ཕྱི་ལོ་ ༢༠༡༨ ཟླ་ ༩ ཚེས་ ༢༡ རེས་གཟའ་པ་སངས།
༄༅། །འདི་གར་ཆེས་མཐོའི་ཁྲིམས་ཞིབ་ཁང་ནས་ཕྱི་ལོ་ ༢༠༡༨ ཟླ་ ༩ ཚེས་ ༢༡ ཉིན་བཏང་གནས་ནང་འཁོད་དོན། ༄༅། །ཕྱི་ལོ་ ༢༠༡༨ ཟླ་ ༩ ཚེས་ ༡༧ ནས་ ༢༧ བར་ཉིན་གྲངས་བཅུའི་རིང་འཛིན་སྐྱོང་སྦྱོང་བརྡར་བསྟི་གནས་ཁང་དུ་ཆེས་མཐོའི་ཁྲིམས་ཞིབ་ཁང་གི་གོ་སྒྲིག་འོག་བཙན་བྱོལ་བོད་མིའི་ཁྲིམས་དང་ལམ་ལུགས་ཀྱི་ཁྲིམས་རྩོད་པའི་སྦྱོང་བརྡར་ཐེངས་ ༨ པ་ཚོགས་གནང་ཡོད།
དེ་ཡང་ཕྱི་ཚེས་ ༡༧ རེས་གཟའ་ཟླ་བའི་དབུ་འབྱེད་མཛད་སྒོའི་ཉིན་གྱི་སྔ་དྲོ་ཆོ་ཚོད་ ༩ པ་ཐོག་དཔལ་ལྡན་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གིས་སྣང་གསལ་ཞལ་འབྱེད་དང་སྦྲགས་སྦྱོང་བརྡར་བ་རྣམས་ལ་བཙན་བྱོལ་བོད་མིའི་ཁྲིམས་དང་ལམ་ལུགས་ཀྱི་ཁྲིམས་རྩོད་པའི་སྦྱོང་བརྡར་ཐེངས་ ༨ པའི་ངོ་བོ་དང་དགོས་དམིགས་སོགས་ལམ་སྟོན་གསུང་བཤད་གནང་།
སྐབས་དེར་སྦྱོང་བརྡར་དུ་ཁྲིམས་ལུགས་རིག་པ་ ༤ དང་ཁྲིམས་ཀྱི་སློབ་མ་ ༦ ། བཙན་བྱོལ་བོད་མིའི་ཁྲིམས་དང་ལམ་ལུགས་ཀྱི་ཁྲིམས་རྩོད་པའི་ལག་འཁྱེར་སོན་པ་ ༢ ། སྲི་ཞུའི་ལས་བྱེད་ ༦ ། ཆེས་མཐོའི་ཁྲིམས་ཞིབ་ཁང་མ་ལག་གི་ལས་བྱེད་ ༥ བཅས་ཁྱོན་མི་གྲངས་ ༢༣ བཅས་མཉམ་ཞུགས་གནང་ཡོད། ཕྱོགས་མཚུངས་བདམས་ཐོན་བྱུང་བའི་ཁྲིམས་ཞིབ་པ་གཞན་ཀརྨ་དགྲ་འདུལ་མཆོག་ཕྱི་ཚེས་ ༢༠ ནས་མཉམ་ཞུགས་གནང་ཡོད། སྦྱོང་བརྡར་འདིའི་དམིགས་ཡུལ་གཙོ་བོ་ནི། ཁྲིམས་ཀྱི་སློབ་མ་རྣམས་ལ་བཙན་བྱོལ་བོད་མིའི་ཁྲིམས་ཞིབ་ཁང་གི་ཁྲིམས་ལུགས་ཁག་རྒྱུས་ལོན་དང་ཤེས་རྟོགས་བརྒྱུད། བཙན་བྱོལ་བོད་མིའི་ཁྲིམས་ལུགས་དབང་འཛིན་ཁོངས་སྲི་ཞུ་ཞབས་འདེགས་ཞུ་རྒྱུར་སྐུལ་སློང་དང་། སྤྱི་སྒེར་གཉིས་ལ་ཁྲིམས་ཀྱི་ལས་དོན་ཐོག་ཞབས་འདེགས་ཞུ་མཁན་བཙན་བྱོལ་བོད་མིིའི་ཁྲིམས་དང་ལམ་ལུགས་ཀྱི་ཁྲིམས་རྩོད་པ་སྐྱེད་སྲིང་བྱེད་རྒྱུ་དེ་ཡིན།
དེ་ཡང་དཔལ་ལྡན་ཁྲིམས་ཞིིབ་པ་ཆེ་བ་མཆོག་གིས་བཅའ་ཁྲིམས་ཀྱི་འབྲེལ་ཡོད་དོན་ཚན་ཁག་དང་། དཔང་རྟགས་རྩ་འཛིན་ཁྲིམས་ཡིག་ཆ་ཚང་གི་སྐོར་དང་།
དཔལ་ལྡན་ཁྲིམས་ཞིབ་པ་གཞན་ངག་དབང་རབ་རྒྱལ་མཆོག་དང་། སྤྱི་ཁྱབ་ཁྲིམས་དྲུང་བཀྲིས་རྒྱ་མཚོ་ལགས། དེ་བཞིན་ས་གནས་ཁྲིམས་ཞིབ་པ་ལྷ་འབྲུག་ལགས་བཅས་རྣམ་གསུམ་གྱིས་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་སྐོར་སློབ་ཁྲིད་གནང་རྒྱུ་ཡིན་འདུག
ཁྲིམས་རྩོད་པའི་སྦྱོང་བརྡར་དེ་བཞིན་མཐུན་འགྱུར་རོགས་རམ་གནང་མཁན་ཨ་རི་ཐེབས་རྩ་ USAID ཡིན་འདུག་པ་བཅས། །
