ཕྱི་ལོ་ ༢༠༡༨ ཟླ་ ༩ ཚེས་ ༡༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༨ ཟླ་ ༩ ཚེས་ ༧ རེས་གཟའ་པ་སངས་ཉིན་གྱི་ཕྱེད་ཡོལ་ཆུ་ཚོད་ ༥ ཙམ་ལ་ཞྭ་སེར་བསྟན་པའི་གཙུག་རྒྱན་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༤ བློ་བཟང་བསྟན་འཛིན་མཆོག་ལ་བོད་མིའི་སྒྲིག་འཛུགས་བཀའ་ཤག་གིས་གསོལ་ཚིགས་འབུལ་ལམ་ཞུས་འདུག
དེ་ཡང་རིན་པོ་ཆེ་མཆོག་བཀའ་ཤག་ཏུ་ཕེབས་འབྱོར་བྱུང་མཚམས་སྲིད་ཚབ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་གཙོས་བཀའ་བློན་རྣམ་པ་དང་། དེ་བཞིན་དགེ་ལུགས་སྤྱི་འཐུས་ཨ་ཀྲུག་ཚེ་བརྟན་ལགས་བཅས་ཀྱིས་ཕེབས་བསུའི་སྣེ་ལེན་གཟབ་རྒྱས་དང་སྦྲགས་ཚོགས་ཁང་གི་བཞུགས་བྲལ་དུ་འཁོད་བསྟུན། སྲིད་ཚབ་མཆོག་གིས་ཐེངས་འདིར་དཔལ་ལྡན་སྲིད་སྐྱོང་མཆོག་ཕྱོགས་ཕེབས་གནང་བར་བརྟེན་རྡ་སར་བཞུགས་པའི་བོད་མིའི་སྒྲིག་འཛུགས་ཀྱི་དཔལ་འབྱོར་དང་ཤེས་རིག བདེ་སྲུང་། འཕྲོད་བསྟེན་བཅས་ལྷན་ཁང་ཁག་གི་བཀའ་བློན་རྣམ་པས་རིན་པོ་ཆེ་མཆོག་ལ་བཀའ་ཤག་གི་ཚབ་ཞུས་ནས་གསོལ་སྟོན་འབུལ་ལམ་ཞུ་སྐོར་སྙན་སེང་ཞུས། དེ་ཡང་གསོལ་ཚིགས་དགྱེས་བཞེས་མ་གནང་གོང་ཐོག་མར་དགའ་ལྡན་ཁྲི་པ་མཆོག་གིས་བཀའ་ཤག་གི་ཚོགས་ཁང་ལ་རབ་གནས་གནང་ཡོད།
ཐེངས་འདིར་དགའ་ལྡན་ཁྲི་པ་མཆོག་བཞུགས་སྒར་དུ་ཕྱི་ཟླ་ ༩ ཚེས་ ༣ ནས་ ༧ བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དབུས་གཙང་ཆོལ་ཁ་དང་། མདོ་སྨད་ཆོལ་ཁ། རྡ་སར་རྟེན་གཞི་བྱས་པའི་ཆུ་སྒང་། ཀ་རྡོར་སྒང་གསུམ་དང་ར་དབང་ལ་ཀུན་ཕན་གླིང་བོད་མིའི་གཞིས་ཆགས་བཅས་ཀྱི་ཚོགས་སྐྱིད་ཁག་ནས་བརྟན་བཞུགས་བསྟར་འབུལ་ཞུ་སྐབས་ཆེད་ཕེབས་གནང་བ་མ་ཟད། དེ་རྗེས་ཕྱི་ཚེས་ ༤ ནས་ ༧ བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྷོ་ཤར་ཨེ་ཤི་ཡའི་དད་ལྡན་ཆོས་ཞུ་བ་རྣམས་ལ་དབུ་མ་རྩ་བའི་འབྲེལ་བ་བུདྷ་པཱ་ལི་ཏའི་བཀའ་ཆོས་ཞུ་ཆེད་ཕེབས་པ་ཞིག་ཡིན་འདུག ཕྱི་ཚེས་ ༡༠ ཉིན་དགའ་ལྡན་ཁྲི་པ་མཆོག་བཞུགས་སྒར་ནས་ཕེབས་ཐོན་གནང་ཡོད་པ་བཅས། །
