ཕྱི་ལོ་ ༢༠༡༨ ཟླ་ ༩ ཚེས་ ༡༨ རེས་གཟའ་མིག་དམར།

༄༅། །ཕྱི་ལོ་ ༢༠༡༨ ཟླ་ ༩ ཚེས་ ༡༦ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡུ་རོབ་ནེ་དར་ལེན་ཌིའི་ Netherlands གྲོང་ཁྱེར་རོ་ཊར་ཌམ་ Rotterdam ཞེས་པའི་ནང་མང་ཚོགས་ལ་བཀའ་སློབ་སྩོལ་སྐབས། ཡུ་རོབ་ཏུ་དེང་སྐབས་སྐྱབས་བཅོལ་བ་ཇེ་མང་དུ་འགྲོ་བཞིན་པའི་གནས་སྟངས་ལ་དགོངས་ནས་བཀའ་སློབ་སྩལ་བ་རྣམས་གསར་འགྱུར་ཚན་པ་ཁག་གཅིག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་དེ་ལོག་འགྲེལ་བྱས་ནས་ཡུ་རོབ་ནང་སྐྱབས་བཅོལ་བ་འབྱོར་བཞིན་པ་དེར་ངོ་རྒོལ་མཛད་པའི་རྣམ་པ་ལྟ་བུ་ཞིག་རྫུན་སྒྲིག་བྱས་ཡོད། དེར་བརྟེན་ཐེངས་འདིར་དགའ་ལྡན་ཕོ་བྲང་གི་གཞུང་འབྲེལ་དྲ་རྒྱའི་སྟེང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ཀྱི་དགོངས་དོན་ངོ་མ་ཇི་ཡིན་མ་བཅོས་པར་འདིར་འགོད་པ་གཤམ་གསལ།
རྒྱལ་ཁབ་གཞན་ནས་སྐྱབས་བཅོལ་བ་རྣམས་ཡུ་རོབ་ཏུ་བྲོས་བྱོལ་ཡོང་སྐབས་འཇར་མན་དང་ཡུ་རོབ་རྒྱལ་ཁབ་གཞན་ཚོས་མཐུན་འགྱུར་རོགས་རམ་གནང་བ་དེ་ནི་ངོ་མཚར་ལྡན་པ་ཞིག་རེད། འོན་ཀྱང་ངོས་ཀྱིས་བསམ་པར་གནས་སྐབས་རང་ཡུལ་དུ་མི་གསོད་ཁྲག་སྦྱོར་དང་གཉའ་གནོན་སོགས་དཀའ་སྡུག་སྣ་ཚོགས་མྱོང་བཞིན་པར་བརྟེན་གཞན་ཡུལ་དུ་བྲོས་བྱོལ་དུ་བསླེབས་པ་མ་གཏོགས་སྐྱབས་བཅོལ་བ་ཕལ་མོ་ཆེས་རང་ཡུལ་ངོ་མ་དེ་སོ་སོའི་རྒྱལ་ཁབ་རང་ལ་ངོས་འཛིན་བྱེད་བཞིན་ཡོད། དེར་བརྟེན་འཕྲལ་གསལ་རིང་ཡུ་རོབ་རྒྱལ་ཁབ་ཁག་གིས་སྐྱབས་བཅོལ་བ་དེ་དག་ལ་སྡོད་ཁང་དང་། ལྷག་པར་བྱིས་པ་ཚོར་ཤེས་ཡོན་དང་། འཕྲུལ་རིག་ལག་ཤེས་ཀྱི་སྦྱོང་བརྡར་སྤྲད་ནས་ཕུགས་ཀྱི་དམིགས་ཡུལ་ནི་སྐྱབས་བཅོལ་བ་དེ་དག་ཕྱིར་རང་ཡུལ་དུ་ཞོད་འཇགས་བྱུང་མཚམས་ཕྱིར་ལོག་བྱེད་ནས་རང་ཡུལ་འཛུགས་བསྐྲུན་ཐུབ་པ་ཞིག་བཟོ་དགོས། འདི་ནི་ངོས་ཀྱི་ཐོག་མའི་བསམ་ཚུལ་ཡང་ཡིན། ང་ཚོ་བོད་མི་ཚོར་མཚོན་ནའང་གནས་སྐབས་རྒྱ་གར་ནང་བཙན་བྱོལ་བ་བྱས་ནས་གནས་བཞིན་ཡོད། འོན་ཀྱང་དུས་ནམ་ཞིག་བཟང་ཕྱོགས་ཀྱི་འགྱུར་བ་ཞིག་བྱུང་མཚམས་ང་ཚོའང་རང་ཡུལ་བོད་ནང་ཕྱིར་ལོག་བྱ་རྒྱུ་རེད། སྤྱིར་རྒྱལ་ཁབ་སོ་སོར་ཐུན་མིན་རིག་གཞུང་དང་སྐད་ཡིག ཡུལ་གོམས་གཤིས་ལུགས་སོགས་ཡོད་སྟབས། རང་ཡུལ་དུ་བསྡད་ནས་སོ་སོའི་རིག་གཞུང་དེ་དག་རྒྱུན་འཛིན་བྱེད་ཐུབ་ན་དགེ་མཚན་ཆེ་བ་ཡོད། འདི་ནི་ངོས་ཀྱི་བསམ་ཚུལ་ཡིན།