༢༠༡༨ ཟླ་ ༩ ཚེས་ ༢༠ རེས་གཟའ་ཕུར་བུ།
སྔོན་གླེང་།
༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། བོད་རྗེ་བཙན་པོ་རིམ་བྱོན་ནས་བཟུང་རིམ་བཞིན་༸གོང་ས་༸རྒྱལ་དབང་༸སྐུ་ཕྲེང་ན་རིམ་གྱིས་བོད་ཀྱི་ཆོས་སྲིད་གཉིས་ཀའི་དབུ་འཁྲིད་གནང་བའི་དུས་སྐབས་སུ་པུར་རྒྱལ་བོད་ཅེས་ཤར་གླིང་དབུས་མའི་ནང་རྒྱ་བོད་ཧོར་གསུམ་དཔུང་སྟོབས་དང་མངའ་ཐང་འདྲ་མཚུངས་སུ་གནས་པའི་རང་དབང་རང་བཙན་ཅན་གྱི་རྒྱལ་ཁབ་ཅིག་ཡིན་ནའང་། ཕྱི་ལོ་ ༡༩༤༩ ལོར་རྒྱ་ནག་དམར་གཞུང་འགོ་བཙུགས་མ་ཐག་ནས་རིམ་བཞིན་བོད་ལ་དྲག་པོས་བཙན་འཛུལ་གྱིས་བོད་ཀྱི་སྣོད་བཅུད་ཡོངས་རྫོགས་ལ་དབང་བསྒྱུར་ཏེ་མི་ལོ་ ༧༠ ཟིན་ལ་ཉེ་ཡང་བོད་མི་རིགས་ལ་འཛིན་པའི་དྲག་གནོན་དང་གདུག་རྩུབ་ཅན་གྱི་སྲིད་བྱུས་ལ་འགྱུར་བ་ནམ་ཡང་བཏང་མེད།
བོད་མི་རྣམས་བོད་ས་རང་དུ་གཉེན་ཉེ་ཐུག་འཕྲད་དང་གནས་སྐོར་ཆོས་མཇལ་སོགས་འགྲོ་བར་འཛམ་གླིང་ཤར་ནུབ་རྒྱལ་ཁབ་གཞན་ནས་གཞན་དུ་བགྲོད་པ་ལས་ཀྱང་དཀའ་ཚེགས་ཆེ་བའི་འགག་སྒོ་རིམ་པ་བརྒྱུད་དེ་ལག་ཁྱེར་སྣ་ཚོགས་བསྟན་དགོས་པ་མ་ཟད། དགོན་སྡེ་དང་གྲོང་ཚོར་བཅའ་སྡོད་ལས་དོན་རུ་ཁག་སོགས་ཀྱི་ཆོག་མཆན་མེད་པར་ཉེ་ཁུལ་གྱི་རྫོང་དང་གྲོང་ཁྱེར་ཁག་ཏུའང་བསྐྱོད་མི་ཆོག་པ་སོགས་ནི་མིང་འདོགས་མ་བྱས་པའི་བཙོན་ར་ངོ་མ་ཞིག་གི་ནང་འགྲོ་བ་མི་ཡི་ཐོབ་ཐང་སྤུ་ཙམ་ཡང་མེད་པ་བྱས་ཡོད།
ཕན་བདེའི་གཞི་རྩ་ཆོས་བརྒྱུད་སོ་སོའི་རིང་ལུགས་བཞིན་ཕྱག་མཆོད་གནང་ཡུལ་མཆོད་ཁང་དང་། ཕྱག་ཁང་། བཤད་སྒྲུབ་ཀྱི་བསྟི་གནས་དགོན་སྡེ་དང་རི་ཁྲོད་སོགས་གང་འདྲ་ཞིག་བཞེངས་དགོས་པ། གནས་སྐོར་མཆོད་མཇལ་དང་། བཤེས་གཉེན་བསྟེན་གཏུག གྲྭ་རྒྱུན་ཕྱོགས་འགྲུལ། གཡའ་རི་གངས་བྲག་ཏུ་རི་ཁྲོད་འགྲིམ་པ། གྲྭ་བཙུན་གསར་ཞུགས་སོགས་རང་རང་གི་ལམ་སྲོལ་གང་ཡིན་ལ་འཛམ་གླིང་རྒྱལ་ཁབ་ཕལ་མོ་ཆེས་གཙིགས་ཆེར་བཟུང་སྟེ། རྒྱལ་ཁབ་ནས་རྒྱལ་ཁབ། ཤར་ཕྱོགས་ནས་ནུབ་ཕྱོགས་སོགས་སུ་བསྐྱོད་རྒྱུ་བཅས་ལ་སྟངས་འཛིན་དང་དམ་དྲག་བྱ་སྲོལ་མེད་ནའང་། ཆོས་མེད་རྒྱ་ནག་དམར་གཞུང་གིས་དགོན་སྡེ་ཁག་གི་གྲྭ་བཙུན་གསར་ཞུགས་ལ་ལོ་ཚད་དང་གྲངས་ཚད། ཆོས་བྱེད་གྲྭ་བཙུན་རྣམས་ལ་དམར་ལུགས་ཀྱི་སློབ་གསོ་འདྲ་མིན་སྤེལ་བ། ཕྱོགས་མཐའ་ན་བཞུགས་པའི་བླ་མ་སྐྱེས་ཆེན་རྣམ་པའི་ཞལ་སྔར་འགྲིམ་རྒྱུར་བཀག་འགོག བླ་སྤྲུལ་ཡང་སྲིད་ལ་དམར་གཞུང་གི་ངོས་ལེན་དགོས་པ། དད་ལྡན་མང་ཚོགས་དང་སློབ་ཕྲུག་ཚོའི་ཆོས་ལུགས་ཀྱི་བྱེད་སྒོ་ལ་ཚད་བཀག དགོན་སྡེ་ཁག་ཏུ་དམར་གཞུང་གི་ལས་དོན་རུ་ཁག་གཏན་སྡོད། བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོར་གསོལ་འདེབས་སྨོན་ལམ་ཚུན་ཆད་བྱ་མི་ཆོག་པ་སོགས་བཟོས་ཏེ་ཆོས་དད་རང་དབང་གི་ཐོབ་ཐང་ཡོངས་སུ་ཕྲོགས་ཡོད་ཅིང་། བོད་གངས་ཅན་པའི་བུ་རབས་ཚ་རྒྱུད་དང་བཅས་པར་བཀའ་དྲིན་ཤིན་ཏུ་ཆེ་བའི་ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་དང་། གཞན་ཡང་མཁན་ཆེན་འཇིགས་མེད་ཕུན་ཚོགས། སྤྲུལ་སྐུ་བསྟན་འཛིན་བདེ་ལེགས་སོགས་ཀྱི་འདས་རྐྱེན་ལ་ཁུངས་སྐྱེལ་མེད་པར་དུས་མིན་དགོངས་པ་རྫོགས་ཡོད་པ་དང་། ལྷག་པར་པཎ་ཆེན་ཆུང་སྲིད་རིན་པོ་ཆེ་མཆོག་དང་། པཎ་ཆེན་ཡང་སྲིད་རྩད་འཚོལ་བ་བྱ་བྲལ་བྱམས་པ་འཕྲིན་ལས་རྣམ་གཉིས་ཀྱི་གནས་བབ་མི་ལོ་ ༢༠ ལྷག་རིང་རྩད་མི་ཆོད་པ་བཟོས་ཡོད།
ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་གིས་དབུས་པའི་བོད་ཆོལ་ཁ་གསུམ་གྱི་མཁས་དབང་དང་རྒན་རབས་དུ་མ་ཞིག་གི་བཀའ་དྲིན་ལ་བརྟེན་ནས་བར་སྐབས་བོད་ཀྱི་སྐད་ཡིག་སྦྱོང་སྤྱོད་སྤེལ་གསུམ་གྱི་ཐོག་ཡར་རྒྱས་གང་འཚམས་ཕྱིན་ཡོད་ནའང་། དེ་རྗེས་རྒྱ་གཞུང་གིས་རྒྱ་ནག་གི་སྤྱི་སྐད་ལ་ཤུགས་རྒྱག་དགོས་སྐོར་དང་། སློབ་ཚན་མང་པོ་ཞིག་རྒྱ་ཡིག་ནང་བསྒྱུར་བཟོ། མི་རིགས་ས་གནས་རང་སྐྱོང་གི་བཅའ་ཁྲིམས་ནང་གསལ་བའི་མི་རིགས་རང་སྐྱོང་ལྗོངས་དང་། རང་སྐྱོང་ཁུལ། རང་སྐྱོང་རྫོང་བཅས་ནང་གི་རྩ་འཛིན་ཡིག་ཆ་དང་། ཚོགས་འདུའི་གཏམ་བཤད་སོགས་མི་རིགས་དེའི་སྐད་ཡིག་གཙོ་བོར་མི་འཛིན་པར་རྒྱའི་སྐད་ཡིག་ཐོག་སྦྱོང་སྤྱོད་སྤེལ་གསུམ་བྱེད་བཞིན་ཡོད་པར་བརྟེན་བོད་ཁུལ་དུ་བོད་ཀྱི་སྐད་ཡིག་ཉམས་དམས་སུ་བཏང་བར་བོད་མི་མང་པོ་ཞིག་གིས་རྔམ་སྟོན་ཞི་རྒོལ་དང་རང་ལུས་མེར་བསྲེགས་གཏོང་དགོས་ཆགས་ཡོད་ཅིང་། དམིགས་བསལ་རྒྱ་གཞུང་གིས་མཁས་བརྒྱ་འགྲན་གླེང་དང་། མེ་ཏོག་མཉམ་བཞད། ཟེར་སྲོལ་ཡོད་ནའང་། བོད་མི་རྣམས་ཀྱིས་བོད་ཀྱི་ལུགས་གཉིས་ཀྱི་རྣམ་བཞག་ཚད་ཐུབ་བཤད་རྒྱུ་དང་། དེ་བཞིན་མི་རིགས་ས་གནས་རང་སྐྱོང་གི་བཅའ་ཁྲིམས་འོག་གཏན་ལ་ཕབ་པའི་ཐོབ་ཐང་ཁག་དང་། བྱེ་བྲག་ཏུ་སྐད་ཡིག་གི་ཐོབ་ཐང་སྐོར་ལ་འགྲན་གླེང་རྩ་བ་ནས་བྱ་ཡུལ་མེད་པ་སྟེ་སྨྲ་བརྗོད་ཀྱི་རང་དབང་ཡོངས་སུ་བཀག་སྟེ་མ་ཉེས་ཁ་གཡོག་གིས་བཀྲ་ཤིས་དབང་ཕྱུག་ལ་བཙོན་འཇུག་ཁྲིམས་ཐག་བཅད་པ་དེས་གསལ་པོར་ཤེས་ཐུབ།
རྒྱ་གཞུང་གིས་བོད་དུ་གནམ་ས་བླ་འོག་ཏུ་བསྒྱུར་བ་ལྟ་བུའི་ཡར་རྒྱས་བཏང་ཡོད་སྐད་དང་། ད་དུང་བོད་འདི་ཉིད་བརྒྱུད་གཅིག་ལམ་གཅིག་གི་ཨེ་ཤེ་ཡའི་ལྟེ་གནས་ལྟ་བུ་བཟོ་རྒྱུ་ཡིན་གནས་སོགས་ཤོད་བཞིན་ཡོད་པ་ནི། རྒྱ་ཡི་མི་འབོར་སྤོ་བཤུག་དང་། གཏེར་ཁ་བསྔོག་འདོན། བོད་དང་ས་འབྲེལ་ཁྱིམ་མཚེས་རྒྱལ་ཁབ་རྣམས་ལ་ཁ་གཏད་གཅོག་ཆེད་རྒྱ་དམག་གཏན་སྡོད་བཅས་ཀྱི་དགོས་མཁོའི་འཛུགས་སྐྲུན་སོགས་བྱེད་བཞིན་པ་ལས་བོད་མི་རིགས་ལ་ཁ་ཡོད་ལག་ཡོད་ཀྱི་ཕན་ཐོགས་པའི་འཛུགས་སྐྲུན་དང་ཡར་རྒྱས་རིགས་ད་དུང་བཏང་མེད་པ་མ་ཟད། བོད་ཀྱི་རྩ་ཆེའི་རིག་དངོས་ཀྱི་བང་མཛོད་དགོན་སྡེ་སྟོང་ཕྲག་དྲུག་ལྷག་དང་། རྫོང་གཞིས་མཁར་ཁང་ཁྲི་ཕྲག་མང་པོ་རྩ་གཏོར་གྱིས་རིག་དངོས་ཡོད་ཚད་རྒྱ་ཡུལ་དུ་དབོར་ཟིན་པ་དང་། དེ་བཞིན་བོད་ས་ཡོངས་ནས་རྒྱུན་ཆད་མེད་པའི་གཏེར་ཁ་བསྔོག་འདོན། ཤིང་ནགས་གཅོད་འབྲེག ལྷོ་ཆུ་བྱང་འདྲེན་བཅས་བྱས་དང་བྱེད་བཞིན་པའི་སྐྱིན་ཚབ་ཟུར་ཙམ་ཡང་ཆགས་ཀྱི་མེད་པ་མིག་མཐོང་ལག་ཟིན་ཡིན། བརྒྱུད་གཅིག་ལམ་གཅིག་ཟེར་བའི་ལམ་ལུགས་དེ་ཉིད་ལ་སྟོབས་ཆེན་རྒྱལ་ཁབ་ཨ་མི་རི་ཀ་དང་། རྒྱ་གར་སོགས་ཀྱིས་མོས་མཐུན་གནང་མེད་པ་འདིས་ཀྱང་དཔལ་འབྱོར་གྱི་གཡོ་བྱུས་ཤིག་ཡིན་པ་ཁ་གསལ་ཆགས་ཡོད།
ཕྱི་ལོ་ ༢༠༠༨ ལོར་བོད་ཆོལ་ཁ་གསུམ་གྱི་ས་ཁྱོན་ཡོངས་ནས་ས་བྱི་ཞི་རྒོལ་ཆེན་མོ་གནང་སྟེ་མི་ལོ་ཧྲིལ་པོ་ ༡༠ འཁོར་ཡོད་པ་དང་། ༢༠༠༩ ལོ་ནས་བཟུང་བོད་ཀྱི་བདེན་མཐའ་གསལ་ཐབས་ཆེད་བོད་མི་ ༡༥༢ ཀྱིས་རྒྱ་གཞུང་ལ་ཞི་རྒོལ་གྱིས་་རང་ལུས་མེར་བསྲེགས་བཏང་སྟེ་ཕལ་ཆེ་བ་འདས་གྲོངས་སུ་ཕྱིན་ཡོད་ནའང་། རྒྱ་གཞུང་གིས་དེ་རྣམས་ལ་བདག་སྤྲོད་རྩ་བ་ནས་མ་བྱས་པར་བོད་ཆོལ་ཁ་གསུམ་གྱི་ས་ཁྱོན་ཡོངས་རྫོགས་ལ་དྲག་དམག་འགྲེམ་འཇོག་གིས་དཀྱིལ་ཤར་ཡུལ་གྲུའི་དམག་ས་ལྟ་བུའི་རྣམ་པའི་ཐོག་དེང་རབས་ཀྱི་གོ་མཚོན་སྣ་ཚོགས་བེད་སྤྱད་ནས་དྲག་གནོན་གྱིས་བོད་མི་རྣམས་དམར་གསོད་དང་། གཅར་རྡུང་། འཛིན་བཟུང་སོགས་བྱས་པའི་ཁྲག་དྲི་བྲོ་བའི་གནས་ཚུལ་རྣམས་དྲན་ངོགས་སུ་གསལ་ཐེངས་རེར་ཡ་ང་ལ་སྐྱི་གཡའ་ཞིང་། མི་རབས་ནས་མི་རབས་བར་བརྗེད་ཐབས་མེད་པའི་རྨ་ཁ་ཆེན་པོ་བཟོས་ཡོད་པ་མ་ཟད། སྐབས་དེའི་རྒྱ་ནག་གི་སྲིད་བློན་ཝུན་ཅའ་པའོ་ཡིས་བོད་མིའི་ཞི་རྒོལ་དང་། རང་ལུས་མེར་བསྲེགས་སོགས་ཕྱི་ཕྱོགས་ཁ་བྲལ་བས་བརྒྱུད་སྐུལ་བྱས་ཚུལ་སོགས་གླེང་ཡོད་ནའང་ད་བར་ཁུངས་སྐྱེལ་ར་སྤྲོད་གཅིག་ཀྱང་ཐུབ་མེད།
ཉེ་ཆར་ཕྱི་ཟླ་ ༧ པའི་ཟླ་མཇུག་ཏུ་རྒྱ་ནག་གི་སྲིད་བློན་ལི་ཁེ་ཆང་བོད་རང་སྐྱོང་ལྗོངས་ཟེར་བའི་ས་གནས་ཁག་ཅིག་ལ་སླེབས་ཡོད་ཀྱང་དུས་ཐོག་ཡོངས་གྲགས་མ་བྱས་པ་དང་། དེ་གར་ཡོང་དོན་ངོ་མ་གང་ཡིན་ད་དུང་ཁ་གསལ་བཟོས་མེད། ཡང་ཕྱི་ཟླ་ ༨ པའི་ཟླ་མཇུག་ཏུ་རྒྱ་ནག་རྒྱལ་ཡོངས་སྲིད་གྲོས་ཀྱི་འགོ་གཙོ་དབང་དབྱང་བོད་རང་སྐྱོང་ལྗོངས་ཟེར་བའི་ས་གནས་ཁག་ཅིག་ཏུ་སླེབས་ནས། “ཆོས་ལུགས་ལས་དོན་དེ་བོད་ལྗོངས་ཀྱི་སྤྱི་ཚོགས་བརྟན་ལྷིང་དང་ཡུན་རིང་བདེ་འཁོད་ཡོང་རྒྱུ་དང་འབྲེལ་བ་ཡོད་པས་ངེས་པར་དུ་བདེ་སྡོད་ཉེན་བསམ་དང་མ་བྱུང་སྔོན་འགོག་ཐུབ་པར་བྱེད་དགོས། ཏང་གི་ཆོས་ལུགས་ལས་དོན་གྱི་གཞི་རྩའི་མཛད་ཕྱོགས་མཐའ་འཁྱོངས་བྱེད་པ་དང་། རང་རྒྱལ་ཆོས་ལུགས་ཀྲུང་གོ་ཅན་གྱི་ཁ་ཕྱོགས་མཐའ་འཁྱོངས་བྱེད་པ། ཆོས་ལུགས་ལས་དོན་གྱི་ཁྲིམས་སྐྱོང་ཅན་གྱི་ཆུ་ཚད་མཐོ་རུ་གཏོང་བ་བཅས་བྱས་ཏེ་བོད་བརྒྱུད་ནང་བསྟན་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཚམ་མཐུན་དེ་བས་ལེགས་པ་ཡོང་རྒྱུར་སྐུལ་འདེད་གཏོང་དགོས། ཆོས་ལུགས་ལས་རིགས་ཀྱིས་ཏང་གི་འགོ་ཁྲིད་ལ་བརྩི་སྲུང་ཞུ་རྒྱུ་མཐའ་འཁྱོངས་བྱེད་པ་དང་། རྒྱལ་གཅེས་རིང་ལུགས་ཀྱི་སྲོལ་རྒྱུན་བཟང་པོ་རྒྱུན་འཛིན་དང་དར་སྤེལ་གཏོང་བ། ཡིན་མིན་ཆེན་པོའི་མདུན་དུ་དར་ཆ་གསལ་སྟོན་བྱེད་པ། དྲག་ཆར་རླུང་འཚུབ་ཀྱི་མདུན་དུ་རིག་པ་དྭངས་གསལ་ཐུབ་པ། རྒྱལ་ཁབ་ཁ་ཕྲལ་གཏོང་མཁན་ཕྱོགས་གཏོགས་མཐའ་དག་དང་འཐབ་རྩོད་བྱེད་ཕོད་པ་བཅས་བྱས་ནས་མེས་རྒྱལ་གཅིག་གྱུར་དང་། མི་རིགས་མཐུན་སྒྲིལ། སྤྱི་ཚོགས་བརྟན་ལྷིང་བཅས་སྲུང་སྐྱོང་དེ་བས་ནུས་ལྡན་བྱེད་དགོས།” ཞེས་སོགས་བཤད་པ་དེས་ཆོས་ལུགས་སྐོར་ལ་དམ་དྲག་ཆེ་རུ་གཏོང་འཆར་ལས་བོད་མི་ཞི་རྒོལ་བ་རྣམས་ཀྱི་དགོས་འདུན་སོགས་ལ་བདག་པོ་རྩ་བ་ནས་རྒྱག་གི་མེད་པ་གསལ་པོ་ཆགས་པ་མ་ཟད། རྒྱ་ནག་གི་ཆེས་མཐོའི་དཔོན་རིགས་གཉིས་གཅིག་འཇུག་གཉིས་མཐུད་ངང་བོད་རང་སྐྱོང་ལྗོངས་ཟེར་བར་ཡོང་དགོས་དོན་ངོ་མ་ཁ་གསལ་ཤེས་རྟོགས་ཐུབ་ཀྱི་མེད།
དེང་སྐབས་རྒྱལ་སྤྱིའི་ཁྲོད་རྒྱ་ནག་གིས་བོད་སྐོར་བཤད་པ་ལ་ཡིད་ཆེས་ཆུང་དུ་ཕྱིན་པ་དང་། དེ་བཞིན་རྒྱ་མི་རིགས་བོད་དུ་ཡུལ་སྐོར་ལ་ཡོང་མཁན་མང་པོ་ཞིག་གིས་བོད་ཀྱི་བདག་དབང་ཇི་བཞིན་ཤེས་དོགས་སོགས་ལ་བརྟེན་ནས་རྒྱ་གཞུང་གིས་བོད་རང་སྐྱོང་ལྗོངས་ཟེར་བའི་བོད་རིགས་དཔོན་པོ་ཁག་ཅིག་ཕྱི་ཕྱོགས་ཀྱི་རྒྱལ་ཁབ་ཁག་ནང་སྐོར་བསྐྱོད་མངགས་ཏེ་བོད་རྒྱ་ཁོངས་ཡིན་ཚུལ་སོགས་བཤད་བཅུག་པ་དང་། རྒྱ་མི་རིགས་ལྷ་སར་ཡུལ་སྐོར་ཡོང་མཁན་རྣམས་ལ་ཐོག་མར་རྒྱ་བཟའ་ཀོང་ཇོའི་ལོ་རྒྱུས་ཀྱི་བརྙན་འཕྲིན་བལྟ་རུ་བཅུག་པ་བཅས་གཡོ་འཁྲབ་སྣ་ཚོགས་བྱེད་བཞིན་ཡོད་ཀྱང་བོད་ཀྱི་ལོ་རྒྱུས་འཁྱོགས་བཤད་བྱས་པའི་ངོ་མ་ལ་ནག་བསུབ་གཏོང་མི་ཐུབ་པ་མངོན་གསལ་ཡིན།
དེ་བཞིན་སུད་སིའི་གྲོང་ཁྱེར་ཇི་ནི་ཝའི་ནང་དུ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༣༨ པ་འགོ་འཛུགས་སྐབས་འགན་འཛིན་མཆོག་གིས་རྒྱ་ནག་ནང་གི་འགྲོ་བ་མིའི་ཐོབ་ཐང་ཐད་རྒྱ་གཞུང་ལ་སྐྱོན་བརྗོད་ཤུགས་ཆེ་གནང་ཡོད་པ་མ་ཟད་འདས་པའི་ལོ་ལྔའི་ནང་བོད་དང་ཡུ་གུར། རྒྱ་ནག་བཅས་ཀྱི་ནང་དུ་འགྲོ་བ་མིའི་ཐོབ་ཐང་གི་གནས་སྟངས་ཐད་རྟོག་ཞིབ་བྱ་རྒྱུའི་གོ་སྐབས་ཚད་ལྡན་ཞིག་མ་སྤྲད་པ་དང་། བོད་རང་སྐྱོང་ལྗོངས་ཟེར་བ་སོགས་ནང་དེང་སྐབས་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པའི་དངོས་ཡོད་གནས་ཚུལ་གསལ་བཏོན་གནང་ཡོད།
ཡང་ཕྱི་ཟླ་ ༧ པའི་ནང་ཨ་རིའི་རྒྱལ་ས་ཝ་ཤིང་ཊོན་དུ་ཨ་རིའི་ཕྱི་སྲིད་ལས་ཁུངས་ཀྱི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཆེས་མཐོའི་ཚོགས་འདུ་བསྐོང་ཚོགས་གནང་སྐབས་ཨ་རིའི་སྲིད་འཛིན་གཞོན་པ་མཱ་ཁལ་པཎ་སི་(Michael Pence)མཆོག་གིས་ཨ་རིའི་ཊམྤ་སྲིད་གཞུང་གི་ངོས་ནས་འཛམ་གླིང་གི་ཆོས་དད་རང་དབང་ཐད་ལ་དོ་འཁུར་ཆེན་པོ་བཞེས་གནང་གི་ཡོད་པ་སོགས་ངོ་སྤྲོད་གནང་བ་དང་། བོད་འདི་རྒྱ་ནག་གི་འོག་ལ་ལོ་ངོ་ ༧༠ མིན་ཙམ་གྱི་རིང་ཆོས་དད་རང་དབང་ལ་རྡོག་རོལ་གཏོང་བའི་དཀའ་སྡུག་མྱངས་ཡོད་པ་རེད་ཅེས་གསུངས་ཏེ་རྒྱ་ནག་གཞུང་ལ་སྐྱོན་བརྗོད་གནང་བ་དང་། དེ་འདྲའི་དཀའ་སྡུག་འོག་གི་མི་སྣ་ཚོ་དང་མཉམ་དུ་ཨ་རིའི་གཞུང་མང་ནས་གདུང་སེམས་མཉམ་སྐྱེད་གནང་བཞིན་ཡོད་ཅེས་གསུངས་པ་མ་ཟད། རྒྱ་ནག་རྒྱལ་ཁབ་དེ་བཞིན་ཕྱི་ལོ་ ༡༩༩༩ ནས་ད་བར་བསྟུད་མར་ཨ་རིའི་ཕྱི་སྲིད་ལས་ཁུངས་ཀྱིས་ལོ་ལྟར་བཏོན་པའི་རྒྱལ་སྤྱིའི་ནང་ཆོས་དད་རང་དབང་གི་དཀའ་སྡུག་ཡོད་པའི་རྒྱལ་ཁབ་ཀྱི་ཐོ་གཞུང་ནང་དུ་སླེབས་ཀྱི་ཡོད་པ་སོགས་ཐེར་འདོན་གནང་ཡོད།
ཕྱི་ཟླ་ ༨ པའི་ནང་ལྡི་ལི་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ལྷན་ཚོགས་ནས་རྒྱ་གཞུང་གིས་ད་ལྟའི་བོད་ནང་འགྲོ་བ་མིའི་ཐོབ་ཐང་ལ་རྡོག་རོལ་བཏང་དང་གཏོང་བཞིན་པའི་སྲིད་བྱུས་ལག་བསྟར་བྱེད་བཞིན་པར་མཐའ་གཅིག་ཏུ་ངོ་རྒོལ་དང་། སྲིད་བྱུས་དེ་དག་མཚམས་འཇོག་བྱ་དགོས་པའི་གྲོས་ཆོད་བཞག་གནང་བ་དང་། འཛམ་གླིང་ཁྱོན་ཡོངས་ནས་བོད་རྒྱའི་དཀའ་རྙོག་སེལ་སླད་རྒྱབ་སྐྱོར་གནང་དགོས་པའི་འབོད་སྐུལ་ཀྱང་གནང་ཡོད། དེ་བཞིན་ད་ལྟའི་བོད་ནང་གི་བོད་མིའི་ཛ་དྲག་གནས་སྟངས་ལས་སྐྱོབ་ཐབས་དང་། བོད་རྒྱའི་དཀའ་རྙོག་སེལ་ཐབས་སོགས་ཀྱི་སླད་བོད་མིའི་སྒྲིག་འཛུགས་དང་། ཡུལ་གྲུ་གང་སར་གནས་པའི་བོད་རིགས་རྣམས་དང་། བོད་དོན་རྒྱབ་སྐྱོར་བ་རྣམས་ཀྱིས་གཞུང་དང་། གྲོས་ཚོགས། འགྲོ་བ་མིའི་ཐོབ་ཐང་སྡེ་ཚན་སོགས་ལ་ཞུ་སྐུལ་རིམ་པར་ཞུས་དང་ཞུ་མུས་ལྟར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དང་། ཨ་རིའི་གཞུང་དང་གྲོས་ཚོགས། ཡུ་རོབ་མཐུན་ཚོགས། གཞན་ཡང་གཞུང་དང་གྲོས་ཚོགས་མང་པོའི་ནང་བོད་དོན་གླེང་སློང་དང་གྲོས་ཆོད་ཀྱང་མང་པོ་འཇོག་ཐུབ་པ་བྱུང་ཡོད།
ཉེ་ཆར་ཕྱི་ཟླ་ ༩ ཚེས་ ༤ ཉིན་ཡུ་རོབ་ཀྱི་རྒྱལ་ས་སྦར་སིལ་དུ་ཡུ་རོབ་སྤྱི་མཐུན་ཚོགས་པའི་ཆོས་དད་རང་དབང་སྲུང་སྐྱོབ་ལྷན་ཚོགས་ཀྱིས་ཕྱི་ལོ་ ༢༠༡༧ ལོའི་ལོ་འཁོར་སྙན་ཐོ་འདོན་ཐེངས་ ༤ པའི་ནང་། རྒྱ་ནག་ནི་འཛམ་གླིང་ནང་ཆོས་དད་རང་དབང་ཚད་དམའ་ཤོས་དང་དམ་དྲག་ཆེ་ཤོས་ཀྱི་རྒྱལ་ཁབ་ཅིག་ཡིན་པ་དང་། བོད་དང་གྲངས་ཉུང་མི་རིགས་རྣམས་ལ་རྒྱ་གཞུང་གི་སྲིད་བྱུས་དྲང་བདེན་མིན་པའི་ཐོག་སྡོད་ཁང་དང་། འཚོ་ཐབས། ཚོང་ལས་སོགས་ཀྱི་གོ་སྐབས་མེད་ཁར་མཐོང་ཆུང་ཁྱད་གསོད། མི་རིགས་དབྱེ་འབྱེད། དྲག་གནོན་འཛིན་བཟུང་གི་བཙོན་འཇུག་བཅས་ཀྱི་ཐོག་ཐུགས་འཚབ་ཆེན་པོ་ཡོད་པའི་སྐོར་སྙན་ཐོའི་ནང་འཁོད་ཡོད། ཐེངས་འདིའི་སྙན་ཐོའི་ནང་རྒྱལ་ཁབ་ ༣༤ ལ་ཆོས་དད་རང་དབང་གི་གནས་ཚད་དང་ཆོས་དད་རང་དབང་བརྡལ་བཤིག་བཏང་བའི་མི་འབོར་ཁྱབ་ཚད་བཅས་ལ་རྟོག་ཞིབ་གནང་པར་རྒྱ་ནག་ནང་དམ་དྲག་ཆེ་ཤོས་ཡིན་པར་ངོས་འཛིན་དང་། དེ་ཡང་ཉམས་ཞིབ་པ་ནས་རྟོག་ཞིབ་མཐིལ་ཕྱིན་གནང་སྐབས་བོད་ས་ཁུལ་སྤྱི་དང་ལྷག་པར་དུ་བོད་རང་སྐྱོང་ལྗོངས་ཀྱི་ས་ཁུལ་ཁག་ཏུ་ཆོས་དད་རང་དབང་གི་ཐོག་དམ་དྲག་ཚབས་ཆེན་ཡོད་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དད་གུས་ཞུ་རྒྱུ་དང་། ཆོས་ལུགས་ཐོག་བསམ་ཚུལ་བརྗེ་ལེན་བཅས་ཀྱི་རང་དབང་འཕྲོག་ཡོད་པ་མ་ཟད། གསེར་རྟ་བླ་རུང་སྒར་གྱི་དགེ་བཙུན་རྣམས་ཀྱི་བཞུགས་གནས་གཏོར་བཤིག་བཏང་བ་སོགས་ཀྱི་བྱ་སྤྱོད་སྤེལ་དང་སྤེལ་བཞིན་པ་རྣམས་རྒྱ་གཞུང་ནས་ནང་པའི་ཆོས་དང་ནང་ཆོས་སློབ་སྦྱོང་གི་བསྟི་གནས་ཁག་རྩ་གཏོར་གཏོང་རྒྱུ་ཡིན་པ་བཅས་ལུང་འདྲེན་གནང་འདུག ཕྱོགས་མཚུངས་རྒྱ་ནག་གཞུང་གིས་བོད་མི་ཆབ་སྲིད་བཙོན་པ་དམར་གསོད་བཏང་བའི་ནང་ཁྲོལ་བཏོན་ནས་བཙོང་བ་སོགས་མི་སྤྱོད་ལས་འདས་པའི་བྱ་སྤྱོད་སྤེལ་བཞིན་ཡོད་པ་བཅས་ཡུ་རོབ་གྲོས་ཚོགས་ནང་གླེང་སློང་གནང་ཡོད།
མདོར་ན། གཞིས་བཞུགས་བོད་མི་རྣམས་རྒྱ་གཞུང་གི་བཙན་གནོན་སྡུག་སྦྱོང་དང་འཇིགས་སྐྲག་སྔངས་གསུམ་གྱི་ངང་ཉིན་མཚན་དུས་དྲུག་འདའ་དགོས་གྱུར་ནའང་མི་རབས་གསུམ་ལྷག་རིང་རྣམ་པ་དང་དུས་ཚིགས་འདྲ་མིན་གྱི་ཞི་རྒོལ་ད་དུང་ཡང་རྒྱུན་ཆད་མེད་ཅིང་། ཞི་རྒོལ་རིམ་གནང་སྐབས་ཀྱི་སྐད་འབོད་དང་དགོས་འདུན། རེ་སྐུལ་བཅས་ལ་རྒྱ་གཞུང་ནས་བདག་སྐྱོང་བྱ་རྒྱུ་ལྟ་ཞོག ཁ་བྲལ་རིང་ལུགས་པ་དང་། རྒྱལ་ཁབ་མགོ་རྟིང་སློག་མཁན། རྡུང་གཅོག་འཕྲོག་སྲེག་བྱེད་མཁན་སོགས་སུ་བསྙད་བཏགས་ནས་བོད་མི་རྣམས་འཛིན་བཟུང་བཀག་བསྐྱིལ་དང་། འགྲོ་འོང་ཚོད་འཛིན། བཙོན་འཇུག་ཁྲིམས་གཅོད། སྡུག་སྦྱོང་མནར་གཅོད། དྲག་གནོན་དམར་གསོད་སོགས་ངན་རྒུ་ཚང་བའི་བྱ་སྤྱོད་ཀྱི་འོག་ནས་ནམ་ཡང་ཐར་དུ་མེད་པ་བཟོས་དང་བཟོ་བཞིན་པའི་ཡ་ང་བའི་གནས་སྟངས་ད་དུང་མུ་མཐུད་གནས་མུས་ལ་བརྟེན་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པར་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་ཅིག་འཇོག་དགོས་རྒྱུ་གལ་ཆེར་མཐོང་།
གྲོས་ཆོད།
༡། བོད་བསྟན་སྲིད་མི་རིགས་དང་བཅས་པའི་ཆེད་ལུས་སྲོག་ལོངས་སྤྱོད་ཡོངས་སུ་བློས་བཏང་གནང་བའི་བོད་ཀྱི་རྒྱལ་གཅེས་དཔའ་བོ་དཔའ་མོ་རྣམས་ཀྱི་སྙིང་སྟོབས་དང་ཆོད་སེམས་ལ་ཡི་རངས་དང་། ཁོང་རྣམ་པའི་གདུང་འབོད་དང་དགོས་འདུན་བཅས་ལ་རྒྱ་གཞུང་ནས་བདག་སྐྱོང་གིས་བོད་ཐོག་འཛིན་པའི་སྲིད་བྱུས་ཀྱི་རིགས་ཡོངས་རྫོགས་ལ་འགྱུར་བ་ངེས་པར་བཏང་སྟེ། བོད་གངས་ཅན་གྱི་ཞིང་འདི་ཉིད་ཞི་བདེ་ལྷིང་འཇགས་དང་བག་ཕེབས་གུ་ཡངས་ལྡན་པ་ཞིག་ཏུ་བསྐྲུན་ནས། བོད་མི་རྣམས་ལ་འགྲོ་བ་མི་ཡི་གཞི་རྩའི་རང་དབང་རིགས་ཡོངས་རྫོགས་ལོངས་སུ་སྤྱོད་ཐུབ་པའི་གོ་སྐབས་ངེས་པར་དུ་སྤྲད་དགོས་པའི་ནན་སྐུལ་བྱ་རྒྱུ།
༢། རྒྱ་ནག་མི་དམངས་སྤྱི་མཐུན་རྒྱལ་ཁབ་ཟེར་བ་དེ་འཛམ་གླིང་རྒྱལ་སྤྱིའི་ཁྲོད་ཆེ་མཐོང་ལྡན་ཞིང་དྲང་ཚུགས་ཡོད་པ་ཞིག་བཟོ་འདོད་ཚེ། རྒྱ་གཞུང་གི་བཙན་གནོན་འོག་འཛིན་བཟུང་བཀག་ཉར་བྱས་པའི་པཎ་ཆེན་ཆུང་སྲིད་རིན་པོ་ཆེའི་གནས་སྟངས་ཁ་གསལ་དགོས་པ་མ་ཟད། ཉེས་མེད་བཙོན་འཇུག་བྱས་ཏེ་སྡུག་སྦྱོང་མནར་གཅོད་མྱོང་བཞིན་པའི་བོད་མི་རྣམས་འཕྲལ་དུ་གློད་བཀྲོལ། བོད་ཁུལ་ཡོངས་རྫོགས་དམག་ས་ལྟ་བུ་བཟོས་ཏེ་དྲག་དམག་གིས་ཉིན་མཚན་དུས་དྲུག་ཏུ་སྲུང་བཞིན་པའི་བྱ་སྤྱོད་མཚམས་འཇོག བོད་མི་རིགས་ལ་ཁ་ཡོད་ལག་ཡོད་ཀྱི་ཕན་མི་ཐོགས་ཤིང་། རང་བྱུང་ཁོར་ཡུག་ལ་གཏོར་སྐྱོན་ཐེབས་ཉེན་ཆེ་བའི་ལས་གཞི་རྣམས་མཚམས་འཇོག་བཅས་བྱ་དགོས་པ་རྒྱ་གཞུང་ལ་ནན་བཤད་བྱ་རྒྱུ།
༣། བོད་མིའི་སྒྲིག་འཛུགས་ཀྱི་ངོས་ནས་བོད་རྒྱ་གཉིས་སྨན་དབུ་མའི་ལམ་གྱི་སྲིད་བྱུས་བཟུང་སྟེ་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་གནས་བབ་མིང་དོན་མཚུངས་པ་ཞིག་ལག་བསྟར་ཡོང་ཐབས་བྱེད་བཞིན་པ་ལ། རྒྱལ་སྤྱིའི་ཐོག་རྒྱབ་སྐྱོར་ཐོབ་ཀྱི་ཡོད་པ་མ་ཟད། ༸གོང་ས་མཆོག་གི་ཐུགས་ཀྱི་དགོངས་གཞི་དང་རྒྱ་ནག་གི་འགོ་ཁྲིད་འདས་པོ་ཏིང་ཞའོ་ཕིང་གི་ཁས་ལེན་དང་མཚུངས་པ་ཞིག་ཆགས་ཡོད་པས་རྒྱ་གཞུང་གི་དཔོན་རིགས་ཚོས་ཁ་ཞེ་གཉིས་མེད་ཐོག་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་མཉམ་བོད་རྒྱ་ཞི་མོལ་འཕྲལ་དུ་འགོ་འཛུགས་དགོས་སྐོར་བསྐྱར་དུ་དྲན་གསོ་བྱ་རྒྱུ།
༤། རྒྱ་ནག་དམར་གཞུང་གིས་བོད་ལ་བཙན་འཛུལ་གྱིས་ཧམ་ཟོས་བྱས་ཏེ་མི་ལོ་ ༧༠ མ་ཟིན་ཙམ་རིང་བོད་མི་རྣམས་ནས་ལས་འགུལ་ཆེ་ཕྲ་ཁག་རྒྱུན་མ་ཆད་པར་སྤེལ་དགོས་པའི་རྒྱུ་རྐྱེན་གང་ལ་ཐུག་ཡོད་པ་དང་། གཞིས་བཞུགས་བོད་མི་རྣམས་ཛ་དྲག་གི་གནས་སྟངས་ཇི་འདྲའི་འོག་ལྷུང་བསྡད་པ་སོགས་དངོས་ཡོད་གནས་ཚུལ་རྒྱུས་ལོན་ཆེད། ཞི་བདེ་ལ་དགའ་ཞིང་། དྲང་ཚུགས་ལྡན་པའི་རྒྱལ་ཁབ་ཁག་གི་དབུ་ཁྲིད་དང་ལས་ཀྱི་སྣེ་མོ་བ། གྲོས་ཚོགས་འཐུས་མི། རྩོམ་པ་པོ། གསར་འགོད་པ་སོགས་ཕྱོགས་ལྷུང་བྲལ་བའི་རང་དབང་ཅན་གྱི་རྟོག་ཞིབ་ཚོགས་པ་བོད་ནང་དུ་ཕེབས་ནས་རྒྱུས་ལོན་དགོས་པའི་འབོད་སྐུལ་ཞུ་རྒྱུ།
༥། ད་བར་བོད་དོན་རྒྱབ་སྐྱོར་གནང་དང་གནང་བཞིན་པའི་རྒྱལ་ཁབ་ཁག་དང་། ཚོགས་སྡེ། མི་སྒེར་བཅས་ཡོངས་ལ་བཀའ་དྲིན་ཆེ་ཞུ་རྒྱུ་དང་། བོད་དོན་བདེན་མཐའ་གསལ་ཐབས་ཀྱི་ལས་འགན་ངོ་མ་དེ་རང་རེ་བོད་མི་རྣམས་ལ་བབས་ཡོད་པ་ལྟར། བོད་པ་མི་རེ་ངོ་རེའི་ངོས་ནས་རང་རང་གི་ལས་འགན་ངོ་ཤེས་པའི་ཐོག་སོ་སོའི་འཇོན་ཐང་ལ་དཔག་སྟེ་རྩ་དོན་ཆེད་ནུས་པ་མཉམ་སྤུངས་ཀྱིས་ལས་འགན་འཐུས་ཤོར་མེད་པར་འབད་བསྒྲུབ་དགོས་པའི་གསལ་འདེབས་བྱ་རྒྱུ་བཅས་ཀྱི་སྤྱི་མོས་གྲོས་ཆོད་དུ། བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་ ༢༠༡༨ ཟླ་ ༩ ཚེས་ ༡༨ ལ།།
གོང་གསལ་གྲོས་ཆོད་འདི་བཞིན་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༦ པའི་ཐོག་སྤྱི་མོས་ཀྱིས་གཏན་འབེབས་གནང་། ཕྱི་ལོ་ ༢༠༡༨ ཟླ་ ༩ ཚེས་ ༡༨ ལ།།
