ཕྱི་ལོ་ ༢༠༡༨ ཟླ་ ༨ ཚེས་ ༡༣ རེས་གཟའ་ཟླ་བ།

༄༅། །རྒྱ་ནག་གཞུང་གིས་མི་སེར་ལག་ཁྱེར་སྤྲོད་ཕྱོགས་ཐད་སྲིད་བྱུས་མི་འདྲ་བ་གཉིས་ལག་བསྟར་བྱེད་བཞིན་པ་དེས་བོད་མི་ཚོར་མི་སེར་ལག་ཁྱེར་ཐོབ་འགྱུར་འགོག་རྐྱེན་བཟོ་བཞིན་ཡོད་སྟབས། རྒྱལ་ཚོགས་ཀྱི་ཁྱད་ལས་མི་སྣ་ཁ་ཅིག་གིས་རྒྱ་ནག་གཞུང་ལ་ཡིག་ཐོག་ཏུ་དྲི་རྩད་བྱེད་འདུག
དེ་ཡང་ཕྱི་ལོ་ ༢༠༡༨ ཟླ་ ༨ ཚེས་ ༦ ཉིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་མི་རིགས་དབྱེ་འབྱེད་རྩ་མེད་བཟོ་རྒྱུའི་ལས་དོན་ཚོགས་ཆུང་གིས་རྒྱ་ནག་གཞུང་གིས་མི་རིགས་དབྱེ་འབྱེད་ཀྱི་གནད་དོན་ཐད་ལ་བསྐྱར་ཞིབ་བྱེད་བཞིན་པའི་དུས་སྐབས་དང་བསྟུན་རྒྱལ་ཚོགས་ཁྱད་ལས་མི་སྣ་ཁག་གཅིག་གིས་གནད་དོན་དེའི་ཐོག་སེམས་འཚབ་ཀྱི་རྣམ་པ་ཤུགས་ཆེ་བཏོན་འདུག

གཞན་ཡང་ཡིག་ཐོ་དེའི་ནང་འཁོད་དོན་ལྟར་ན། རྒྱ་ནག་གཞུང་གིས་མི་སེར་ལག་ཁྱེར་སྤྲོད་ཕྱོགས་ཀྱི་སྲིད་བྱུས་མི་འདྲ་བ་གཉིས་ལག་བསྟར་བྱས་པ་བརྒྱུད་བོད་མི་རྣམས་ཀྱི་འགྲོ་བསྐྱོད་ཀྱི་རང་དབང་ལ་དམ་བསྒྲགས་བྱས་པ་ཙམ་མ་ཟད། རྒྱལ་ཁབ་གཞན་ནང་༸གོང་ས་ཏཱ་ལའི་བླ་མ་མཆོག་གི་བཀའ་ཆོས་ཞུ་རྒྱུས་མཚོན་བོད་མི་ཆོས་དད་རང་བ་ལ་དམ་བསྒྲགས་བྱེད་བཞིན་ཡོད་པ་གསལ་འདོན་བྱས་ཡོད།
རྒྱ་གར་དུ་༸གོང་ས་ཏཱ་ལའི་བླ་མ་མཆོག་གི་བཀའ་ཆོས་ཞུ་བར་བཅར་མཁན་བོད་མི་རྣམས་ལ་རྒྱ་ནག་གཞུང་གིས་དུས་བཀག་ངེས་ཅན་ཐོག་བོད་དུ་ཕྱིར་ལོག་དགོས་པ་དང་། ཅི་སྟེ་དུས་བཀག་ནང་ཚུད་ལ་བོད་དུ་ཕྱིར་ལོག་མ་བྱས་ཚེ་འབྲེལ་ཡོད་ནང་མི་སྤུན་མཆེད་རྣམས་ལ་དམ་བསྒྲགས་སུན་གཙེར་བཟོ་རྒྱུའི་སྡིགས་སྐུལ་སྣ་ཚོགས་གཏོང་བཞིན་ཡོད་པ་རྒྱལ་ཚོགས་ཀྱི་འབྲེལ་ཡོད་ཁྱད་ལས་པ་ཚོས་གསལ་འདོན་བྱས་པ་བརྒྱུད་བོད་མི་རྣམས་ཀྱི་མི་སེར་ལག་ཁྱེར་བཙན་འཕྲོག་བྱས་པ་དང་།  བོད་མི་རྣམས་འཛིན་བཟུང་བཀག་ཉར་འོག་དྲི་རྩད་བྱས་པ་དང་། གནས་སྟངས་ཇི་འདྲ་ཞིག་གི་འོག་དོ་དམ་བཀག་ཉར་བྱེད་མིན་ཐད་སེམས་འཚབ་ཤུགས་ཆེ་ཡོད་པ་གསུངས།