ཕྱི་ལོ་ ༢༠༡༨ ཟླ་ ༩ ཚེས་ ༢༡ རེས་གཟའ་པ་སངས།

༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༡༨ ཟླ་ ༩ ཚེས་ ༢༠ རེས་གཟའ་པ་སངས་ཉིན་གྱི་ཕྱེད་ཡོལ་ཙམ་ལ་སུད་སིའི་གྲོང་ཁྱེར་ཛུ་རིག་ནང་༸ཞབས་སོར་བདེ་བར་འཁོད་སྐབས་སུད་སའི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་གཙོས་ཡུལ་དེར་རྟེན་གཞི་བྱས་པའི་བོད་རིགས་མང་ཚོགས་རྣམས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་འདུག

དེ་ཡང་ཚེས་ ༢༠ ཉིན་མགོན་པོ་གང་ཉིད་མཆོག་༸ཞབས་སོར་འཁོད་མཚམས་ཐོག་མར་གསར་འགོད་པ་ཚོར་བཀའ་སློབ་དང་དྲི་བར་བཀའ་ལན་མཛད།

དེ་ཡར་མཛད་འཆར་ལྟར་ན་ཕྱི་ཚེས་༢༡ དང་ ༢༢ ཉིན་གྱི་སྔ་དྲོ་སུད་སིར་རྟེན་གཞི་བྱས་པའི་རི་ཀོན་ཆོས་འཁོར་དགོན་གསར་བཞེངས་གནང་སྟེ་ལོ་ངོ་ ༥༠ འཁོར་བའི་མཛད་སྒོའི་ཐོག་དབུ་བཞུགས་མཛད་རྒྱུ་དང་།  སུད་སིའི་རྒྱལ་ཡོངས་བརྙན་འཕྲིན་ཚན་པའི་ Swiss National Television (SRF) གསར་འགོད་པའི་དྲི་བར་བཀའ་ལན་མཛད་རྒྱུ་ཡིན་འདུག

ཕྱི་ཚེས་ ༢༣ ཉིན་གྱི་སྔ་དྲོ་སུད་སི་ཛི་རིག་གྲོང་ཁྱེར་དུ་རི་ཀོང་ཆོས་འཁོར་དགོན་དང་སུད་སི་དང་ལེག་ཏེན་སིཊ་ཡན་བོད་རིགས་ཚོགས་པས་ཇི་ལྟར་གསོལ་འདེབས་ཞུས་དོན་ལྟར་ཛུ་རིག་ཧ་ལེན་སཊ་ཌིཨོན་ (Zurich Hallenstadion) ཚོགས་ཁང་དུ་མགོན་པོ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བ་དང་།  སློབ་དཔོན་ཀ་མ་ལ་ཤཱི་ལ་མཆོག་གིས་མཛད་པའི་བསྒོམ་རིམ་བར་པ།  རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ་བཅས་ཀྱི་གསུང་ཆོས་སྩལ་གཏན་འཁེལ་ཡོད།

ཕྱི་ཚེས ༢༤ ཉིན་གྱི་སྔ་དྲོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཛུ་རིག་གི་ཚན་རིག་མཐོ་སློབ་  Zurich University of Applied Sciences (ZHAW) ཏུ་འགྲོ་བ་མི་སྤྱིའི་བཟང་སྤྱོད་དང་ཤེས་ཡོན་ “Universal Human Values and Education”  སྐོར་གྱི་བགྲོ་གླེང་ཐོག་དབུ་ཞུགས་མཛད་རྒྱུ་ཡིན་འདུག་པ་བཅས། །