ཕྱི་ལོ་ ༢༠༡༨ ཟླ་ ༨ ཚེས་ ༣ རེས་གཟའ་པ་སངས།
༄༅། །འདི་གར་སྡེ་རྭ་ལྡུན་ཁྱབ་ཁོངས་བོད་མིའི་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཨུ་ཏར་ཁནཊ་མངའ་སྡེའི་གཞུང་ནས་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ ལག་བསྟར་དོན་སོན་ཡོང་ཐབས་སུ་འདི་ནས་སྔ་ཕྱི་ཞུ་གཏུག་རིམ་ཞུས་མཐར། མངའ་སྡེ་གཞུང་གི་ནང་སྲིད་ལྷན་ཁང་གི་སྤྱི་ཁྱབ་དྲུང་ཆེ་ལས་ཁུངས་ནས་ཚོགས་བསྐོང་བཀའ་ཡིག་གནང་འབྱོར་གཞིར་བཟུང་། ཕྱི་ལོ་ ༢༠༡༨ ཟླ་ ༨ ཚེས་ ༡ ཉིན་རྒྱབ་ཆུ་ཚོད་ ༣།༣༠ ཐོག་གོང་གསལ་ལས་ཁུངས་སུ་མངའ་གཞུང་ནང་སྲིད་ལྷན་ཁང་གི་སྤྱི་ཁྱབ་དྲུང་ཆེ་དབུ་བཞུགས་ཐོག་མངའ་གཞུང་ནང་སྲིད་དྲུང་འཕར་དང་། དྲུང་གཞོན། སྡེ་ཚན་འགན་འཛིན། རྫོང་དཔོན་ལས་ཁུངས་ཀྱི་སྐུ་ཚབ་གྲོང་ཁྱེར་འགོ་འཛིན་ (City Magistrate) སྐོར་སྲུང་ལས་ཁུངས་ཀྱི་འགོ་དཔོན།(SSP) ཕྱི་མི་དེབ་འགོད་ལས་ཁུངས་ཀྱི་ལས་བྱེད་ (FRO) བཅས་དང་། སྡེ་རྭ་ལྡུན་ས་གནས་འགོ་འཛིན་གྱིས་འགོ་ཁྲིད་པའི་ལས་དྲུང་རྣམ་པ་གཉིས། བདེ་སྐྱིད་གླིང་བཟོ་གྲྭའི་རྩིས་པ་བཅས་ཚོགས་འཛོམས་བྱུང་ཡོད།
ཚོགས་འདུའི་ཐོག་སྲིད་བྱུས་དགོངས་དོན་ད་བར་འདི་ཁུལ་གྱི་སྐྱབས་བཅོལ་བོད་མིར་མཐུན་རྐྱེན་སྦྱོར་སྤྲོད་གནང་རྒྱུ་ལྷག་བསྡད་པ་དག་འབྲེལ་ཡོད་མངའ་གཞུང་ནས་མཐུན་འགྱུར་ཡོང་རྒྱུར་འདི་ནས་དོན་ཚན་རེ་རེ་བཞིན་ཞུ་གཏུག་སྙན་གསན་ཞུས་པ་གཞིར་བཟུང་སྤྱི་ཁྱབ་དྲུང་ཆེ་མཆོག་གིས་ཚོགས་ཕེབས་འབྲེལ་ཆགས་ལས་སྣེ་སོ་སོར་ལས་དོན་མཇུག་གནོན་དགོས་པའི་བཀོད་མངགས་དོ་ནན་གནང་བ་དང་ཆབས་ཅིག སླད་འབྲེལ་ཡོད་སྡེ་ཚན་སོ་སོ་ནས་འདི་བྱ་འདི་མིན་གྱི་ལས་དོན་མཇུག་སྐྱོང་ཇི་བྱེད་ཀྱི་གནས་སྟངས་གཟིགས་ཞིབ་སླད་འབྱུང་འགྱུར་ཟླ་གསུམ་རྗེས་བསྐྱར་དུ་ཚོགས་འཛོམས་གནང་རྒྱུ་གནང་སོང་བ་བཅས་ཚོགས་འདུའི་དུས་ཡུན་ཚོུད་ ༡ དང་སྐར་ ༡༥ ཙམ་འགོར་ཡོད།
ད་ལན་གོ་སྐབས་འདིའི་བརྒྱུད་འབྲེལ་ཡོད་ལས་སྣེ་རྣམ་པར་རྒྱ་གར་གཞུང་མང་གཉིས་ལ་ཐུགས་རྗེ་ལེགས་ཞུ་དང་བཀའ་དྲིན་རྗེས་དྲན་མཚོན་བྱེད་ཀྱི་དྲན་རྟེན་པར་སྒྲོམ་རེ་ཕུལ་ཐུབ་པ་བྱུང་ཡོད་པ་བཅས།།
