ཕྱི་ལོ་ ༢༠༡༨ ཟླ་ ༨ ཚེས་ ༡༨ རེས་གཟའ་སྤེན་པ། 

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༨ ཟླ་ ༨ ཚེས་ ༡༨ ཉིན་ཀེ་རེ་ལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པི་ན་ར་ཡི་ཝི་ཇ་ཡན་ Pinarayi Vijayan མཆོག་ལ་ཉེ་ཆར་ཀེ་ར་ལ་མངའ་སྡེའི་ནང་སྔར་བབས་མ་མྱོང་བའི་ཆར་ཞོད་ཆེན་པོ་བབས་པར་བརྟེན། མི་རྒྱུ་ཟོག་གསུམ་ལ་གོད་ཆག་ཆེན་པོ་བྱུང་བར་གདུང་སེམས་མཉམ་སྐྱེའི་གསུང་འཕྲིན་ཞིག་བསྩལ་བའི་ནང་འཁོད་དོན།  སྐུ་ཉིད་མཆོག་གི་མངའ་སྡེའི་ས་ཁུལ་ཁག་མང་པོ་ཞིག་གི་ནང་ཉེ་ལམ་ཆུ་རུད་ཀྱི་གོད་ཆག་ཚབས་ཆེན་འོག་མི་མང་པོའི་ཚེ་སྲོག་ཤོར་བ་དང་། སྡོད་ཁང་སོགས་རྒྱུ་ནོར་ཧ་ཅང་མང་པོ་གཏོར་བཤིག་ཕྱིན་པ་མ་ཟད། སྔར་མ་བྱུང་བའི་གོད་ཆག་དེས་དཀའ་སྡུག་ཚབས་ཆེན་བཟོས་པ་དེར་ངོས་ཀྱིས་བློ་ཕམ་དང་སྦྲགས་གདུང་སེམས་མཉམ་སྐྱེ་ཞུ་རྒྱུ་ཡིན། འོན་ཀྱང་ཛ་དྲག་ངལ་སེལ་རོགས་སྐྱོར་ལས་གཞི་ཚགས་ཚུད་ངང་སྤེལ་བཞིན་ཡོད་པ་དེར་ཡིད་རངས་བསྔགས་བརྗོད་ཞུ་རྒྱུ་ཡིན།

ངོས་ནས་ཐེངས་འདིར་ཀེ་ར་ལའི་མི་མང་རྣམས་ལ་གདུང་སེམས་མཉམ་སྐྱེ་དང་ངལ་སེལ་ལས་གཞིར་དམིགས་ནས་ཏཱ་ལའི་བླ་མའི་ཐེབས་རྩ་བརྒྱུད་ཞལ་འདེབས་ཕྲན་བུ་འབུལ་རྒྱུ་ཡིན།

སྐུ་ཉིད་མཆོག་དང་གོད་ཆག་འོག་འདས་གྲོངས་སུ་གྱུར་བ་རྣམས་ཀྱི་ཤུལ་ལུས་ནང་མི་དང་སྤུན་མཆེད། ལྷག་པར་ཆུ་རུད་ཀྱི་གོད་ཆག་འོག་དཀའ་སྡུག་མྱོང་བཞིན་པ་རྣམས་ལ་སེམས་གསོ་ཞུ་རྒྱུ་ཡིན། ཞེས་འཁོད། །

འདི་ག་བོད་ཡིག་ཚན་པས་ཕབ་བསྒྱུར་ཞུས་པས་ཚིག་དོན་ལ་ཧེ་བག་ཡོད་ཚེ་ཨིན་ཡིག་ལ་རྩ་འཛིན་ཡོང་བ་ཞུ།