ཕྱི་ལོ་ ༢༠༡༨ ཟླ་ ༩ ཚེས་ ༡༢ རེས་གཟའ་ལྷག་པ།
༄༅། །བོད་མིའི་སྒྲིག་འཛུགས་ཀྱི་ལོ་རྒྱུས་འབྲི་རྩོམ་ཚན་པ་དང་བར་བརྒལ་ལས་བཀོད་སྡེ་ཚན་གྱི་ལས་བྱ་བསྟན་འཛིན་ནོར་འཛོམས་ལགས་ཕྱི་ལོ་ ༢༠༡༨ ཟླ་ ༩ ཚེས་ ༡༡ རེས་གཟའ་མིག་དམར་ཉིན་གྱི་ཕྱེད་ཡོལ་ཆུ་ཚོད་ ༣ ཡོལ་ཙམ་ལ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་བཀའ་ཤག་ཏུ་སྙན་སེང་བྱུང་བར་ཐུགས་ཕམ་དང་བཅས་འདས་པོ་དེ་ཉིད་ཀྱིས་ཚེ་རབས་ཕྲེང་བ་ནས་བསགས་པའི་སྡིག་སྒྲིབ་བྱང་ཞིང་དག་ནས་མངོན་མཐོ་ངེས་ལེགས་ཀྱི་གོ་འཕང་མགྱོགས་ནས་མྱུར་དུ་ཐོབ་ཆེད།
ཕྱི་ཚེས་ ༡༢ ཉིན་གྱི་ཕྱེད་ཡོལ་ཆུ་ཚོད་ ༣ ཐོག་གངས་སྐྱིད་ཚོགས་ཁང་གསར་པའི་ནང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པས་དབུས་རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། བོད་མི་མང་སྤྱི་འཐུས་རྒྱུན་ལས་རྣམ་པ། ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཐོག་བཀའ་དྲུང་རྫོང་ཁ་སྟོབས་རྒྱལ་ཚེ་རིང་ལགས་ཀྱིས་ཚེ་འདས་ཁོང་གི་ལོ་རྒྱུས་སྙིང་བསྡུས་ཤིག་སྒྲོགས་སྦྱང་གནང་རྗེས་སྨོན་ལམ་གསུང་འདོན་གནང་། དེ་རྗེས་འདས་པོ་ཁོང་ལ་མྱ་ངན་གུས་འདུད་དང་གདུང་སེམས་མཉམ་སྐྱེ་མཚོན་ཆེད་ཕྱེད་ཡོལ་ཆུ་ཚོད་ ༤ ནས་དབུས་ལས་ཁུངས་ཁག་ལས་མཚམས་བཞག་ཡོད།
དེ་ཡང་ཚེ་འདས་ཁོང་ནི། ཕྱི་ལོ་ ༡༩༨༡ ཟླ་ ༦ ཚེས་ ༩ ཉིན་སྐྱེས་ཤིང་། གཞི་རིམ་སློབ་སྦྱོང་རྡ་སྟེང་བོད་ཁྱིམ་སློབ་གྲྭར་གནང་། ཕྱི་ལོ་ ༢༠༠༠ ལོར་ནང་སྲིད་ལས་ཁུངས་སུ་ཡིག་གད་ལས་ཚབ་ཏུ་ཟླ་གྲངས་ ༣ རིང་ཕྱག་ལས་གནང་། ཕྱི་ལོ་ ༢༠༠༡ ལོར་བཀའ་དྲུང་ཡིག་ཚང་དུ་ཟླ་གྲངས་ ༡༡ རིང་རང་ཁོངས་ཡིག་གད་ཀྱི་ཕྱག་ལས་དང་། ཕྱི་ལོ་ ༢༠༠༣ ཟླ་ ༧ ཚེས་ ༣ ནས་ཤེས་རིག་ལས་ཁུངས་སུ་ཚོད་ལྟའི་ཡིག་གད་དུ་བསྐོ་གཞག་གིས་ཕྱི་ལོ་ ༢༠༠༤ ཟླ་ ༡ ཚེས་ ༡༧ ཉིན་ནས་ལས་བྱེད་ངོ་མར་བསྐོ་གཞག་གནང་ཐོག་རིམ་པས་དབུས་འོས་བསྡུ་ལས་ཁང་དང་། ཕྱི་དྲིལ་ལས་ཁུངས་ཕྱག་ལས་གནང་། ཕྱི་ལོ་ ༢༠༡༤ ཟླ་ ༩ ཚེས་ ༡ ནས་ལོ་རྒྱུས་འབྲི་རྩོམ་དང་བར་བརྒལ་ལས་བཀོད་སྡེ་ཚན་དུ་ཕྱག་ལས་གནང་མུས་ཡིན་པ་བཅས། །
