ཕྱི་ལོ་ ༢༠༡༨ ཟླ་ ༨ ཚེས་ ༢༧ རེས་གཟའ་ཟླ་བ།
༄༅། །ཨ་རིའི་གྲོས་ཚོགས་ཀྱི་སྤྱི་མཐུན་ཚོགས་པའི་ཚོགས་མི་སྐུ་ཞབས་ཇོན་མེ་ཀེན་John McCain མཆོག་ཕྱི་ལོ་ ༢༠༡༨ ཟླ་ ༨ ཚེས་ ༢༥ ཉིན་འདས་གྲོངས་སུ་གྱུར་བར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཐུགས་གསོའི་གསུང་འཕྲིན་ཕུལ་བའི་ནང་འཁོད་དོན། ཇོན་མེ་ཀེན་མཆོག་གིས་འགྲོ་བ་མིའི་ཐོབ་ཐང་གི་ཆེད་འཐབ་རྩོད་ཇི་ལྟར་བྱེད་དགོས་མིན་མཁྱེན་གྱི་ཡོད། དམ་པ་དེ་ཉིད་ཀྱིས་དཔེ་དེབ་བཀླགས་པ་ཙམ་མ་ཡིན་པར། གཙོ་བོ་ཨ་རིའི་མི་མང་དང་ཡང་སྒོས་རྒྱལ་སྤྱིའི་འགྲོ་བ་མིའི་ཐོབ་ཐང་དང་མང་གཙོའི་ཆེད་བློས་བཏང་གནང་ཡོད། བོད་མིའི་སྒྲིག་འཛུགས་ཀྱི་སྲིད་སྐྱོང་ཡིན་པའི་ཆ་ནས་སྐབས་འགར་འཛམ་གླིང་གི་དབུ་ཁྲིད་མང་པོ་ཞིག་གིས་ང་ལ་ཐུག་འཕྲད་གནང་བར་གཡོལ་ཐབས་གནང་གི་ཡོད་ཀྱང་། སྐུ་ཞབས་ཇོན་མེ་ཀེན་མཆོག་གིས་དུས་རྟག་ཏུ་སྤྲོ་སེམས་འཁོལ་བའི་ངང་ནས་ང་ལ་ཐུག་འཕྲད་གནང་གི་རེད།
དྲང་པོར་བརྗོད་ན་ཁོང་ནི་སྙིང་སྟོབས་ཆེ་ཞིང་བྱང་སེམས་ལྡན་པ་ཞིག་རེད། དམ་པ་དེ་ཉིད་བཞུགས་སྒར་རྡ་སར་ཕེབས་འདོད་ཡོད་ཀྱང་ཕེབས་ཐུབ་མེད། འོན་ཀྱང་བོད་ཀྱི་རྩ་དོན་ཆེད་ཁ་ཞེ་གཉིས་མེད་ཀྱི་སྒོ་ནས་རྒྱབ་སྐྱོར་དང་གླེང་སློང་གནང་མཁན་ཞིག་ཡིན་པའི་ཆ་ནས། གཞིས་བྱེས་བོད་མི་ཡོངས་ཀྱིས་དམ་པ་དེ་ཉིད་ཡིད་ལ་ལྷང་ངེར་དྲན་ངེས་ཡིན། ཨ་རི་ལ་མཚོན་ན་དཔའ་འཛངས་ལྡན་པའི་མི་སྣ་ཞིག་མེད་པར་ཆགས་པ་རེད། བོད་མི་ཚོར་མཚོན་ན་ཁ་ཞེ་གཉིས་མེད་ཀྱི་བོད་དོན་རྒྱབ་སྐྱོར་བ་ཞིག་འདས་གྲོངས་སུ་གྱུར་པ་རེད། ཕྲན་རང་ཉིད་ལ་མཚོན་ན་བློ་ཐུབ་ཀྱི་གྲོགས་པོ་ཞིག་མེད་སོང་བ་རེད། སྐུ་ཞབས་ཇོན་མེ་ཀེན་ལགས། ང་ཚོས་ཁྱེད་རང་རྟག་ཏུ་དྲན་ངེས་ཡིན། ཞེས་འཁོད་ཡོད།།
