ཕྱི་ལོ་ ༢༠༡༨ ཟླ་ ༨ ཚེས་ ༢༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༨ ཟླ་ ༨ ཚེས་ ༡༨ རེས་གཟའ་སྤེན་པ་ཉིན་གྱི་སྔ་དྲོར་རྒྱ་གར་ལྷོ་ཕྱོགས་ལུགས་ཟུང་བསམ་གྲུབ་གླིང་བོད་མིའི་གཞིས་ཆགས་ཀྱི་མཉམ་འབྲེལ་ཚོགས་ཁང་ནང་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཚོང་ལས་ཡར་རྒྱས་རམ་འདེགས་ལས་གཞི་ཚན་པ་དང་། བོད་མིའི་ཚོང་ལས་སྡེ་ཚོགས་ཐུན་མོང་གི་གོ་སྒྲིག་འོག་བཙན་བྱོལ་བོད་མིའི་ཡར་ཐོན་ཚོང་པའི་འདུ་འཛོམས་ཐེངས་བཞི་པ་དབུ་བཙུགས་གནང་འདུག
དེ་ཡང་ཚོགས་འདུ་འདི་བཞིན་ཕྱི་ཟླ་ ༨ ཚེས་ ༡༨ ནས་ ༡༩ བར་ཉིན་གྲངས་གཉིས་རིང་ཡར་ཐོན་ཚོང་ལས་གནང་ཕྱོགས་དང་འབྲེལ་བའི་ཐོག་གཏམ་བཤད་དང་བགྲོ་གླེང་། འདེམས་སྒྲུག་སོགས་གནང་རྒྱུ་དང་། ཚོང་པ་གསར་པ་དྲག་འདེམས་བྱུང་བ་རྣམས་ལ་མ་དངུལ་རོགས་སྐྱོར་ཧིན་སྒོར་འབུམ་ ༡༥ ནས་མཐུན་རྐྱེན་སྦྱར་རྒྱུ་ཡིན་འདུག
ཐེངས་འདིའི་ཚོགས་འདུ་དབུ་འབྱེད་ཀྱི་མཛད་སྒོར་སྐུ་མགྲོན་གཙོ་བོ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་དང་། སྦེང་ལོར་ལྷོ་སྤྱི་ཆོས་འཕེལ་ཐུབ་བསྟན་ལགས། སྦེལ་ཀོབ་བདེ་སླར་དང་ལུགས་བསམ་ས་གནས་འགོ་འཛིན། གཞན་ཡང་གཞུང་དང་གཞུང་འབྲེལ་མིན་པའི་ཚོགས་པ་སྡེ་ཚན་ཁག་གི་འགན་འཛིན་དང་བཙན་བྱོལ་བོད་མིའི་སྤྱི་ཚོགས་ཁྲོད་ཡར་ཐོན་ཚོང་ལས་གཉེར་བཞིན་པ་སོགས་ཁྱོན་མི་གྲངས་ ༡༧༥ ལྷག་འདུ་འཛོམས་གནང་འདུག
དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་དཔལ་འབྱོར་བཀའ་བློན་མཆོག་གིས་གསུང་བཤད་གནང་དོན། བོད་མིའི་སྒྲིག་འཛུགས་དཔལ་འབྱོར་ལས་ཁུངས་ནས་འདས་པའི་ལོ་ངོ་བཞི་ཙམ་གྱི་གོང་ལ་ཚོང་ལས་ཡར་རྒྱས་རམ་འདེགས་ལས་གཞི་ཆེད་མངགས་འགོ་བཙུགས་པ་བརྒྱུད་ཚོང་པ་རྙིང་པར་ལམ་སྟོན་གནང་རྒྱུའི་གོ་སྐབས་དང་། ཚོང་པ་གསར་པ་སྐྱེད་སྲིང་བྱེད་རྒྱུ་པ་བརྒྱུད་སོ་སོའི་རྐང་པ་ཐོག་ལང་ནས་འཚོ་བ་ཡག་པོ་ཆགས་ཐུབ་པ་མ་ཟད། བོད་མི་གཞན་ལའང་རོགས་པ་བྱེད་ཐུབ་པའི་དམིགས་ཚད་བཟུང་ནས་ཚོང་ལས་ཡར་རྒྱས་རམ་འདེགས་ལས་གཞི་འདི་ཉིད་བཙུགས་དགོས་པའི་རྒྱུ་མཚན་གཙོ་བོ་འདི་རེད།
དེ་རིང་འདིར་དཔལ་འབྱོར་ལས་ཁུངས་ནས་འགྲོ་གྲོན་ཕྲན་བུ་བཏང་སྟེ་རྣམ་པ་ཚོ་གདན་འདྲེན་ཞུ་དགོས་པའི་དམིགས་ཡུལ་ཧ་ཅང་ཆེན་པོ་ཡོད། དམིགས་ཡུལ་འདི་ཉིད་སྒྲུབ་པར་ཚང་མས་དཀའ་ལས་རྒྱག་དགོས། དཔལ་འབྱོར་ལས་ཁུངས་ངོས་ནས་སྐུ་ལས་སྐྱོན་གྱི་རེད། ཚན་པའི་ལས་བྱེད་བཞི་ཧྲ་ཏག་ཏག་ཡོད། ཁོང་རྣམ་པའི་ངོས་ནས་ལམ་སྟོན་དང་མཐུན་འགྱུར་དགོས་རིགས་གནང་གི་རེད། འོན་ཀྱང་དོ་བདག་རང་ཉིད་ལ་འདུན་པ་དང་། དཀའ་ལས་མ་བརྒྱག་ན་ཡོང་རྒྱུ་གང་ཡང་མི་འདུག དེར་བརྟེན་རྣམ་པ་ཚོས་ཉིན་གྲངས་གཉིས་རིང་གི་ཚོགས་འདུ་འདི་ཉིད་ཧ་ཅང་གལ་ཆེན་པོ་རྩི་དགོས། ང་ཚོ་བོད་ཀྱི་ཁ་དཔེར། སྣོད་ཀྱི་སྐྱོན་གསུམ་སྟེ། རྣ་བ་མི་གཏོད་ཁ་སྦུབ་ལྟ་བུའི་སྐྱོན་དང་། ཡིད་ལ་མི་འཛིན་ཞབས་རྡོལ་ལྟ་བུའི་སྐྱོན། ཉོན་མོངས་དང་འདྲེས་དུག་ཅན་ལྟ་བུ་མིན་པར་བགྲོ་གླེང་གནང་མཁན་དང་གསུང་བཤད་གནང་མཁན་གྱི་བཀའ་མོལ་དེ་དག་ཡག་པོ་གསན་ནས་སོ་སོར་ཕན་པ་བེད་སྤྱོད་གནང་རོགས། ཞེས་དང་།
དེ་བཞིན་བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུའི་འཆར་སྣང་དང་། བོད་མིའི་སྒྲིག་འཛུགས་དཔལ་འབྱོར་ལས་ཁུངས་ནས་བཙན་བྱོལ་བོད་མིའི་ཡར་ཐོན་ཚོང་པའི་འདུ་འཛོམས་སྐོང་ཚོགས་གནང་དགོས་པའི་དམིགས་ཡུལ་སོགས་ཀྱི་སྐོར་གསུང་བཤད་གནང་གྲུབ་མཚམས་ཚོང་ལས་ཡར་རྒྱས་རམ་འདེགས་ལས་གཞིའི་འགན་འཛིན་བསྟན་འཛིན་དབང་རྒྱལ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ཡོད་པ་བཅས།།
