ཕྱི་ལོ་ ༢༠༡༨ ཟླ་ ༨ ཚེས་ ༡༣ རེས་གཟའ་ཟླ་བ།
༄༅། །ཕྱི་ལོ་ ༢༠༡༨ ཟླ་ ༨ ཚེས་ ༡༣ ཉིན་རྡ་ས་ཉེ་འགྲམ་དུ་ཡོད་པའི་ ANGEL`S INN RESORT ཞེས་པའི་གསོལ་མགྲོན་ཁང་དུ་ཉིན་གྲངས་གསུམ་རིང་གི་བོད་ཀྱི་ཟློས་གར་ཚོགས་པའི་དགེ་རྒན་དང་བྲོ་བ་རྒན་པ་རྣམས་ལ་སློབ་ཁྲིད་ཐབས་ལམ་དང་འབྲེལ་བའི་ཟབ་སྦྱོང་དབུ་འབྱེད་གནང་སོང་།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་། ཤེས་རིག་ཤེས་ཡོན་ཚན་པའི་འགན་འཛིན་དྲུང་འཕར་ཚེ་རིང་བསམ་གྲུབ་ལགས། བོད་ཀྱི་ཟློས་གར་ཚོགས་པའི་ངེས་སྟོན་པ་དཔེ་ཟུར་དབང་འདུས་ཚེ་རིང་ལགས་ཀྱིས་གཙོས་དགེ་རྒན་དང་ལས་བྱེད། བྲོ་བ་རྒན་པ་བཅས་ཁྱོན་མི་གྲངས་ ༢༠ ཙམ་ལྷན་འཛོམས་ཀྱི་ཐོག་མར་སྐུ་མགྲོན་གཙོ་བོ་མཆོག་གིས་སྣང་གསལ་མར་མེ་ཞལ་ཕྱེ་གནང་སྟེ་མཛད་སྒོ་དབུ་འཛུགས་ཀྱི་ཐོག་མར་བོད་ཀྱི་ཟློས་གར་ཚོགས་པའི་ངེས་སྟོན་པ་དཔེ་ཟུར་དབང་འདུས་ཚེ་རིང་ལགས་ཀྱིས་ཕེབས་བསུ་དང་ལྷན་ངོ་སྤྲོད་གསུང་བཤད་གནང་གྲུབ་མཚམས་སྐུ་མགྲོན་གཙོ་བོ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་འཚམས་འདྲི་དང་སྦྲགས་གསུང་བཤད་གནང་དོན། དེ་རིང་འདིར་བོད་ིཀྱི་ཟློས་གར་ཚོགས་པའི་སྒྱུ་རྩལ་རྒན་ལགས་རྣམ་པ་དང་། བྲོ་བ་རྒན་པ་རྣམ་པར་བོད་ཀྱི་སྒྱུ་རྩལ་རིག་པའི་དེང་རབས་དང་མཐུན་པའི་ཟབ་སྦྱོང་ལས་རིམ་ཞིག་གོ་སྒྲིག་གནང་བའི་ཐོག་ཤེས་རིག་ལས་ཁུངས་ནས་ཐུན་འགྱུར་གནང་སྟེ་ཉིན་གྲངས་གསུམ་རིང་གི་ཟབ་སྦྱོང་སྒོ་འབྱེད་ཀྱི་མཛད་སྒོ་གནང་གི་ཡོད་པ་རེད།
ཟབ་སྦྱོང་ཐོག་ཕེབས་པའི་ཤེས་རིག་ཤེས་ཡོན་ལྷན་ཚོགས་ཀྱི་འགན་འཛིན་དྲུང་འཕར་ཚེ་རིང་བསམ་གྲུབ་ལགས་དང་། བོད་ཀྱི་ཟློས་གར་ཚོགས་པའི་འགན་འཛིན་དང་རྒན་ལགས་རྣམ་པ། དེ་བཞིན་ཚོགས་བཅར་བ་རྣམ་པ་བཅས་ལ་ངས་ཆོར་རིག་ལས་ཁུངས་དང་སྒེར་གྱི་ངོས་ནས་འཚམས་འདྲིའི་བཀྲ་ཤིས་བདེ་ལེགས་ཞུ་གི་ཡོད།
བོད་ཀྱི་ཟློས་གར་རིག་གནས་འདི་མི་ཉམས་རྒྱུན་འཛིན་དང་ཉམས་པ་སླར་གསོ་བྱེད་པའི་སྐབས་སུ་འདི་རླག་ན་ཁྱོན་ནས་འགྲིག་གི་མི་འདུག་སྙམ་པའི་སེམས་ཤུགས་དེ་དགོས་ཀྱི་རེད། དེ་ལྟར་ཡོང་བར་དེའི་ཕན་ཡོན་དང་ལོ་རྒྱུས། གནད་འགག སེམས་གཏིང་ནས་འགུལ་སྐྱོད་ཐེབས་རྒྱུའི་ཐོག་འགྲོ་རྒྱུ་གནད་འགག་ཆགས་ཀྱི་ཡོད། དེར་བརྟེན་བོད་ཀྱི་ཟློས་གར་རིག་གནས་ནི་གང་ས་ཅི་ཐད་ནས་རྩ་ཆེན་པོ་གནད་འགག་ཆེན་པོ་ཇི་ལྟར་ཆགས་ཀྱི་ཡོད་པ་དགོངས་པ་ཡང་ཡང་བཞེས་དགོས་རྒྱུ་གལ་ཆེན་པོ་རེད།
དེ་རིང་འདིར་ཟབ་སྦྱོང་གནང་གི་ཡོད་སྟབས། རྒན་ལགས་རྣམ་པས་སློབ་ཕྲུག་རྣམ་པར་སློབ་ཁྲིད་གནང་བའི་སྐབས་སུ་དེའི་ཕན་ཡོན་དེ་དག་བཤད་དགོས་རྒྱུ་ཧ་ཅང་གལ་ཆེན་པོ་ཆགས་ཀྱི་ཡོད་པ་དེ་དག་གནང་དང་གནང་མུས་ཡིན་གྱི་རེད།
རྒྱུ་མཚན་ཤེས་པའི་ཐོག་ནས་ཡིད་ཆེས་སྐྱེ་རྒྱུ་ཞིག་དགོས་ཀྱི་ཡོད་པར་བརྟེན་ཟློས་གར་རིག་གནས་འདི་ད་ཆ་རྒྱུ་ཆ་གང་འདྲ་ཞིག་ཡོད་མིན་ལ་མ་ལྟོས་པར་དོན་ལ་དངོས་ཡོད་གནས་ཚུལ་དང་མཐུན་པའི་རྒྱུ་མཚན་འགྲེལ་བཤད་དང་། ལོ་རྒྱུས་ཐོག་ནས་རྩ་ཆེན་པོ་གང་འདྲ་ཆགས་ཀྱི་ཡོད་པ། འདི་དངོས་གནས་ཧ་ཅང་རྩ་ཆེན་པོ་རེད་འདུག སོ་སོའི་འདིའི་ནང་གང་འདྲ་སླེབས་པ་ཡིན་ན་བསམ་དུས་སླེབ་ས་ནོར་མི་འདུག འདིའི་ཐོག་གཅིག་བྱེད་པ་ཡིན་ན། སོ་སོ་སྒེར་དང་སྤྱི་པ་གཉིས་ཀར་ཕན་ཐོགས་ཆེན་པོ་ཡོང་གི་འདུག ང་སླེབ་ས་དེ་འགྲིག་འདུག་སྙམ་པའི་སྤྲོ་བ་སྐྱེ་གི་རེད། སྤྲོ་བ་སྐྱེས་པའི་རྗེས་སུ་སླེབ་པ་ཙམ་མིན་པར་ཡག་པོ་ཞིག་བྱེད་དགོས་དྲན་དུས་གཞི་ནས་ཕུགས་ལ་ཕན་རྒྱུ་དེ་དག་སླེབ་ཡོང་དུས་དེ་ག་རང་གི་ཐོག་ལ་མི་ཚེ་གང་པོ་རིག་པ་བསྒྲིམས་ནས་བྱེད་རྒྱུ་དེ་དག་རང་བཞིན་གྱི་ཡོང་གི་ཡོད་པ་རེད་དྲན་གྱི་འདུག དེ་ལྟར་མིན་པར་འཚོ་བ་སྐྱེལ་རྒྱུ་ལྟ་བུའི་སྟེང་ཕྱིན་པ་ཡིན་ན། ག་བ་ཡིན་ནའང་གནས་ཚུལ་གཅིག་པ་ནང་བཞིན་རེད། གང་ཙམ་ཞིག་ནས་ཡང་ལྗིད་བཀྱགས་ནས་ཤོར་འགྲོ་གི་ཡོད་པ་རེད། དེ་དག་ཕུགས་འགྱངས་རིང་པོ་བསམ་བློ་གཏོང་བ་ཡིན་ན་ཏན་ཏན་འགོག་རྒྱུ་ཡོད་ཀྱི་རེད་དྲན་གྱི་འདུག
བོད་ལ་རིག་གནས་ཧ་ཅང་ཕྱུག་པོ་ཆགས་ཡོད་པ་དེ་དག་བརྒྱ་ཆ་མང་ཆེ་བ་རྒྱ་གར་འཕགས་པའི་ཡུལ་ནས་དྲངས་ཡོང་པ་ཁོ་ན་ཆགས་ཡོད་སྟབས། དེའི་འགྲོ་སྟངས་ལྟར་བྱས་ནས་རིག་གནས་ཆེ་བ་ལྔ་དང་ཆུང་བ་ལྔ་ཟེར་རྒྱུ་ལ་སོགས་པ་མང་པོ་ཞིག་ཡོད་པ་དེ་དག་མང་ཆེ་བ་རྒྱ་གར་འཕགས་པའི་ཡུལ་གྱི་ཆགས་ཡོད། ལྷ་རབས་བྱུང་ན་དེ་དག་མི་ཉམས་རྒྱུན་འཛིན་རང་སོར་ཡིན་པའི་ཐོག་དེང་རབས་དང་མཐུན་པ་འགྲོ་དགོས།
བོད་ཀྱི་ཟློས་གར་ཚོགས་པ་ཐོག་མར་བཙུགས་པ་ནས་བཟུང་ད་བར་སྒྱུ་རྩལ་གྱི་འགྲོ་སྟངས་དང་ཆ་རྐྱེན་སོགས་གང་ས་ཅི་ཐད་ནས་དཀའ་ངལ་དང་མ་འདང་བའི་ཆ་མང་པོ་ཞིག་ཏན་ཏན་ཡོད་ཀྱི་རེད། འོན་ཀྱང་གཙོ་ཆེ་ཤོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རེས་དང་དགོངས་པ་ཡོད་པ་དེ་དག་ཞབས་སྤྱི་ཇི་ཙམ་བསྒྲུབས་ཡོད་པ་རེད་ཅེ་ན། སྒྲིག་འཛུགས་ཆེ་ཆུང་མང་པོ་ཡོད་པ་དེ་དག་དང་བསྡུར་ན་ཞབས་སྤྱི་བླ་ན་མེད་པ་བསྒྲུབས་ཡོད་པ་རེད་དྲན་གྱི་འདུག ཅེས་སོགས་ཀྱི་གསུང་བཤད་གནང་། །
