༢༠༡༨ ཟླ་ ༨ ཚེས་ ༣༠ རེས་གཟའ་མིག་དམར།
༄༅། །ཕྱི་ལོ་ ༢༠༡༨ ཟླ་ ༨ ཚེས་ ༢༩ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་རྒྱ་གར་ལྷོ་ཕྱོགས་ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་སུ་སློབ་ཕྲུག་དང་ཕ་མ་བཅས་ལྷན་འཛོམས་ཐོག་གསུང་བཤད་གནང་འདུག སྐབས་དེར་དཔལ་ལྡན་སྲིད་སྐྱོང་མཆོག་གིས་གཤམ་འཁོད་དོན་ཚན་ལྔའི་སྒོ་ནས་སློབ་གྲྭ་ཡར་རྒྱས་དང་སློབ་ཕྲུག་གི་མི་ཚེ་ལམ་ལྷོངས་ལྡན་པ་ཞིག་ཡོང་ཐུབ་སྐོར་གསུངས།
དེ་ཡང་དོན་ཚན་དང་པོ་ནི། ད་ཆ་བོད་མིའི་སྒྲིག་འཛུགས་ཀྱིས་བོད་པའི་སློབ་གྲྭ་ཁག་རྩིས་ལེན་ཟིན་པར་བརྟེན་སློབ་གྲྭ་ཡར་རྒྱས་གཏོང་རྒྱུའི་ལས་འཆར་བཀོད་སྒྲིག་དང་། དེང་དུས་ཀྱི་གནས་སྟངས་ལ་གཞིགས་པའི་མཐུན་འགྱུར་སྦྱར་རྒྱུ་དེ་ལས་འགན་གཙོ་བོ་ཡིན་པ་དང་།
དོན་ཚན་གཉིས་པ། སློབ་གྲྭའི་སློབ་སྤྱི་དང་ལས་བྱེད། སློབ་གྲྭའི་ནང་གི་ལས་དོན་ཆེ་འབྲིང་ཆུང་གསུམ་ཚང་མར་གཟིགས་རྟོག་གནང་རྒྱུ་དང་། སློབ་གྲྭའི་སྒྲིག་གཞི་ཁག་ལག་ལྟར་གནང་རྒྱུ། སློབ་དེབ་དུས་ཐོག་སློབ་ཕྲུག་ཚོར་བགོ་འགྲེམ་ཐུབ་པ། གལ་ཏེ་སློབ་དེབ་སོགས་ཡར་རྒྱས་གཏོང་དགོས་གལ་གཟིགས་ཚེ་འཕྲལ་དུ་བོད་མིའི་སྒྲིག་འཛུགས་ཤེས་རིགས་ལས་ཁུངས་ལ་འབྲེལ་བ་གནང་དགོས་རྒྱུ།
དོན་ཚན་གསུམ་པ། དགེ་རྒན་ཚོས་དུས་རྟག་ཏུ་སློབ་ཚན་སློབ་ཁྲིད་གནང་སྐབས་དོ་དབྱིངས་ཡོད་པའི་ཐོག་ནས་སློབ་ཁྲིད་གནང་རྒྱུ་ཤིན་ཏུ་གལ་ཆེ་བ་དང་། ལྷག་པར་བརྩེ་གདུང་ཡོད་པའི་ཐོག་ནས་སློབ་ཁྲིད་གནང་བ་ཡིན་ན་དེས་མི་གཅིག་གི་མི་ཚེར་བཟང་ཕྱོགས་ཀྱི་ཤུགས་རྐྱེན་ཁྱད་པར་ཆེན་པོ་བཟོ་ཐུབ། དེར་བརྟེན་ང་ཚོ་ནང་པ་སངས་རྒྱས་པ་ཞིག་ཡིན་པའི་ངོས་ནས་བཤད་ནའང་དེ་ལས་ཕན་ཡོན་ཆེ་བ་ཞིག་མེད། རང་ལས་གཞན་གཅེས་ཟེར་བ་དེ་ཆགས་རྒྱུ་རེད། སློབ་ཕྲུག་ཚོས་དུས་རྟག་ཏུ་རང་གི་དགེ་རྒན་གྱིས་སློབ་ཁྲིད་གང་གནང་བ་དེར་མཐའ་གཅིག་ཏུ་ཡིད་ཆེས་བློ་འགེལ་དང་བཀའ་དྲིན་སྙིང་བཅངས་ཐོག་ནས་སློབ་སྦྱོང་བྱེད་ཀྱི་ཡོད་པར་བརྟེན། དགེ་རྒན་རྣམ་པས་ད་བར་སྐུ་ལས་ཧ་ལས་པ་བསྐྱོན་ཡོད། ད་དུང་ཡིན་ནའང་མུ་མཐུད་ནས་སྔར་ལྷག་འབད་བརྩོན་གནང་དགོས་རྒྱུ་ཤིན་ཏུ་གལ་ཆེ།
དོན་ཚན་བཞི་པ། སློབ་ཕྲུག་ཚོས་འཛིན་གྲྭར་དུས་ཐོག་ཡོང་དགོས་པ་དང་། ཞོགས་པ་ནང་ནས་འཛིན་གྲྭར་ཡོང་སྐབས་སློབ་སྦྱོང་ཤེས་འདོད་ཀྱི་ཀུན་སློང་དགོས་པ།
སློབ་ཕྲུག་ཡིན་པའི་ཆ་ནས་སློབ་སྦྱོང་ལ་འབད་བརྩོན་དགོས་རྒྱུ་ཤིན་ཏུ་གལ་ཆེ་བ་དང་། ཉུང་མཐར་ཡང་ཉིན་གཅིག་ནང་ཚོུད་ ༡༠ སློབ་སྦྱོང་བྱེད་དགོས་པ་ཧ་ཅང་གལ་ཆེན་པོ་ཡིན་པ།
ཤེས་ཡོན་ཡོད་ན་དཔལ་འབྱོར་རང་བཞིན་གྱིས་ཡག་པོ་ཆགས་རྒྱུ་ཡིན་པ་ནི་འཛམ་གླིང་ནང་མི་ཚང་ཉམ་ཆུང་དང་ཉམ་ཐག་གི་ཕྲུ་གུ་སློབ་སྦྱོང་སྦྱངས་འབྲས་སུ་སོ་སོའི་རྒྱལ་ཁབ་ཀྱི་དབུ་ཁྲིད་ཆགས་ཐུབ་པ་དང་། དཔལ་འབྱོར་གྱི་དཀའ་ངལ་ཡང་སེལ་ཐུབ་པ་ཧ་ཅང་མང་པོ་ཡོད། སློབ་སྦྱོང་ཡག་པོ་ཆགས་ན་ས་ཕྱོགས་གང་དུ་བསྐྱོད་ཀྱང་བསམ་དོན་གྲུབ་ཐུབ་པ། གལ་ཏེ་སློབ་སྦྱོང་མ་བྱེད་པར་ཐ་མག་དང་ཆང་རག་སོགས་བེད་སྤྱོད་བྱས་པ་ཡིན་ན་སོ་སོའི་མི་ཚེ་ཐུང་ཞིང་འཚོ་བའི་གནས་སྟངས་ཞན་པོ། རང་གི་ཕ་མའང་འུ་ཐུག་ནས་སོ་སོའི་ནང་ནས་ཕྱིར་འབུད་བཏང་བ། སོ་སོའི་སྤུན་མཆེད་ཀྱི་ནང་ནས་ཕྱིར་འབུད་བཏང་བ། སོ་སོའི་གྲོགས་པོ་གྲོགས་མོ་རྣམས་ཀྱང་རང་ཉིད་ལ་ཁ་ཡ་མ་བྱས་པ།
སྤྱི་ཚོགས་གང་འདྲ་ཞིག་ཏུ་སོང་ཡང་རང་ཉིད་གྲོགས་མེད་ཁེར་རྐྱང་དུ་ལྷག་རྒྱུ་ཡིན་པ་གསལ་པོ་རེད། སློབ་ཕྲུག་རྣམས་ནས་དུས་རྟག་ཏུ་ཆང་རག་དང་ཐ་མག་སོགས་མྱོས་རྫས་རིགས་རྩ་བ་ནས་ལོངས་སུ་སྤྱོད་རྒྱུ་མེད། སློབ་ཕྲུག་གཞན་དང་མི་འདྲ་བར་བོད་པའི་སློབ་ཕྲུག་ཚོར་ལས་འགན་འཕར་མ་ཞིག་ཡོད་པ་དེ་སེམས་ལ་དྲན་དགོས། དེ་དྲན་པའི་ཐོག་ནས་སློབ་སྦྱོང་ཐོག་ངེས་པར་དུ་ཤུགས་རྒྱག་དགོས།
དོན་ཚན་ལྔ་པ། ཕ་མ། ཕ་མ་ཞིག་ཡིན་པའི་ངོས་ནས་ཕྲུ་གུ་སློབ་གྲྭར་གཏོང་ཐུབ་པ་རྩམ་གྱི་ལས་འགན་སྒྲུབ་པ་ཞིག་མ་རེད། ཉིན་ལྟར་རང་གི་ཕྲུ་གུར་དོ་སྣང་བྱེད་དགོས་པ་གལ་ཆེ། ཉིན་ལྟར་རང་གི་ཕྲུ་གུར་འཛིན་གྲྭའི་ནང་སློབ་ཚན་གང་བསླབས་ཡོད་མེད་དང་སློབ་གྲྭར་སྤྱིར་སྟངས་གནས་ཚུལ་གང་ཡོད་མེད་སྐོར་སྐད་ཆ་མང་རྩམ་བཤད་དགོས།
གལ་སྲིད་རང་གི་ཕྲུ་གུས་ཐ་མག་སོགས་ལོངས་སུ་སྤྱོད་བཞིན་ཡོད་ཚེ་ཕྲུ་གུའི་སྐད་ཆ་ཤོད་སྟངས་དང་རྣམ་འགྱུར་འདོན་སྟངས་སོགས་ནས་ལམ་སེང་རྟོགས་ཐུབ། ཅེས་དང་།
གཞན་ཡང་དཔལ་ལྡན་སྲིད་སྐྱོང་མཆོག་གིས་ཆབ་སྲིད་ཀྱི་གནས་བབ་འོག་ནས་བོད་མི་རྣམས་བཙན་བྱོལ་བ་ཆགས་པ་མ་གཏོགས་འཇོན་ཐང་མེད་པ་ལ་བརྟེན་ནས་བཙན་བྱོལ་བ་ཆགས་པ་དེ་འདྲ་མ་རེད་ཅེས་སོགས་ཀྱི་གསུང་བཤད་གནང་།
མཐར་སློབ་ཕྲུག་དང་ཕ་མ་ཁག་གཅིག་གིས་དྲི་བར་ལན་འདེབས་གནང་བསྟུན་དགེ་རྒན་དང་ལས་བྱེད་རྣམས་ཟུར་དུ་ལྷན་ཚོགས་གནང་།
སྐབས་དེར་དཔལ་ལྡན་སྲིད་སྐྱོང་མཆོག་གིས་ཤེས་ཡོན་སྲིད་བྱུས་ལག་ལྟར་གནང་ཕྱོགས་དང་། སློབ་གྲྭ་རྩིས་ལེན་ཟིན་སྟབས་ད་ཆ་སློབ་སྦྱོང་གི་གནས་ཚད་ཡར་རྒྱས་གཏོང་དགོས་གལ་དང་། ལྷག་པར་འཛིན་རིམ་བཅུ་པ་དང་བཅུ་གཉིས་ཀྱི་ཡིག་རྒྱུགས་གྲུབ་འབྲས་ཡག་པོ་དགོས་གལ། དགེ་རྒན་དང་སློབ་ཕྲུག་དབར་གྱི་མཛའ་བརྩེའི་འབྲེལ་ལམ་རྒྱུན་སྐྱོང་དགོས་གལ་ཆེ་སྐོར་དང་།
གཞན་ཡང་དགེ་རྒན་ཞིག་ཡིན་པའི་ངོས་ནས་ཆབ་སྲིད་ནང་འཛུལ་ནས་ལས་དོན་སྤེལ་བ་སོགས་བྱས་ཚེ་ཕན་ལས་གནོད་ཆེ་སྐོར། དེ་བཞིན་སྲིད་སྐྱོང་དང་སྤྱི་འཐུས་ཀྱི་འོས་བསྡུའི་སྐབས་འོས་མི་རྣམས་ཀྱི་སྐོར་སློབ་ཕྲུག་ཚོར་གཏམ་གླེང་གནང་རྒྱུའི་རིགས་སོགས་གནང་རྒྱུ་མེད་པའི་སྐོར་སོགས་གསུངས།
སྤྱིར་དོན་ལྡན་གླིང་སཾ་བྷོ་ཊ་ཉིན་སློབ་དེ་བཞིན་ཐོག་མར་ MYRADA ཞེས་པའི་གཞུང་འབྲེལ་མིན་པའི་ཚོགས་པ་ཞིག་གིས་ཕྱི་ལོ་ ༡༩༧༤ ལོར་ཐོག་མར་འགོ་འཛུགས་གནང་འདུག དེ་རྗེས་ཕྱི་ལོ་ ༡༩༧༨ ལོར་དབུས་བོད་སློབ་འཛིན་ཚོགས་ཀྱིས་རྩིས་ལེན་ཡོད། དེ་རྗེས་ཕྱི་ལོ་ ༢༠༡༨ ཟླ་ ༥ ཚེས་ ༥ ཉིན་སཾ་བྷོ་ཊས་རྩིས་ལེན་ཐུབ་པ་བྱུང་ཡོད། ད་ལྟའི་ཆར་སློབ་གྲྭ་འདིའི་ནང་སློབ་ཕྲུག་གྲངས་ ༢༢༡ ཡོད་ཅིང་དགེ་རྒན་དང་ལས་བྱེད་ཁྱོན་ ༢༡ ཡོད་འདུག སློབ་གྲྭ་འདིར་འཛིན་རིམ་དང་པོ་ནས་བཅུ་པའི་བར་ཡོད་པ་དང་། སློབ་གྲྭ་འདི་ནི་རྒྱ་གར་རྒྱལ་ཡོངས་ཤེས་ཡོན་སྡེ་ཚན་ CBSE ཁྱབ་ཁོངས་སུ་ཡོད་ཅིང་། འཛིན་རིམ་དང་པོ་ནས་ལྔ་པའི་བར་གྱི་སློབ་ཚན་རྣམས་བོད་སྐད་བརྒྱུད་སློབ་ཁྲིད་གནང་བཞིན་པ་དང་། འཛིན་རིམ་དྲུག་པ་ནས་བཅུ་པའི་བར་སློབ་ཚན་རྣམས་ཀྱི་བརྒྱུད་ལམ་ཨིན་སྐད་ཐོག་ཡིན་འདུག སློབ་སྤྱི་ལས་ཐོག་བསྟན་འཛིན་རྗེས་བཟང་ལགས་ཡིན་པ་བཅས། །
