ཕྱི་ལོ་ ༢༠༡༨ ཟླ་ ༨ ཚེས་ ༢༠ རེས་གཟའ་ཟླ་བ། 
༄༅། །ཕྱི་ལོ་ ༢༠༡༨ ཟླ་ ༨ ཚེས་ ༡༨ ཉིན་རྒྱལ་ཚོགས་ཀྱི་དྲུང་ཆེ་ཟུར་པ་སྐུ་ཞབས་ཀོ་ཕི་ཨ་ནན་མཆོག་དགུང་ལོ་ ༨༠ ཐོག་འདས་གྲོངས་སུ་གྱུར་པར་ཀོ་ཕི་ཨན་ནན་ཐེབས་རྩ་ཁང་གིས་གསལ་བསྒྲགས་གནང་བར་བརྟེན། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཐུགས་གསོ་གནང་དོན།  ཀོ་ཕི་ཨ་ནན་མཆོག་འདས་གྲོངས་སུ་གྱུར་པའི་ཡིད་སྐྱོ་གནས་ཚུལ་ཐོན་པར་ཧ་ཅང་བློ་ཕམ་བྱུང་། དམ་པ་ཁོང་གིས་རང་ཉིད་ཀྱི་མི་ཚེ་ཧྲིལ་པོར་འགྲོ་བ་མིའི་ཐོབ་ཐང་རྩོད་ལེན་དང་། རྩོད་རྙོག་འདུམ་སྒྲིག དེ་བཞིན་འཛམ་གླིང་ཞི་བདེ་ཡོང་ཐབས་སླད་འབད་བརྩོན་ཤུགས་ཆེ་གནང་ཡོད།
སྐུ་ཞབས་ཀོ་ཕི་ཨ་ནན་མཆོག་ནི་ཕྱི་ལོ་ ༡༩༣༨ ཟླ་ ༤ ཚེས་ ༡༨ ཉིན་གྷ་ནར་འཁྲུངས་ཤིང་། རྒྱལ་ཚོགས་ཀྱི་དྲུང་ཆེ་ཐེངས་བདུན་པ་ཡིན་པ་མ་ཟད། དུས་ཡུན་ཐེངས་གཉིས་རིང་དྲུང་ཆེ་གནང་ཡོད། ཁོང་གི་མཉམ་འབྲེལ་རྒྱལ་ཚོགས་དང་ལྷན་འགྲོ་བ་མིའི་ཐོབ་ཐང་གི་ཆེད་རླབས་ཆེན་གྱི་ཕྱག་ལས་གནང་བར་ཕྱི་ལོ་ ༢༠༠༡ ལོར་ནོ་བེལ་གཟེངས་རྟགས་ཚོགས་ཆུང་ནས་ནོ་བེལ་ཞི་བདེའི་གཟེངས་རྟགས་ཕུལ་གནང་ཡོད།   རྒན་ཡོལ་ཐོན་རྗེས་ཀོ་ཕི་ཨན་ནན་ཐེབས་རྩ་དང་ནེལ་སོན་མན་ཌེ་ལ་མཆོག་གིས་འཛུགས་སྐྲུན་གནང་བ་ The Elders ཞེས་པའི་བདེ་རྩ་དེ་བརྒྱུད་འཛམ་གླིང་ཞི་བདེ་བསྐྲུན་ཐབས་སླད་མུ་མཐུད་ཕྱག་ལས་གནང་ཡོད། །