ཕྱི་ལོ་ ༢༠༡༨ ཟླ་ ༨ ཚེས་ ༢༤ རེས་གཟའ་པ་སངས།
༄༅། །བཀྲ་ཤིས་དབང་ཕྱུག་ལགས་ཀྱི་ཁྲིམས་རྩོད་པ་ལིང་ཞོ་ཇུན་ Liang Xiaojun ལགས་ཀྱིས་ཊི་ཝི་ཊར་ Twitter ཞེས་པའི་སྤྱི་ཚོགས་དྲ་རྒྱའི་སྟེང་འཁོད་པ་ལྟར་ན། མཚོ་སྔོན་ཞིང་ཆེན་མཐོ་རིམ་མི་དམངས་ཁྲིམས་ཁང་གིས་ཕྱི་ལོ་ ༢༠༡༨ ཟླ་ ༨ ཚེས་ ༡༣ ཉིན་བོད་ཀྱི་སྐད་ཡིག་ཐོབ་ཐང་རྩོད་ལེན་པ་བཀྲ་ཤིས་དབང་ཕྱུག་ལགས་ཀྱི་ཞུ་གཏུག་ལ་ངོས་ལེན་བྱས་མེད་པ་མ་ཟད། དེ་སྔོན་མཚོ་སྔོན་ཞིང་ཆེན་ཡུལ་ཤུལ་ཁུལ་འབྲིང་རིམ་མི་དམངས་ཁྲིམས་ཁང་གིས་ནེའུ་ཡོག་དུས་བབ་ཀྱིས་བཀྲ་ཤིས་དབང་ཕྱུག་ལགས་ལ་བཅར་འདྲི་ཞུས་པའི་བརྙན་ཐུང་དེར་གཞིར་བཞག་ཐོག་ཁོང་ལ་རྒྱལ་ཁབ་ཁ་བྲལ་སྐུལ་སློང་གི་ཉེས་མིང་འོག་ལོ་ལྔའི་དུས་བཀག་བཙོན་འཇུག་གི་ཁྲིམས་ཐག་བཅད་པར་འགྱུར་བ་མེད། ཅེས་བརྗོད་འདུག
བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བཀྲ་ཤིས་དབང་ཕྱུག་ལགས་ཀྱི་ཞུ་གཏུག་ལ་ཁྲིམས་ཁང་ནས་དྲང་བདེན་མེད་པའི་ཁྲིམས་ཐག་བཅད་པ་དེར་ཧ་ལས་དགོས་པ་མེད། རྒྱ་གཞུང་གིས་མུ་མཐུད་རྒྱལ་སྤྱིའི་ཁྲིམས་ལུགས་དབང་འཛིན་དང་རྒྱ་ནག་རང་གི་རྩ་ཁྲིམས་ལ་བརྩི་མེད་རྡོག་རོལ་བཏང་བ་རེད། ཅེས་གསུངས།
མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེད་མཁས་མི་སྣས་བསྒྲགས་གཏམ་ཞིག་སྤེལ་ཏེ་རྒྱ་གཞུང་གིས་ཁ་གསལ་མེད་པར་བཀྲ་ཤིས་དབང་ཕྱུག་ལགས་ལ་ཉེས་མེད་ཉེས་འདོགས་བྱས་པ་དེ་མཚམས་འཇོག་དགོས་པའི་འབོད་སྐུལ་ཞུས་འདུག །
