ཕྱི་ལོ་ ༢༠༡༨ ཟླ་ ༨ ཚེས་ ༢༣ རེས་གཟའ་ཕུར་བུ།  

༄༅། །ཕྱི་ལོ་ ༢༠༡༨ ཟླ་ ༨ ཚེས་ ༢༢  རེས་གཟའ་ལྷག་པ་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་གི་མཇལ་འཕྲད་ཁང་དུ་མངའ་རིས་སྤྱི་མཐུན་ཚོགས་པའི་ཚོགས་མི་རྣམས་ལ་མཇལ་ཁ་དང་དབུ་མའི་ལམ་གྱི་སྐོར་བཀའ་སློབ་སྩལ་དོན། རྒྱ་ནག་ལོ་རྒྱུས་ཀྱི་ཡིག་ཆ་རྒྱ་ཡིག་ནང་བོད་རང་བཙན་ཡིན་མ་གཏོགས་བོད་རྒྱ་ཁོངས་ཡིན་པར་ཁྱོན་ནས་གསལ་གྱི་མེད་པ་རྒྱ་མི་མཁས་པ་མང་པོ་ཞིག་གི་བརྗོད་ཀྱི་འདུག  སྔ་མོ་ང་ཚོས་ཁ་རྒྱུན་ལ་རྒྱ་ཧོར་བོད་གསུམ་ཞེས་བཤད་སྲོལ་ཡོད་པ་ལྟར། རྒྱ་ནག་གི་རྒྱལ་པོ་དང་།  བོད་ཀྱི་རྒྱལ་པོ།  ཧོར་སོག་པོའི་རྒྱལ་པོ་བཅས་རྒྱལ་ཁབ་གསུམ་ལ་རྩི་གི་འདུག  ལོ་རྒྱུས་ཀྱི་ཐོག་ནས་འགྲོ་སྟངས་དེ་འདྲ་རེད།   གོ་མིན་ཏང་དང་གུང་ཁྲན་ཏང་གིས་བོད་རྒྱ་ཁོངས་ཡིན་པའི་ཁུངས་བཅོལ་ས་དེ་བོད་ཀྱི་ཡིག་ཆ་ལ་ཆ་བཞག་གི་ཡོད། ང་ཚོས་འཇམ་དབྱངས་གོང་མ་ཞེས་ཧ་ཅང་རྩ་ཆེན་པོར་བརྩིས་ནས་འཇམ་དབྱངས་གོང་མའི་རྒྱབ་སྐྱོར་བཙལ་ནས་བོད་ནང་སོ་སོ་རང་ཉིད་ལ་དབང་ཆ་ཏོག་ཙམ་ཐོབ་སླད་རྒྱ་ནག་གོང་མའི་རྒྱབ་སྐྱོར་འཚོལ་གྱི་ཡོད།  རྒྱ་ཡིག་ནང་གོང་མ་ཐང་རྒྱལ་རབས་ནས་མན་ཇུའི་རྒྱལ་རབས་བར་དུ་བོད་རྒྱ་ཁོངས་ཡིན་པར་ཁྱོན་ནས་གསལ་གྱི་མི་འདུག   བོད་རྒྱ་ཁོངས་ཡིན་པ་བོད་ཡིག་ནང་གསལ་གྱི་འདུག  ཅེས་རྒྱ་ནག་གི་མཁས་དབང་དེ་འདྲས་ངོས་ལ་དེ་ལྟར་བརྗོད་ཀྱི་འདུག   

ལོ་རྒྱུས་ནི་ལོ་རྒྱུས་རེད། ད་ལྟའི་དངོས་ཡོད་གནས་ཚུལ་ལ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཞེས་པའི་ཚིག་འདིའི་ནང་ང་ཚོ་མཉམ་དུ་བསྡད་ནས་མཐུན་པའི་རྐྱེན་གཅིག་ནི་རྒྱ་ནག་ནང་དུ་ད་ལྟའི་ཆར་ནང་པ་མང་པོ་ཞིག་ཡོད། ནང་པ་དེ་ཚོའི་གྲས་ཀྱིས་བོད་ནང་གི་ནང་པ་རྣམས་ལ་ཡིད་ཆེས་དང་དགའ་མོས་ཧ་ལས་པ་བྱེད་ཀྱི་འདུག  རྒྱ་ནག་ནང་དུ་ནང་པ་ཧ་ལམ་ས་ཡ་བཞི་བརྒྱ་མ་ཟིན་ཙམ་ཡོད་པ་བརྗོད་ཀྱི་འདུག  སྔ་མོ་ང་ཚོ་བོད་པས་རྒྱ་བོད་མཆོད་ཡོན་ཞེས་ཟེར་སྲོལ་ཡོད།  ད་ཆ་བོད་ཀྱི་སངས་རྒྱས་པའི་ཆོས་དེ་རྒྱ་ནག་གི་ནང་པ་གཙོ་བོར་གྱུར་བའི་རྒྱ་ནག་ནང་དུ་ཕན་ཐོགས་བྱེད་ཐུབ་པ་ཞིག་དང་།  རྒྱལ་ཁབ་སྤྱི་ཡོངས་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ནང་བསྡད་ནས་ང་ཚོའི་ལུང་པར་འཛུགས་སྐྲུན་བྱ་རྒྱུ་ཐད་རྒྱ་ནག་གཞུང་གིས་འགྲོ་སོང་བཏང་ནས་དཔལ་འབྱོར་ཐོག་རྒྱ་ནག་གཞུང་གིས་རོགས་བྱེད་རྒྱུ་བྱུང་ན་ང་ཚོའི་ཆོས་དད། བོད་ཀྱི་རིག་གཞུང་དང་སྐད་ཡིག་རྣམས་བོད་པ་རང་ཉིད་ཀྱིས་བདག་པོ་ཡག་པོ་ཞིག་བརྒྱབ།  རྒྱ་ནག་གི་ནང་པ་རྣམས་ལ་རོགས་པ་བྱ་རྒྱུ་དབུ་མའི་ལམ་གྱི་ཐོག་ནས་ཕྱི་ལོ  ༡༩༧༤ ལོར་བསམ་བློ་བཏང་བ་རེད།  སྐབས་དེར་ཉམས་མྱོང་ཅན་ནེ་རུ་ཡོད། ནེ་རུ་ནི་དངོས་གནས་ཉམས་མྱོང་ཅན་ཞིག་རེད། སྔ་ཕྱི་མ་གཏོགས་རྒྱ་ནག་རང་དང་འབྲེལ་བ་བྱེད་དགོས་ཀྱི་རེད། འཛམ་གླིང་རྒྱལ་ཚོགས་ལ་རེ་བ་བརྒྱབ་ནས་ཡོང་ཐུབ་རྒྱུ་ཁག་པོ་རེད། ཨ་མི་རི་ཀས་བོད་ཀྱི་རང་དབང་དོན་དུ་རྒྱ་ནག་ལ་དམག་བརྒྱག་གི་མ་རེད། ཅེས་ནེ་རུ་རང་གིས་ངོས་ལ་བརྗོད་བྱུང་། དེ་ཚོ་དངོས་ཡོད་གནས་ཚུལ་ཞིག་རེད། ཕྱི་ལོ་ ༡༩༧༤ ནས་ང་ཚོས་འཛམ་གླིང་རྒྱལ་ཚོགས་སུ་ཞུ་གཏུག་བྱེད་ན་དགོས་པ་མི་འདུག སྔ་ཕྱི་མ་གཏོགས་རྒྱ་ནག་གཞུང་དང་འབྲེལ་བ་བྱེད་དགོས་འདུག་ཅེས་དེ་ལྟར་ཕྱི་ལོ་ ༡༩༧༤ ལོར་དབུ་མའི་ལམ་གྱི་སྲིད་བྱུས་གཏན་འཁེལ་བ་རེད།  མཁྱེན་སོང་ངམ།
སྐབས་དེ་དུས་བཀའ་བློན་དབང་རྡོར་ལགས། ཚེ་དབང་རྟ་མགྲིན་ལགས། ཀུན་བདེ་གླིང་ཡོད། དེ་དུས་གཏན་འབེབས་བྱས་པའི་སྲིད་བྱུས་དེར་རྒྱ་ནག་གཞུང་གིས་ནམ་ཞིག་ལག་པ་བརྐྱངས་ནས་ང་ཚོའི་ངོས་ནས་བརྐྱང་ཆོག་ཆོག་དང་། ང་ཚོ་ཁ་བྲལ་བ་ཆགས་ཀྱི་མེད། རྒྱ་ནག་ནང་འགྱུར་བ་རིམ་བཞིན་འགྲོ་བཞིན་ཡོད་པའི་བཟོ་ལྟ་ཞིག་འདུག མཁྱེན་སོང་ངམ། ཞེས་བཀའ་སློབ་སྩལ།།