ཕྱི་ལོ་ ༢༠༡༨ ཟླ་ ༨ ཚེས་ ༦ རེས་གཟའ་ཟླ་བ།
༄༅། །བོད་ཁམས་ནག་ཆུ་ཁུལ་ནག་ཆུ་རྫོང་ཤག་རོང་སྟར་ཆེན་ཡུལ་ཚོ་སྲ་ཁུ་གྲོང་ནས་ཡིན་པའི་ཚོང་པ་བསྟན་འཛིན་ཆོས་འཕེལ་ལགས་ཉེ་ཆར་རྒྱ་གཞུང་གིས་འཇུ་བཟུང་བྱས་ཏེ་གར་ཡོད་ཅི་བྱུང་མེད་པར་གྱུར་ཡོད་འདུག
དེ་ཡང་བརྒྱུད་ལམ་ཁག་གི་ནང་གནས་ཚུལ་སྤེལ་གསལ་ལྟར་ན། ཕྱི་ལོ་༢༠༡༨ ལོའི་ཕྱི་ཟླ་༣ པའི་ཟླ་མཇུག་ཏུ་བསྟན་འཛིན་ཆོས་འཕེལ་ལགས་རྒྱ་ནག་ནས་ལྷ་སར་ལོག་པའི་ལམ་བར་དུ་གོང་དཀར་གནམ་ཐང་ནས་གློ་བུར་དུ་འཇུ་བཟུང་བྱས་ནས་ཅ་དངོས་སྔོག་བཤེར་བྱས་སྐབས་ཆབ་སྲིད་དང་འབྲེལ་བའི་རྩོམ་ཡིག་འགའ་ཞིག་དང་། སྡོད་ཁྱིམ་དུ་སྔོག་བཤེར་སྐབས༧་གོང་ས་མཆོག་གི་སྐུ་པར་བཅས་ཐོན་པའི་གནས་ཚུལ་ཙམ་ལས་ཞིབ་ཕྲའི་ཁ་གསལ་ཤེས་རྟོགས་ཐུབ་ཀྱི་མེད་པ་དང་། ད་ལྟའི་ཆར་ས་གནས་གང་ཞིག་ཏུ་གནས་སྟངས་ཅི་འདྲའི་འོག་ཡོད་མེད་སོགས་གང་ཡང་ཤེས་ཐབས་མེད་འདུག སྤྱིར་བོད་ས་ཡོངས་དང་ལྷག་པར་རྒྱ་གཞུང་གིས་བསྙད་པའི་བོད་རང་སྐྱོང་ལྗོངས་ཞེས་པའི་ས་ཁུལ་དུ་དེང་གི་ཆར་ཧ་ཅང་གི་གདུག་རྩུབ་དང་དམ་དྲག་འོག་མང་ཚོགས་ཚོའི་འགྲོ་འདུག་ལ་གཟབ་ནན་བྱ་དགོས་པས་དོན་དངོས་སུ་ད་ལྟའི་ཆར་རང་དབང་ཡོངས་སུ་བྲལ་བའི་ས་ཁུལ་ཞིག་ཏུ་ཆགས་ཡོད་འདུག་པ་བཅས།།
