རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོ་སྲུང་བརྩི་གཟབ་རྒྱས་ཞུས་པ།

གསར་ལས་ཁང་གི་གསར་འགོད་པས།

༢༠༡༨-༠༨-༡༦

ཕྱི་ལོ་ ༢༠༡༨ ཟླ་ ༨ ཚེས་ ༡༦ རེས་གཟའ་ཕུར་བུ།

༄༅། །ཕྱི་ལོ་ ༢༠༡༨ ཟླ་ ༨ ཚེས་ ༡༥ ཉིན་ཏེ་རྒྱ་གར་རང་བཙན་ཐོབ་པའི་ཉིན་མོ་དང་བསྟུན་བཙན་བྱོལ་བོད་མི་ཚོང་པ་ཚོགས་པས་རྒྱ་གར་བྱང་ཕྱོགས་པན་ཇབ་མངའ་སྡེའི་གྲོང་སྡེ་ལུ་དྷ་ཡ་ནའི་ནང་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོ་ཞིག་གོ་སྒྲིག་གནང་ཡོད།

དེ་ཡང་མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་དང་། དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཞོན་ཨ་ཅཱརྱ་ཡེ་ཤེས་ཕུན་ཚོགས་མཆོག རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་སར་དར་རབ་མིཏ་སིངྒ་སྦི་ཊུ་ Sardar Rabmith Singh Bitu མཆོག དངོས་ཟོག་དང་དཔྱ་ཁྲལ་སྡེ་ཚན་གྱི་འགན་འཛིན་སྐུ་ཞབས་པ་ཝན་གྷར་གྷ་Shri Pawan Garg མཆོག་སོགས་རྒྱ་གར་གྱི་གནད་ཡོད་མི་སྣ་ཁག་གཅིག་དང་། དེ་བཞིན་ཚོང་དཔོན་ལཱ་ལཱ་ Lalas གྲངས་༡༣༠ དང་རྒྱ་གར་རྒྱལ་ཡོངས་ཀྱི་བཙན་བྱོལ་བོད་མི་སུད་ཚོང་ཁྱོན་མི་གྲངས་ ༤༠༠ ལྷག་ཙམ་ལྷན་འཛོམས་གནང་ཡོད།

སྐབས་དེར་སྐུ་མགྲོན་གཙོ་བོ་དཔལ་འབྱོར་བཀའ་བློན་མཆོག་གིས་རྒྱ་གར་ཨིན་ཇིའི་བཙན་རྒྱལ་ལམ་ལུགས་ཀྱི་དབང་སྒྱུར་འོག་ནས་རང་བཙན་ཐོབ་སྟེ་ད་བར་མི་ལོ་ ༧༢ འཁོར་བའི་ཉིན་མོར་འཚམས་འདྲི་དང་སྦྲགས། ཕྱི་ལོ ༡༩༥༩ ནས་བཟུང་ད་བར་རྒྱ་གར་གཞུང་མང་གཉིས་ནས་བོད་མི་རྣམས་ལ་རྒྱབ་སྐྱོར་ཤུགས་ཆེ་གནང་བ་དང་། ལུ་དྷི་ཡ་ནའི་ཚོང་དཔོན་དང་བོད་མི་སུད་ཚོང་བ་གཉིས་ཀྱི་དབར་ལྷག་བསམ་ཟོལ་མེད་ཀྱི་འབྲེལ་བ་ལ་རྗེས་སུ་ཡི་རངས་ཞུས་པ་དང་སྦྲགས་འཕགས་བོད་གཉིས་ཀྱི་དབར་ལོ་ངོ་སྟོང་ཕྲག་རིང་ནས་འབྲེལ་བ་དམ་གཟབ་ཡོད་སྐོར་དང་། ཕྱོགས་མཚུངས་བོད་ཀྱི་རྩ་དོན་མུ་མཐུད་མཇུག་སྐྱོང་སླད་བོད་མི་ཡོངས་ལ་འགན་སྐོར་དང་བཙན་བྱོལ་བོད་མི་སུད་ཚོང་བ་རྣམས་ནས་མུ་མཐུད་ས་གནས་ཡུལ་ཁྲིམས་དང་མཐུན་པའི་ཐོག་ནས་ཚོང་ལས་གཉེར་དགོས་སྐོར་སོགས་ཀྱི་གསུང་བཤད་གནང་།

དེ་ནས་བོད་མི་མང་སྤྱི་འཐུས་ཚོགས་གཞོན་ཨ་ཅཱརྱ་ཡེ་ཤེས་ཕུན་ཚོགས་མཆོག་གིས་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུས་པ་དང་སྦྲགས་རྒྱ་ནག་གཞུང་གི་གདུག་རྩུབ་ཅན་གྱི་སྲིད་བྱུས་འོག་ད་ལྟའི་བོད་ནང་གི་ཛ་དྲག་གནས་སྟངས་སྐོར་གསུང་བཤད་གནང་།
མཐར་གྲོས་ཚོགས་འོག་མའི་འཐུས་མི་སྐུ་ཞབས་སར་དར་རབ་མིཏ་སིངྒ་སྦི་ཊུ་མཆོག་དང་། དངོས་ཟོག་དང་དཔྱ་ཁྲལ་སྡེ་ཚན་གྱི་འགན་འཛིན་སྐུ་ཞབས་པ་ཝན་མཆོག་རྣམ་གཉིས་ལ་སྐུ་མགྲོན་གཙོ་བོ་དཔལ་འབྱོར་བཀའ་བློན་མཆོག་གིས་ཐུགས་རྗེ་ཆེ་ཞུའི་དྲན་རྟེན་ཕྱག་རྟགས་དང་བོད་མི་མང་སྤྱི་འཐུས་ཚོགས་གཞོན་ཨ་ཅཱརྱ་ཡེ་ཤེས་ཕུན་ཚོགས་མཆོག་གིས་རྒྱ་གར་གྱི་གས་ཡོད་མི་སྣ་རྣམས་ལཐུགས་རྗེ་ཆེ་ཞུའི་དྲན་རྟེན་ཕྱག་རྟགས་གནང་ཡོད།

མཛད་སྒོ་གྲུབ་རྗེས་དཔལ་འབྱོར་བཀའ་བློན་མཆོག་ཕྱི་ལོ་ ༢༠༡༨ ཟླ་ ༨ ཚེས་ ༡༧ དང་ ༡༨ ཉིན་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་སུ་བཙན་བྱོལ་བོད་མིའི་ཡར་ཐོན་ཚོང་པའི་འདུ་འཛོམས་ཐེངས་བཞི་པའི་དབུ་འབྱེད་མཛད་སྒོར་ལྷན་ཞུགས་གནང་སླད་ཕེབས་ཡོད་པ་བཅས།།