ཕྱི་ལོ་ ༢༠༡༨ ཟླ་ ༩ ཚེས་ ༡༨ རེས་གཟའ་མིག་དམར། 

༄༅། །ཕྱི་ལོ་ ༢༠༡༨ ཟླ་ ༩ ཚེས་ ༡༤ རེས་གཟའ་པ་སངས་ཉིན་རྒྱ་གར་རྒྱལ་ས་ལྡི་ལི་གསར་པར་རྟེན་གཞི་བྱས་པའི་འཕགས་བོད་འབྲེལ་མཐུད་ལས་ཁང་གི་གོ་སྒྲིག་འོག་ལྡི་ལི་བོད་སྒར་བསམ་ཡས་གླིང་གི་མི་མང་ཆོགས་ཁང་དུ་བོད་མིའི་རྩ་དོན་སླད་རྒྱ་གར་རྒྱལ་ཡོངས་དང་ས་གནས་བོད་དོན་རྒྱབ་སྐྱོར་ཚོགས་པའི་ཚོགས་འདུ་ཞིག་བསྐོང་ཚོགས་གནང་ཡོད།
དེ་ཡང་གོང་ཚེས་མཛད་སྒོ་དབུ་འཛུགས་ཀྱི་ཉིན་ཐོག་མར་རྒྱ་གར་གྱི་སྲིད་བློན་ཟུར་པ་དང་རྒྱ་གར་མི་སེར་གྱི་གཟེངས་རྟགས་མཐོ་ཤོས་ Bharat Ratna ཐོབ་མྱོང་མཁན་སྐུ་ཞབས་ཨ་ཊལ་བྷི་ཧ་རི་ཝཇ་པ་ཡེ་  Atal Bihari Vajpayee མཆོག་འདས་གྲོངས་དུ་གྱུར་བར་གདུང་སེམས་མཉམ་སྐྱེའི་མྱ་ངན་ངག་བཅད་གནང་གྲུབ་མཚམས་འཕགས་བོད་འབྲེལ་མཐུད་ལས་ཁང་གི་འབྲེལ་མཐུད་པ་ཀརྨ་དར་རྒྱལ་ལགས་ཀྱིས་ངོ་སྤྲོད་གསུང་བཤད་གནང་། སྐབས་དེར་སྐུ་མགྲོན་གཙོ་བོ་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་རིན་ཆེན་མཁའ་འགྲོ་ཀེ་རི་མི་མཆོག་གིས་གཙོས་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་མི་ ༡༢ དང་། དེ་བཞིན་ལྡི་ལི་སྐུ་ཚབ་དོན་གཅོད་འབྲོང་ཆུང་དངོས་གྲུབ་མཆོག་ཆེད་ཕེབས་གནང་ཡོད།

སྐབས་དེར་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན། ང་ཚོ་འདིར་འཛོམས་དགོས་དོན་གཙོ་བོ་ནི་མ་འོངས་པར་བོད་མིའི་རང་དབང་འཐབ་རྩོད་ཐོག་ལམ་སྟོན་གྲོས་འཆར་དང་ལས་འགུལ་སྤེལ་ཕྱོགས་སླད་ཡིན། ང་ཚོའི་དམིགས་ཡུལ་གཙོ་བོ་ནི་བོད་ཀྱི་གནད་དོན་མི་ཉམས་པ་དང་སྔར་ལྟར་ནུས་པ་ལྡན་པ་ཞིག་བཟོ་རྒྱུའི་སླད་རྒྱ་གར་ནང་གི་སློབ་གྲྭ་ཁག་དང་མཐོ་སློབ་ཀྱི་གཞོན་སྐྱེས་རྣམས་ལ་བོད་དོན་ཐོག་གོ་རྟོགས་ལས་འགུལ་སྤེལ་རྒྱུ་སོགས་ཡིན།  འཕགས་བོད་གཉིས་ཀྱི་འབྲེལ་ལམ་གལ་ཆེན་པོ་ཡིན་པ་དེ་དུས་རྒྱུན་དུ་སེམས་ནང་འཇོག་དགོས་པ་དང་། ང་ཚོ་བོད་དོན་རྒྱབ་སྐྱོར་ཚོགས་པའི་ཚོགས་མི་ཞིག་ཡིན་སྟབས། བོད་དོན་ལས་འགུལ་ལ་སོགས་ཇེ་མང་དུ་སྤེལ་རྒྱུ་དང་། བོད་ཀྱི་རྩ་དོན་སླད་ཞི་བའི་ཐབས་ལམ་ཞིག་འཚོལ་དགོས་པ་ངེས་པར་འབོད་བརྩོན་བྱེད་དགོས། ཞེས་གསུངས།
དེ་རྗེས་ལྡི་ལི་སྐུ་ཚབ་དོན་གཅོད་འབྲོང་ཆུང་དངོས་གྲུབ་མཆོག་གིས་རྒྱ་ནག་གཞུང་ནས་བོད་ནང་གི་བོད་མི་རྣམས་ལ་དྲག་གནོན་ཇི་ལྟར་བྱེད་བཞིན་པའི་གནས་སྟངས་སྐོར་འགྲེལ་བརྗོད་གནང་བ་དང་སྦྲགས་རྒྱ་གར་བོད་དོན་རྒྱབ་སྐྱོར་ཚོགས་པ་རྣམས་ནས་ད་བར་བོད་མི་དང་བོད་དོན་སླད་རྒྱབ་སྐྱོར་ཤུགས་ཆེར་གནང་བར་ཐུགས་རྗེ་ཆེ་ཞུས་པ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རླབས་ཆེན་གྱི་མཛད་འཕྲིན་ནང་ནས་གལ་ཆེ་བ་གཅིག་ནི་རྒྱ་གར་གནའ་བོའི་རིག་གཞུང་སླར་གསོ་བྱ་རྒྱུ་ཡིན་པ་སོགས་ཀྱི་སྐོར་གསུང་བཤད་གནང་། དེ་ནས་བོད་དོན་ཐད་ལས་འགུལ་རྒྱ་ཆེ་སྤེལ་ཆོག་ཐོག་གྲོས་བསྡུར་ལྷུག་པོ་གནང་སྟེ་ཚོགས་འདུ་གྲོལ་བ་བཅས། །