༢༠༡༨ ཟླ་ ༨ ཚེས་ ༢༢ རེས་གཟའ་ལྷག་པ།
༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། སྐབས་ ༡༦ པའི་བོད་མི་མང་སྤྱི་འཐུས་རྣམས་བོད་མིའི་འདུ་སྡོད་གཞིས་ཆགས་ཁག་ལ་ཕྱོགས་བསྐྱོད་ཕེབས་རྒྱུའི་ས་བགོས་ཡོད་པ་ལྟར། སྤྱི་འཐུས་མཁན་པོ་འཇམ་དཔལ་བསྟན་འཛིན་ལགས་དང་སྤྱི་འཐུས་བསམ་གཏན་ཆོས་སྒྲོན་ལགས་རྣམ་གཉིས་ཕྱི་ལོ་ ༢༠༡༨ ལོའི་ཟླ་ ༨ ཚེས་ ༢༣ ནས་ཕྱི་ཟླ་ ༩ ཚེས་ ༡༠ བར་རྒྱ་གར་བྱང་ཕྱོགས་ཇ་མུ་ཀ་ཤི་མིར་མངའ་སྡེའི་ནང་རྟེན་གཞི་བྱས་པའི་ལ་དྭགས་སླེ་བྱང་ཁྱབ་ཁོངས་བོད་མིའི་སྡོད་སྒར་ཁག་ལ་གཞུང་འབྲེལ་ཕྱོགས་བསྐྱོད་གནང་གཏན་འཁེལ་ཡོད།
དེ་ཡང་སྤྱི་འཐུས་མཁན་པོ་འཇམ་དཔལ་བསྟན་འཛིན་ལགས་ཕྱི་ཟླ་ ༨ ཚེས་ ༢༣ ཉིན་ལྡི་ལིར་ཕེབས་འབྱོར་གནང་རྒྱུ་དང་། སྤྱི་འཐུས་བསམ་གཏན་ཆོས་སྒྲོན་ལགས་ཕྱི་ཚེས ༢༣ ཉིན་སྦེང་ལོར་བརྒྱུད་ལྡི་ལིར་ཕེབས་ཐོན་གྱིས་ཕྱི་ཚེས་ ༢༤ ཉིན་ལྡི་ལིར་མཉམ་འཛོམས་གནང་རྗེས་ཕྱི་ཚེས་ ༢༥ ཉིན་སྤྱི་འཐུས་རྣམ་གཉིས་ལྡི་ལི་ནས་ལ་དྭགས་སུ་ཕེབས་འབྱོར་གནང་རྒྱུ་དང་། ཕྱི་ཚེས་ ༢༦ ནས་སླེ་ས་ཁུལ་དུ་ཉིན་ ༧ རིང་ལས་རིམ་དང་མང་གཙོའི་དུས་ཆེན་གྱི་མཛད་སྒོར་མཉམ་ཞུགས་གནང་རྗེས་ཕྱི་ཟླ་ ༩ ཚེས་ ༣ ནས་ཚེས་ ༧ བར་ལ་བྱང་ཁུལ་དུ་ལས་རིམ་ནང་མཉམ་ཞུགས་གནང་རྒྱུ། དེ་ནས་ཕྱི་ཚེས་ ༨ ནས་ཚེས་ ༩ བར་ཀར་གྷིལ་དང་། ཤྲི་ན་གར་སོགས་ཀྱི་ས་གནས་ཁག་ལ་ལས་རིམ་གྲུབ་མཚམས། ཕྱི་ཚེས་ ༡༠ ཉིན་སྤྱི་འཐུས་རྣམ་གཉིས་ལྡི་ལི་ནས་སྦེང་ལོར་བརྒྱུད་ཕྱི་ཚེས་ ༡༡ ཉིན་སོ་སོའི་བཞུགས་གནས་སུ་ཕྱིར་ཕེབས་གནང་རྒྱུ་ཡིན་པ་བཅས།།
