་ཆོས་དང་རིག་གཞུང་གཏིང་ཟབ་དང་བོད་མིའི་རྣམས་ཀྱི་ཡ་རབས་བཟང་སྤྱོད་ཀྱི་གོམས་གཤིས་ལ་བསྟོད་བསྔགས་གནང་ནས་མི་ཉམས་རྒྱུན་འཛིན་དགོས་པའི་ལམ་སྟོན་གནང་།

དེ་ནས་རིག་གཞུང་གཞས་སྣ་འཁྲབ་སྟོན་གཟིགས་འབུལ་ཞུས་མཚམས་ས་གནས་གཞོན་ནུའི་ཚོགས་གཙོ་རྒྱལ་མཚན་ནོར་བུ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་།

སྐབས་དེར་སྦེང་ལོར་ས་གནས་གཞོན་ནུའི་མཐུན་འགྱུར་འོག་སྐུ་མགྲོན་དང་མི་མང་རྣམས་ལ་ཉིན་གུང་གསོལ་སྟོན་གོ་སྒྲིག་ཞུས་པ་བཅས་མཛད་སྒོ་རྒྱལ་ཁའི་ངང་གྲོལ་ཡོད་པ་བཅས། །