བཙན་བྱོལ་བའི་གནས་སྟངས་སྐོར་གྱི་པར་རིས་འགྲེམས་སྟོན་གནང་བ།

གསར་ལས་ཁང་གི་གསར་འགོད་པས།

༢༠༡༨-༠༨-༢༡

ཕྱི་ལོ་ ༢༠༡༨ ཟླ་ ༨ ཚེས་ ༢༡ རེས་གཟའ་མིག་དམར།

༄༅། །ཕྱི་ལོ་ ༢༠༡༨ ཟླ་ ༨ ཚེས་ ༡༨ ནས་ ༢༠ བར་ཉིན་གྲངས་གསུམ་རིང་རྒྱ་གར་པན་ཇབ་མངའ་སྡེའི་གྲོང་ཁྱེར་ཨམྲིཏ་སར་དུ་རྟེན་གཞི་བྱས་པའི་གཞུང་འབྲེལ་མིན་པའི་ཚོགས་པ་མ་ཇ་ཁང་ Mahja House ཞེས་པ་དང་རྒྱ་གར་སྒྱུ་རྩལ་སློབ་གཉེར་ཁང་ The Indian Academy of Fine Arts གཉིས་ཟུང་འབྲེལ་ཐོག སྒྱུ་རྩལ་སློབ་གཉེར་ཁང་དུ་རང་ཡུལ་ནས་ས་གནས་གཞན་དུ་སྐྱབས་བཅོལ་ཆེད་བྲོས་བྱོལ་དུ་ཕྱིན་པའི་གནས་སྟངས་སྐོར་གྱི་པར་རིས་འགྲེམས་སྟོན་དབུ་འབྱེད་ཀྱི་མཛད་སྒོ་ཞིག་ཚོགས་འདུག སྐབས་དེར་ཕྱི་དྲིལ་བོད་ཀྱི་འགྲེམས་སྟོན་ཚན་པས་ཀྱང་མཉམ་ཞུགས་གནང་ཡོད།
དེ་ཡང་གོང་ཚེས་ཉིན་སྒྱུ་རྩལ་སློབ་གཉེར་ཁང་གི་འགན་འཛིན་རཱ་ཇིནྡྲ་མོ་ཧན་སིངྒ་ Rajinder Mohan Singh Chhina ལགས་ཀྱིས་མཛད་སྒོའི་སྐུ་མགྲོན་གཙོ་བོ་རྫོང་དཔོན་ཀེ་ཨེས་སང་གྷ་ K S Sangha མཆོག་སྣེ་ལེན་གཟབ་རྒྱས་ཞུས་ཡོད་པ་དང་། ཕྱོགས་མཚུངས་བོད་མིའི་སྒྲིག་འཛུགས་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་ཀྱིས་ཕེབས་བསུའི་སྣེ་ལེན་ཞུས་གནང་ཡོད།
ཕྱི་དྲིལ་བོད་ཀྱི་འགྲེམས་སྟོན་ཚན་པའི་ཕ་ཡུལ་ཕྱོགས་ལ་རྒྱང་ལྟ་ (A Long Look Homeward) ཞེས་པའི་སྐོར་བསྐྱོད་པར་རིས་འགྲེམས་སྟོན་གནང་ཡོད། དེ་ཡང་སྐུ་མགྲོན་གཙོ་བོ་མཆོག་གིས་པར་རིས་འགྲེམས་སྟོན་དབུ་འབྱེད་གནང་སྐབས་ཕྱི་དྲིལ་འགྲེམས་སྟོན་ཚན་པའི་ལས་བྱེད་རིག་འཛིན་རྡོ་རྗེ་ལགས་ཀྱིས་སྐུ་མགྲོན་གཙོ་བོ་མཆོག་ལ་བོད་དོན་སྐོར་གྱི་པར་རིས་ཁག་རེ་རེ་བཞིན་ངོ་སྤྲོད་དང་འགྲེལ་གསལ་བཤད་གཟབ་རྒྱས་ཞུས།

དེ་རྗེས་ས་གནས་མི་མང་ནས་ཀྱང་བཙན་བྱོལ་བོད་མི་རྣམས་ཀྱི་གནས་སྟངས་ཞིབ་ཕྲ་འཁོད་པའི་པར་རིས་རྣམས་ལ་དོ་སྣང་ཆེན་པོ་གནང་ཡོད། ཐེངས་འདིར་པར་རིས་འགྲེམས་སྟོན་ཙམ་མིན་པར་བཙན་བྱོལ་བའི་གནས་སྟངས་སྐོར་སོགས་ལས་འཕྲོས་པའི་ཆུ་ཚོད་ ༢ ལྷག་ཚོགས་འདུ་ཚོགས་ཡོད།

ཨམྲིཏ་སར་དང་བོད་མིའི་དབར་བཙན་བྱོལ་བའི་གནས་སྟངས་ཐོག་པར་རིས་འགྲེམས་སྟོན་གྱི་ལྷན་ཚོགས་ཆེས་ཐོག་མ་ཆགས་འདུག །

གསར་གནས།