༢༠༡༨ ཟླ་ ༨ ཚེས་ ༢༧ རེས་གཟའ་ཟླ་བ།

༄༅། །ཨ་རིའི་གྲོས་ཚོགས་ཀྱི་སྤྱི་མཐུན་ཚོགས་པའི་ཚོགས་མི་སྐུ་ཞབས་ཇོན་མེ་ཀེན་ Senator John McCain མཆོག་འདས་གྲོངས་སུ་གྱུར་བར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དམ་པ་ཁོང་གི་ལྕམ་སིན་ཌི་མེ་ཀེན་ Mrs. Cindy McCain མཆོག་ལ་གུས་འདུད་ཀྱི་གསུང་འཕྲིན་ཞིག་སྩལ་བའི་ནང་འཁོད་དོན། སྐུ་ཉིད་མཆོག་དང་ནང་མི་ལྷན་རྒྱས་ད་ལྟ་མྱ་ངན་གྱིས་གནོན་བཞིན་པའི་དུས་སྐབས་འདིར་ངོས་ཀྱིས་སེམས་གསོ་ཞུ་རྒྱུ་ཡིན། ཕྱི་ལོ་ ༢༠༠༨ ལོར་གྲོང་ཁྱེར་ཨ་སི་པེན་ Aspen ནང་དུ་ངོས་རང་དམ་པ་ཁོང་དང་མཇལ་རྒྱུ་བྱུང་བ་ནི་དགའ་ཚོར་སྐྱེ་གཞི་ཞིག་ཡིན། དམ་པ་ཁོང་གིས་ལོ་མང་རིང་ལྷག་བསམ་རྣམ་དག་ཐོག་ནས་ཨ་རིའི་མི་མང་གི་སྲི་ཞུ་བསྒྲུབས་པ་དེར་ངོས་ཀྱིས་ཡུན་རིང་ནས་ཡི་རངས་བསྔགས་བརྗོད་ཞུ་བཞིན་ཡོད།
དམ་པ་ཁོང་གིས་སྤྱིར་མང་གཙོ་དང་འགྲོ་བ་མིའི་ཐོབ་ཐང་། ཁོར་ཡུག་སྲུང་སྐྱོབ་བཅས་ཀྱི་གནད་དོན་ཐོག་དོན་དམ་གྱིས་སེམས་ཁུར་བླངས་པ་མ་ཟད། ལྷག་པར་བོད་ཀྱི་གནད་དོན་ཐོག་རྒྱབ་སྐྱོར་གནང་བ་དེར་ངོས་ཀྱིས་བཀའ་དྲིན་སྙིང་བཅངས་ཞུ་བཞིན་ཡོད། ཅེས་འཁོད།

                           ༼གསུང་འཕྲིན་ངོ་མ་ཨིན་ཡིག་ནས་ཕྱི་དྲིལ་བོད་ཡིག་ཚན་པས་ཕབ་བསྒྱུར་ཞུས་པས་ཨིན་ཡིག་དེར་རྩ་འཛིན་ཡོང་བ་ཞུ།༽