ཕྱི་ལོ་ ༢༠༡༨ ཟླ་ ༨ ཚེས་ ༢༣ རེས་གཟའ་ཕུར་བུ།

༄༅། །ཕྱི་ལོ་ ༢༠༡༨ ཟླ་ ༨ ཚེས་ ༢༡ ཉིན་ལྷོ་ཨ་མི་རི་ཁའི་སྐུ་ཚབ་དོན་གཅོད་ཚེ་དབང་ཕུན་ཚོགས་ལགས་ཀྱིས་ཅི་ལེའི་ Chile གྲོས་ཚོགས་འོག་མའི་ཕྱི་འབྲེལ་ལས་དོན་ཚན་པའི་ཚོགས་མི་རྣམ་པར་ད་ལྟའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་ཞུ་གཏུག་གནང་།

དེ་ཡང་ཞུ་གཏུག་ཚོགས་འདུའི་ཐོག་ཅི་ལེའི་གྲོས་ཚོགས་འོག་མའི་ཕྱི་འབྲེལ་ལས་དོན་ཚན་པའི་ཚོགས་གཙོ་ཝེ་ལ་དོ་ Vlado Mirosevic Verdugo  ལགས་ཀྱིས་གཙོས་ཚོགས་མི་ལུ་ཡི་སི་  Luis Rocaful Lopez ལགས་དང་། ཇེ་མེ་ན་རན་ཇོ་ Jaime Naranjo Ortiz ལགས།   མ་ནུལ་མ་ཊ་ Manuel Matta Aragay ལགས། ཨི་ས་ཀོར་ཊི་ Issa Kort Garricaལགས། ཝི་ཌལ་ Pablo Vidal Rojasལགས། དེ་བཞིན་གྲོས་ཚོགས་འོག་མའི་ཕྱི་འབྲེལ་ལས་དོན་ཚན་པའི་ལས་བྱེད་བཅས་ཁྱོན་ཚོགས་བཅར་བ་མི་གྲངས་ ༢༠ ཙམ་ཆེད་ཕེབས་གནང་ཡོད།

ལྷོ་ཨ་མི་རི་ཁའི་སྐུ་ཚབ་དོན་གཅོད་ཀྱིས་ཕྱི་ལོ་༢༠༠༨ ལོའི་ས་བྱི་ཞི་རྒོལ་ཆེན་པོ་བྱུང་བ་ནས་བཟུང་བོད་ནང་གི་འགྲོ་བ་མིའི་ཐོབ་ཐང་ཇེ་སྡུག་ཏུ་འགྲོ་བཞིན་ཡོད་པ་མ་ཟད། རྒྱ་གཞུང་གིས་མུ་མཐུད་ཆོས་དད་དང་སྨྲ་བརྗོད་རང་དབང་། བོད་ཀྱི་སྐད་ཡིག་རྒྱུན་འཛིན་ཐོག་དྲག་གནོན་བྱས་དང་བྱེད་བཞིན་ཡོད་པའི་སྐོར་དང་། དེ་བཞིན་བོད་ཀྱི་ཐུན་མོང་མ་ཡིན་པའི་འབྲོག་པའི་འཚོ་བ་སྐྱེལ་སྟངས་དང་ཁོར་ཡུག་སོགས་ལ་གཏོར་བཤིག་ཚབས་ཆེན་གཏོང་བཞིན་ཡོད་པའི་སྐོར་ཞུ་གཏུག་གནང་ཡོད།
རྒྱ་གཞུང་གིས་མུ་མཐུད་བོད་ནང་གི་བོད་མིའི་འགྲོ་འདུག་ལ་དམ་བསྒྲགས་བྱེད་བཞིན་ཡོད་པར་བརྟེན། ད་བར་བོད་མི་ ༡༥༢ ཀྱིས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་དགོས་པ་དང་། བོད་ལ་རང་དབང་དགོས་ཞེས་ཞི་བའི་སྐད་འབོད་བརྒྱབ་སྟེ་རང་ལུས་མེར་སྲེག་གནང་ཡོད། དེ་བཞིན་རྒྱ་གཞུང་གིས་རང་ལུས་མེར་སྲེག་གཏོང་མཁན་གྱི་ཤུལ་ལུས་ནང་མི་སྤུན་མཆེད་ཉེ་འབྲེལ་སོགས་ལའང་བཙོན་འཇུག་དང་ཉེས་རྡུང་སོགས་གཏོང་གི་ཡོད།

བོད་རྒྱ་གཉིས་ཀྱི་གནད་དོན་སེལ་བའི་ཐབས་ལམ་དབུ་མའི་ལམ་བརྒྱུད་ཐུན་མོང་གི་ཁེ་ཕན་ཐོག་ནས་རྒྱ་ནག་གི་རྩ་ཁྲིམས་ནང་ངོས་འཛིན་ཡོད་པའི་བོད་རིགས་ས་ཁུལ་ཡོངས་རྫོགས་ལ་སོ་སོའི་སྐད་ཡིག་དང་རིག་གཞུང་དེ་དག་སྲུང་སྐྱོབ་བྱེད་རྒྱུའི་ཐོབ་ཐང་གཅིག་གྱུར་དགོས་ཀྱི་ཡོད་པའི་སྐོར་འགྲེལ་བརྗོད་གནང་། གྲོས་ཚོགས་འོག་མའི་ཕྱི་འབྲེལ་ལས་དོན་ཚན་པའི་ཚོགས་མི་རྣམས་ནས་དྲི་བ་ཁག་གཅིག་དྲིས་པར་ལྷོ་ཨ་མི་རི་ཁའི་སྐུ་ཚབ་དོན་གཅོད་ཚེ་དབང་ཕུན་ཚོགས་ལགས་ཀྱིས་ལན་འདེབས་ཁ་གསལ་གནང་བ་དང་སྦྲགས། ཚོགས་མི་རྣམ་པར་ཐུགས་རྗེ་ཆེ་ཞུའི་ཁ་བཏགས་རེ་ཕུལ་ཏེ་ཚོགས་འདུ་གྲོལ་ཡོད་པ་བཅས། །