༢༠༡༨ ཟླ་ ༩ ཚེས་ ༢༨ རེས་གཟའ་པ་སངས།
༄༅། །བོད་མིའི་སྒྲིག་འཛུགས་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་དང་ནང་སྲིད་དྲུང་འཕར་ཚེ་དབང་རྒྱལ་པོ་ཨཱརྱ་ལགས་ཉེ་ལམ་ཧི་མཱ་ཅལ་མངའ་སྡེའི་ནང་རྟེན་གཞི་བྱས་པའི་ཀུ་ལུ་མ་ན་ལི་བོད་མིའི་གཞིས་ཆགས་སུ་ཆུ་རུད་ཀྱི་གོད་ཆག་ཕོག་པ་རྣམས་ཀྱི་གནས་སྟངས་རྟོག་ཞིབ་སླད་ཉིན་གཉིས་རིང་གཟིགས་སྐོར་གནང་འདུག
དེ་ཡང་རེས་གཟའ་ལྷག་པའི་ཉིན་བཀའ་བློན་མཆོག་ཐེངས་འདིར་ཆུ་རུད་ཀྱི་གོད་ཆག་ཚབས་ཆེ་ཤོས་ཕོག་པ་དོ་བྷི་དང་དཔལ་རབ་གླིང་བོད་མིའི་གཞིས་ཆགས་སུ་འཚམས་གཟིགས་གནང་བ་དང་སྦྲགས་ས་གནས་བོད་མི་རྣམས་ཀྱི་གནས་སྟངས་རྒྱུས་ལོན་གནང་བ་མ་ཟད་སེམས་གསོ་ཡང་གནང་འདུག དེ་ཡང་ཉེ་ལམ་ཧི་མཱ་ཅལ་ས་ཁུལ་ཁག་ཅིག་ནང་ཆར་ཞོད་ཧ་ཅང་ཆེ་བར་བརྟེན་ནས་ཉེ་འགྲམ་གཙང་ཆུ་རྒྱས་པ་སོགས་ལ་བརྟེན་ནས་སྡོད་ཁང་སུམ་ཅུ་ཙམ་གྱི་ནང་འདམ་རུད་དང་འདམ་ཉོག་འཛུལ་ནས་དཀའ་ངལ་ཧ་ཅང་འཕྲད་པ་དང་།
ལྷག་པར་དཔལ་རབ་གླིང་གཞིས་ཆགས་ནས་སིལ་སྤོལ་རྩེད་ཐང་བར་གྱི་གཞུང་ལམ་ཡོངས་རྫོགས་ཆུ་རུད་ཀྱི་གནོད་སྐྱོན་འོག་རྩ་མེད་ཕྱིན་འདུག དེ་ཡང་བཀའ་བློན་མཆོག་ཕྱི་ཟླ་ ༩ ཚེས་ ༢༧ ཉིན་བཙན་བྱོལ་བོད་མིའི་གནས་ཡུལ་གྱི་ས་གནས་གཞན་ཏེ་ 15 Mile དང་མ་ན་ལི། ཀུ་ལུ་སོགས་ཀྱི་བོད་མི་རྣམས་ལའང་གཟིགས་སྐོར་གནང་འདུག སྤྱིར་ཐེངས་འདིར་ཆར་ཞོད་ཀྱིས་རྐྱེན་པས་ཆུ་རུད་ཀྱི་གོད་ཆག་འོག་སྡོད་ཁང་སོགས་ལ་གནོད་འཚེ་ཕོག་ཡོད་ཀྱང་བོད་མིའི་ཚེ་སྲོག་ཤོར་བའི་གནས་ཚུལ་ཧ་ལམ་བྱུང་མེད། ད་ཆ་གོད་ཆག་ཕོག་པའི་བོད་མི་རྣམས་རིམ་བཞིན་སྡོད་ཁང་ནང་གི་འདམ་ཉོག་རྣམས་སོ་སོས་གཙང་བཟོ་བྱས་པ་དང་། ཕན་ཚུན་གཅིག་ཕན་གཅིག་གྲོགས་འོག་རྒྱུན་ལྡན་གྱི་འཚོ་བའི་གནས་སྟངས་ཐོག་སླར་ཡང་ཕྱིར་ལོག་བྱེད་བཞིན་ཡོད་འདུག
