༢༠༡༨ ཟླ་ ༩ ཚེས་ ༧ རེས་གཟའ་པ་སངས།
༄༅། །ཡུ་རོབ་སྤྱི་མཐུན་ཚོགས་པའི་ཆོས་དད་རང་དབང་སྲུང་སྐྱོབ་ལྷན་ཚོགས་ཀྱིས་རྒྱ་ནག་ལ་ཆོས་དད་རང་དབང་ཐོག་དམ་བསྒྲགས་ཤུགས་ཆེ་ཤོས་བྱེད་མཁན་ཡིན་པའི་སྐྱོན་བརྗོད་ཤུགས་ཆེ་གནང་འདུག དེ་ཡང་སྙན་ཐོ་དེའི་ནང་དེང་སྐབས་འཛམ་གླིང་ནང་ཆོས་དད་རང་དབང་ཚད་དམའ་ཤོས་དང་དམ་བསྒྲགས་ཆེ་ཤོས་ཀྱི་རྒྱལ་ཁབ་ནི་རྒྱ་ནག་ཡིན་པ་འཁོད་འདུག
ཐེངས་འདིར་ལོ་འཁོར་སྙན་ཐོ་འདོན་ཐེངས་བཞི་པའི་སྐབས་ཚན་པ་ནས་རྒྱལ་ཁབ་༡༢༢ནང་ཆོས་དད་རང་དབང་གི་གནས་སྟངས་ཐོག་ཞིབ་འཇུག་བྱས་པ་མ་ཟད། དེ་ཁྲོད་རྒྱལ་ཁབ་༣༠ལ་ཆོས་དད་རང་དབང་གི་གནས་ཚད་དང་ཆོས་དད་རང་དབང་བརྡལ་བཤིག་བཏང་བའི་མི་འབོར་ཁྱབ་ཚད་བཅས་ལ་རྟོག་ཞིབ་བྱས་འདུག ཆོས་དད་རང་དབང་ཡོད་མེད་དང་ཚད་གཞི་ཇི་འདྲ་ཡོད་པ། དེ་བཞིན་ཆོས་དད་རང་དབང་དམ་བསྒྲགས་བྱེད་པའམ་བརྡལ་བཤིག་ཚབས་ཆེ་ཇི་ཙམ་བཏང་མིན་གཙོ་བོ་རྒྱལ་སྤྱིས་གཏན་ལ་ཕབ་པའི་གནས་བབ་དེར་གཞིར་བཞག་ཐོག་རྟོག་ཞིབ་གནང་འདུག
ལྷག་པར་རྒྱ་ནག་གཞུང་གིས་བོད་ཀྱིས་ཁྱོན་སྤྱི་དང་ལྷག་པར་བོད་རང་སྐྱོང་ལྗོངས་ཀྱི་ས་ཁུལ་ཁག་ཏུ་བོད་མིའི་ཆོས་དད་རང་དབང་ཐོག་དམ་བསྒྲགས་སུན་གཙེར་བཟོས་པ་དེར་སེམས་འཚབ་ཡོད་པའི་དོན་ཚན་ཁག་གཅིག་གླེང་སློང་གནང་འདུག དེ་བཞིན་རྒྱ་ནག་གཞུང་གིས་བོད་མི་རྣམས་ལ་༸གོང་ས་ཏཱ་ལའི་བླ་མ་མཆོག་གི་༸སྐུ་པར་འགྲིག་གཤོམ་བྱ་རྒྱུས་མཚོན་དད་གུས་ཞུ་རྒྱུའི་རང་དབང་འཁྲོག་པ་མ་ཟད། གསེར་རྟ་བླ་རུང་སྒར་གྱི་དགེ་བཙུན་རྣམས་ཀྱི་བཞུགས་གནས་གཏོར་བཤིག་བཏང་བ་སོགས་བྱ་སྤྱོད་སྤེལ་དང་སྤེལ་བཞིན་པ་རྣམས་ལུང་འདྲེན་གནང་འདུག
ལྷག་པར་བོད་དང་ཡུ་གུར་མི་མང་རྣམས་རྒྱ་ནག་གཞུང་གིས་དྲང་བདེན་མིན་པའི་སྲིད་བྱུས་འོག་སྡོད་ཁང་དང་འཚོ་ཐབས། ཚོང་ལས་སོགས་ཀྱི་གོ་སྐབས་མེད་ཁར་མཐོང་ཆུང་ཁྱད་གསོད་དང་། མི་རིགས་དབྱེ་འབྱེད། འཛིན་བཟུང་བཙོན་འཇུག དྲག་གནོན་སོགས་ཚབས་ཆེ་བྱེད་བཞིན་པར་སྐྱོན་བརྗོད་ཤུགས་ཆེ་གནང་འདུག ཕྱོགས་མཚུངས་རྒྱ་ནག་གཞུང་གིས་ཆབ་སྲིད་བཙོན་པ་དམར་གསོད་བཏང་བའི་ནང་ཁྲོལ་བཏོན་ནས་ཚོང་བ་སོགས་མི་སྤྱོད་ལས་འདས་པའི་བྱ་སྤྱོད་སྤེལ་བཞིན་ཡོད་པ་དང་། ལོ་གཅིག་ནང་རྒྱ་ནག་གཞུང་གིས་ཆོས་འཁོར་སྒོམ་སྒྲུབ་ཉམས་ལེན་པ་འཛིན་བཟུང་བཀག་ཉར་བྱས་མཐར་དམར་གསོད་བཏང་ནས་ལོ་རེར་མིའི་ནང་ཁྲོལ་༦༥༠༠༠བཏོན་ནས་རྒྱ་རིགས་དང་ཕྱི་རྒྱལ་འབྱོར་ལྡན་ཅན་རྣམས་ལ་འཚོང་བཞིན་ཡོད་པ་གསལ་བཤད་གནང་ཡོད།
